Jonah 3 - Tedim Bible Revision 2017

Nineveh Khua Mite A Kisikna

¹ Tua ciangin Topa in Jonah tungah a nih veina thu gen a,

² “Kithawi inla, a lian mahmah Nineveh khuapi ah va pai-in kong gen sa thu taangko in,” a ci hi.

³ Jonah zong kithawi pah a, Topaʼ cih bangin Nineveh khua ah a pai hi. Nineveh khua pen khuapi lian mahmah khat hi a, ni thum sung tak kikantan hi.

⁴ Jonah zong khua sung lam manawhin kipan a, ni khat sung lam a pai khit ciangin, “Ni sawm li khit ciangin hih Nineveh khuapi kisusia ding hi,” ci-in a kiko hi.

⁵ Nineveh khua mite kisikin Pasian um uh a, an tan ding thu thangsakin, a gol pen pan a kipan a neu pen dongin puanhampi a silh uh hi.

⁶ Nineveh khua kumpipa in tua thu a zak ciangin a kumpi tokhom tung pan ding khia-in a kumpi puan suah khia a, puanhampi silhin vut lakah a tu hi.

⁷ Tua ciangin amah in Nineveh khua sung khempeuh ah thu thangsakin taangkosak a, “Kumpipa le ulianteʼ thu tawh: Mihing ahi a, ganhing ahi zongin, bawng hon ahi a, tuu hon ahi zongin, kuamah in bangmah ciam thei lo ding, an ne thei lo ding, tui dawn thei lo ding uh hi.

⁸ Mihing le ganhingte in puanhampi silhin Pasianʼ tungah nakpi-in kiko ta uh hen. Mi khempeuh, a khialhnate uh le a gitlohnate uh panin kihei ta uh hen.

⁹ Eite i sih loh nadingin Pasian kisikin a hehna damsak lo ding hi, kua in ci thei na hi uh hiam?” a cisak hi.

¹⁰ Pasian in amauʼ hihnate mu a, a khialhna uh panin a kihei uh a muh ciangin kisik a, amau tungah hih dingin a cih sa siatna a tungsak nawn kei hi.