Johan 12 - Tedim Bible Revision 2017

Bethany khua ah Jesu Sathau Kinilh

¹ Paisan Pawi hun a tun ding ni guk in a sap ni-in sihna panin a thawhsak Lazaras a teenna Bethany khua ah va tung hi.

² Amaute in nitak an na vak uh a, Lazaras ahihleh Jesu tawh an ne-in tukhawmin, Martha pen an pia-in a manlah hi.

³ Tua laitakin Mary in a manpha mahmah nard sathau namtui thawl khat hong paipih a, Jesuʼ khe a nuh khit ciangin a sam tawh a nulsak hi. Tua inn sung khempeuh sathau namtui gim hong nam hi.

⁴ Tua laitakin Jesuʼ nungzuite sung panin amah a lehhek ding Judas Iskariot in,

⁵ “Bang hangin hih sathau namtui ngun peek za thumin kizuakin a sumte mizawngte tungah kipia zaw lo ahi hiam?” a ci hi.

⁶ Hih bangin kam a pauna pen mizawngte a khualna hang hi lo a, amah sumkem ahih manin a sumte gu-in a ututin a zang zel pa ahihna hang hizaw hi.

⁷ Tua ahih manin Jesu in, “Bangmah cih se dah un! Ama neih laite zong ka kivui cianga dingin kemsak hoh un.

⁸ Mizawngte pen note tawh hong om khawm niloh dinga, kei ka hih leh note tawh ka hong om khawm tawntung kei ding hi,” a ci hi.

Lazaras Thah A Kisawmna

⁹ Bethany khua ah Jesu a omna thu a zak uh ciangin mihon tampi hong pai uh hi. Jesu a mu nuamin hong pai hi bek lo uh a, Jesu in sihna panin a thawhsakkik Lazaras zong a mu nuam kawm uh ahi hi.

^10-11 Lazarasʼ hangin Jew mi tampite in amauʼ makaite taisanin Jesu um uh ahih manin siampi liante in Lazaras zong thah a sawm uh hi.

Gualzawhna tawh Jerusalem-a Lutna

¹² A zing ciangin Paisan Pawi a siim mihonpite in Jerusalem khua ah Jesu hong pai nading thu a za uh hi.

¹³ Tua ahih manin amah a dawn dingin Jerusalem panin mihonpi pai khia-in nisuh hiangte tawi kawmin, “Pasian phat un! Pasian in Topaʼ min tawh hong pai pa thupha pia tahen! Pasian in Israel Kumpipa thupha pia tahen!” ci-in a kiko uh hi.

^14-15 Lai Siangtho sungah, “Zion khua mite aw, lau kei un. En un, na kumpipa uh hong pai a, la no tungah hong tuang hi,” ci-in a kigelh mah bangin Jesu in la no khat mu ahih manin tua la no tungah a tuang hi.

¹⁶ Tua hun laitakin a nungzuite in hih thu a khiatna thei lo uh hi. Ahi zongin Pasianʼ pianzia nei-in Jesu a thawhkik khit ciangin Lai Siangtho in amah a gen ahihna le ama adingin hih bangin a piang ahihna thu a nung phawk uh hi.

¹⁷ Jesu in han sung panin Lazaras samin, sihna panin a thawhsakkik a mu mihonte in tua thu mah gen belin a nei uh hi.

¹⁸ Jesu in tua bang nalamdang lian a bawlna thu mihonte in za khin uh ahih manin amah a dawn dingin a pai uh hi.

¹⁹ Tua ciangin Farisi mite khatlekhat kiho uh a, “Bangmah i cih zo het kei hi. En un, mi khempeuh in amah a zui khinta uh ahi hi,” a kici uh hi.

Grik Mi Pawl khat in Jesu Zong

²⁰ Pawi hun sungin Pasian bia dingin Jerusalem khua ah a hong pai mite lakah Grik mi pawl khat a om uh hi.

²¹ Galilee gam Bethsaida khuami Filip kiangah amaute hong pai-in, “Sia aw, kote in zong Jesu ka mu nuam uh hi,” ci-in a gen uh ciangin

²² Filip in Andru kiangah a gen hi. Tua ciangin Andru le Filip pai khawmin Jesu kiangah a gen uh hi.

²³ Tua ciangin Jesu in, “Mihing Tapa in Pasianʼ pianzia a ngah ding hun hong tung ta hi.

²⁴ A mantakin ci lehang, mangbuh hum tang khat leilak ah kituhin si masa kei leh tang khat bek mah hi ngitnget hi; ahi zongin si masa leh tang tampi tak hong nei thei hi.

²⁵ Tua ahih manin hih leitung nuntakna a itte in a nuntakna taktak taanlawh dinga, hih leitung nuntakna a it lote in nuntakna taktak nei tawntung ding hi.

²⁶ Ka nasemte keima omna ah a om theih nadingin ka na a sem nuam peuhmah in kei hong zui ding uh a, ka Pa in ka na a sem mite a pahtawi ding hi,” a ci hi.

Mihing Tapa Kikhai Ding

²⁷ Tua khit ciangin Jesu in, “Tu-in ka lunggim mahmah hi. Bang cih ding ka hi hiam? ‘Pa aw, hih hun tawh hong kipelhsak in,’ ci ding ka hi hiam? Tua bang cih ding lah hih bang a thuak ding mahin a hong pai ka hi hi.

²⁸ Pa aw, nangma min thangsak ta in,” a ci hi. Tua ciangin vantung panin aw khat hong ging a, “Ka thangsak zo a, khatvei ka thangsakkik ding hi,” a ci hi.

²⁹ Tua kiim a ding mihonte in a awging za uh a, “Van ging bang hi,” a ci uh hi. Pawl khatte in, “Vantungmi in amah hopih hi,” a ci uh hi.

³⁰ Tua ciangin Jesu in, “Hih awging pen keima ading ngaihsutna hi lo a, note ading ngaihsutna-in hong ging hizaw hi.

³¹ Tu-in leitung thukhen ding hun hong tung ta a, hih leitung a ukpa kilawn khia ding hi.

³² Leilak panin kei hong kikhai toh ciangin ka kiangah mi khempeuh ka kai ding hi,” a ci hi.

³³ (Hih bangin a gen ciangin ama sihna ding zia a genna ahi hi.)

³⁴ Tua ciangin mihonte in, “Khris nungta tawntung ding hi, ci-in Thukham sungah kigen hi. Bang hangin Mihing Tapa kikhai to ding ci na hi hiam? Hih Mihing Tapa kua ahi hiam?” a cih uh ciangin

³⁵ Jesu in, “Note kiangah tawmvei sung khuavak hong om lai ding hi. Khuamial sungah a pai mi in a paina mun thei lo ahih manin khuamial in note hong phak loh nadingin khuavak na neih sungun na gamtat ngei uh zom paisuak un.

³⁶ Khuavak mite na suah theih nadingun khuavak na neih hun sungun tua khuavak um un,” a ci hi. Jesu in hih thu teng a gen khit ciangin pai khia-in amaute kiang panin a bu hi.

Jew Miteʼ Up lohna

³⁷ Amauteʼ muhin Jesu in hih nalamdang khempeuh a bawl hangin amaute in um lo uh hi.

³⁸ Kamsang Isaiah in, “Topa aw, kua in ka thugente um a, Topaʼ vangliatna kua tungah kilak ahi hiam?” ci-in a genna thu a tun nading ahi hi.

³⁹ Tua ahih manin amaute in um nuam lo uh hi. Bang hang hiam cih leh Isaiah mah in,

⁴⁰ “Amauteʼ natna ka damsak loh nadingin a mit un mu loin, a lungsim un a theihtheih loh nadingun amauteʼ mit ka tawsak a, a lungsim uh ka mawlsak hi, Pasian in ci hi,” ci-in zong na gen lai hi.

⁴¹ Isaiah in Jesuʼ neih Pasianʼ pianzia mu ahih manin hih bangin thu a gen ahi hi.

⁴² Tua bang hitaseleh Jew mi ulian tampi in Jesu a um uh hi. Ahi zongin Farisi mite in kikhopna inn panin a hawlkhiat ding lau uh ahih manin a kilangin gen khia ngam lo uh hi.

⁴³ Pasianʼ pahtak ding sangin miteʼ pahtak ding ut zaw uh ahih manin a tua ci om ahi uh hi.

Jesuʼ Thugente Thukhen Hi Ding

⁴⁴ Tua ciangin Jesu nakpi takin kiko a, “Kei hong um khempeuh in kei bek hong um hi loin kei hong sawl pa zong a um ahi hi.

⁴⁵ Kei hong mu khempeuh in kei hong sawl pa zong a mu ahi hi.

⁴⁶ Kei hong um mi khempeuh, khuamial sungah a om nawn loh nadingun leitung khuavak bangin ka hong pai hi.

⁴⁷ Ka thugenna za napi-in a zui lo mite tungah thu ka khen kei ding hi. Leitung mite mawhsakin thukhen dingin a hong pai ka hi kei a, a hon khia dingin a hong pai ka hizaw hi.

⁴⁸ Kei hong nialin ka thugen a sang lo mite in thukhen ding khat nei uh hi. Nitawp ni ciangin keima thugente pen amauteʼ thukhen ding ahi hi.

⁴⁹ Bang hang hiam cih leh keima utthu tawh thu a mawk gen ka hi kei a, kei hong sawl Pa Pasian in ka gen ding thu teng a hong piak ahi hi.

⁵⁰ Gen dingin a hong sawl thute in nuntak tawntung a piangsak thei ahihna thu ka thei hi. Tua ahih manin Pa in gen dingin a hong sawl teng bek a gen ka hi hi,” a ci hi.