Joel 2 - Tedim Bible Revision 2017

¹ Zion mual tungah peengkul tum unla, Pasianʼ mual siangtho tungah pataukohna tum un. Topa ni hong nai ta ahih manin gam sung mi khempeuh lau ta uh hen.

² Tua ni pen a mial, a lungzinhuai, meii kai-in khuazinʼ ni ahi ding hi. Mual tung a meiipi kai bangin sim zawh lohin kauphe honpi hong leeng muaimuai hi. Cikmahin hih bang thu omngei nai lo a, cikmah ciangin zong omkik nawn lo ding hi.

³ A madawkte, a hal tum thei meikuang bang a, a nungdalte, mei-am alh tawh kibang hi. Amau hong tun ma-in gam sungteng khempeuh Eden huan a bang hi a, amauʼ khit ciangin a kinusiacip keugaw gam tawh kibang hi. Amaute kiang pan a suakta bangmah om lo hi.

⁴ Amauteʼ mel sakolte tawh kibang a, sakol galkapte bangin a tai uh hi.

⁵ Mual tung tengah a tuan zuazua laitakun sakol leeng ging zuazuate le gamlak a lopa omte kaangin a puak ziazua tawh kibang uh a, galsim dingin a kithawi, galkap honpi tawh kibang uh hi.

⁶ Amaute hong pai ciangin mi khempeuh lau uh a, a maitang uh daang gawp hi.

⁷ Galte bangin hong sim uh a, galkapte bangin kulh tungah hong kah uh hi. A vekpi-in tangtakin mai hong nawt uh a, a hong heem pai kuamah om lo hi.

⁸ Amauʼ lampi san ciat hong tawn uh a, a kiphu kha kuamah om lo uh hi. Amau mah dal nadingin a kibawlte hong phu gawp uh a, khawl het loin hong paisuak uh hi.

⁹ Khuapi sung hong kidenna uh a, kulh tung khawngah tai zaizai uh hi. Inn tung khawngah kah to ngeingai uh a, gutate bangin tawlet ah hong lut uh hi.

¹⁰ Amauʼ mai ah leipi liing a, vanpi nangawn liing damdam hi. Ni le kha zong mial ta a, aksite zong taang nawn lo hi.

¹¹ Ama mihonpite tam mahmah uh ahih manin amaute thu pia-in a mai uh ah Topa awng a, ama thupiakna bangin a semte hat mahmah uh hi. Topaʼ ni ding kihtakhuai mahmah ahih manin a thuak zo ding kua om ding ahi hiam?

Topaʼ Hehpihna

¹² Topa in hih bangin ci hi: “Tu mahmah nangawnin lungsim tak tawh kisikkikin, an tangin, kapin, thumna tawh kei kiangah hong paikik un.

¹³ Na dah taktakna uh lungkhamna tawh langsak unla, na puante uh a bal kek bek hi kei un,” hong ci hi. Topa, noteʼ Pasian kiangah ciahkik un. Amah migi mahmah in hehpihna a nei hi a, a lungduai-in hong huh nuam tawntung a, gim hong pia loin hong maisak nuam tawntung hi.

¹⁴ Topa, eiteʼ Pasian in a lungsim hong kheelin an hauhsakna tawh thupha hong pia kha ding hi. Tua hileh ama tungah an le leenggahzu tawh biakna i pia thei ding hi.

¹⁵ Zion mual tungah peengkul tumin antanna ding thu pia unla, biak kikhopna khat nei un.

¹⁶ Mite kaikhawm unla, amaute siansuah un. A khangham mite sam unla, naupangte zong kaikhawm un. Nawi ne lai naungekte zong paipih un. A kiteeng cil nungak le tangvalte nangawn in a omna uh nusia-in hong pai uh hen.

¹⁷ Topaʼ na a sem siampite, biakinn sung innliim le biakna tau kikalah kapin thu ngen uh henla, “Topa aw, na mite hong hehpih in. Minam dangte in, ‘Na Pasian uh koi ah om ahi hiam,’ ci-in kote hong simmawhsak kei in. Amauteʼ nuihsatin kote hong omsak kei in,” ci uh hen.

Pasian in Leitang Hoihsakkik

¹⁸ Tua ciangin Topa in ama leitang hong donin, ama mite hong hehpih hi.

¹⁹ Topa in ama miteʼ thungetna dawng a, “Tu-in note tungah an, leenggahzu le sathau kong pia a, na kham takun na ne ding uh hi. Minam dangteʼ simmawhin na om nawn kei ding uh hi.

²⁰ Leilu lam gam panin a hong pai mite, note kiang panin sehnel gamah ka hawl khia dinga, a madawkte uh nisuahna tuipi sungah khia-in, a nungdalte uh nitumna tuipi sungah ka khia dinga, amaute in note tungah hong bawlna hangin a luanghawmte uh uih gawp ding hi.

²¹ “Lote aw, lau nawn kei unla, lungdam kipakin om un. Topa in note adingin a lianpi hong bawlsak zo hi.

²² Ganhingte aw, lau nawn kei un. Gam sung tengah lo no ta a, singkungte gah ta-in, theigah le leenggah tampi a om hi.

²³ “Zion mite aw, kipak unla, Topa na Pasian uh tungah lungdam ta un. Note in an na hauh theih nadingun nidang a bangin khuapi guah, tuk guah le phalbi guah, a hoihbek zah hong zusak hi.

²⁴ Na ancilna phual uh an tawh kidim dinga, na koihna uh umlebeel khempeuh leenggahzu le sathau tawh kidim ding hi.

²⁵ Note a hong sim dingin ka hong sawl kauphe honpi, a tuan kauphe, a susia kauphe, a pettan kauphe, hih ka galkap honte in a hong neksak kum sungin a piang ding teng tang kong piakik ding hi.

²⁶ Tu-in nek ding tampi nei-in na gil uh vah dinga, note adingin a lamdang nate a hong bawlsak Topa na Pasian uh na phat ding uh hi. Tua ciangin ka mite hong kisimmawh nawn lo ding hi.

²⁷ Tua ciangin no Israel mite lakah kei ka omna thu, keimah Topa pen noteʼ Pasian ka hihna thu, kei sim loh kuamah dang a om lohna na thei ding uh hi. Ka mite hong kisimmawh nawn lo ding hi.

Pasianʼ Kha A Kisunna

²⁸ “Tua khit ciangin mi khempeuh tungah ka kha ka sung dinga, na puteekte un mang manin na tangvalte un maang mu ding uh hi.

²⁹ Tua hun ciangin nasem numei le nasem pasalte tung nangawn ah ka kha ka sung ding hi.

³⁰ “Tua ciangin vantung le leitungah hilhkholhna lim ahi, sisan kiluansakna, meikatna le meikhu lompi hong om ding hi.

³¹ Topaʼ ni, tua a lauhuai hun a hong tun ma-in ni hong mialin, kha, sisan hong bang ding hi.

³² Ahi zongin Topaʼ tungah huhna a ngen khempeuh in hotkhiatna a ngah ding uh hi. Topaʼ gen sa bangmahin Zion Mual le Jerusalem khua sungah a suakta mi om ding uh hi. Topa in a teel mite, suakta ding uh hi.