Joel 1 - Tedim Bible Revision 2017

Kauphe in Gam sung a Suksiatna

¹ Pethuelʼ tapa Joel tungah hih bangin Topaʼ thu hong tung hi:

² No khangham zaw diakte aw, ngai un; Judah gam mi khempeuh aw, na bil uh ngat un. Noteʼ khan sung ahi a, na pu na pate uh khan sung ahi zongin, hih bang thu piang ngei peuhmah ahi hiam?

³ Hih thute khempeuh na tate uh kiangah gen unla, na tate un amauʼ tateʼ tungah na gen sawn uh henla, amaute in a khangsawnte tungah na gen sawn leuleu uh hen.

⁴ A pettan kaupheteʼ nek bang teng, kauphe honte in ne tum a, kauphe honteʼ nek bang teng, a tuan kauphete in ne tum a, a tuan kaupheteʼ nek bang teng, a susia kauphete in ne mangkhin uh hi.

⁵ No zukhamte aw, tho unla kap un. No leenggahzu nete aw, thumin tau un. Na zunek ding teng uh bei mang khinta hi.

⁶ Kauphe honpi in i gam hong sim a, amaute tam mahmah uh a, hat mahmah uh hi. A ha uh humpinelkai ha bangin hiam a, humpi-nelkaipi ha bangin gupha mahmah hi.

⁷ Amaute in i leenggui teng susia mangkhin a, i theikung teng khempeuh ne tum mangkhin uh hi. A hawng khempeuh ne tum uh a, a hiangte kang sengsang hi.

⁸ Nungak khat, a teenpih ding a lawmpa in a sihsan ciangin a kah bangin note zong kapin thum un.

⁹ Topaʼ biakinn ah biakna-in piak ding an le leenggahzu om nawn lo a, Topaʼ na a sem siampite thumin a tau uh hi.

¹⁰ Lo ante kisusia a, leengguite keutum hi. Oliv kungte keugaw a, lo lai ah bangmah om nawn lo ahih manin leitang lungzuangin a thum hi.

¹¹ Lokhote aw, dah un; leenggui ciingte aw, kap un; mangbuh le mangbuhham, lo an khempeuh a bei ta hi.

¹² Leengguite keu a, theikungte vuai ta hi. Mang kawlsingte, nisuhte, epel kungte a kipan singkung khempeuh keu mangkhin hi. Mihingte a lungdamna ding teng zong a maimang ta hi.

¹³ Siampite aw, puanhampi silhin kap un; biakna tau-a nasemte aw, thumin tau un. Ka Pasianʼ na a semte aw, biakinn sungah tum unla, zan thapai-in dahna lim puanhampi silh un. Noteʼ Pasianʼ biakinn sungah piak ding an le leenggahzu khat zong om nawn lo hi.

¹⁴ An tan ding thu pia unla, a thupi biak kikhopna bawl un. Noteʼ Topa Pasianʼ biakinn sungah makaite le gam mi khempeuh kaikhawm unla, Topaʼ tungah kiko-in thum un.

¹⁵ Kalai! A hun hong nai ta! Topaʼ ni hong nai ta a, Vanglian paʼ suksiatna hun hong nai ta hi.

¹⁶ Eima muh mahmah in lo ante kisusia a, eiteʼ Pasianʼ biakinn sungah lungdamna a bei ta hi.

¹⁷ Guahtui om lo ahih manin khai kituhte khempeuh lei sungah keucip a, an khol ding bangmah om nawn lo ahih manin ansalte khempeuh a vekin kisia khinta hi.

¹⁸ A gilkial tuu le bawngte cimawhin tau uh a, lo nona mun om nawn het lo ahih manin ganhing honte cimawh uh a, tuuhonte in zong haksatna thuak uh hi.

¹⁹ Topa aw, nangma tungah kong kiko hi. Bang hang hiam cih leh mei in a kattum tawh kibangin, lo nona leitang khempeuh le singkung khempeuh keu mang khinta hi.

²⁰ Luitui luang khempeuh kangcip khinta a, meiʼ kattum bangin lo nona khempeuh keucip khin ahih manin nangma tungah gamsate nangawn hong kiko uh hi.