Jeremiah 51 - Tedim Bible Revision 2017

Babylon Tungah Topaʼ Thukhenna

¹ Topa in a cih in ah: “En un, Babylon khuapi le Khaldea mite a susia dingin keimah in huih ka nungsak ding hi.

² A zapsiang ding mi Babylon ah ka sawl dinga, amaute in tua gam a zapsiang ding uh hi. Gimna ni hong tun ciangin amah a sim dingin mun khempeuh panin hong pai ding uh a, gam sungah bangmah a omsak nawn kei ding uh hi.

³ Thaltawite a thal uh lawnsak man kei unla, sik puan silhte dingsak man kei un. A tangvalte uh maap kei unla, a galkap honpi khempeuh uh nuai mangkhin un.

⁴ Khaldea gam kongzing lakah liam gawp ding uh a, a si ding uh hi.

⁵ Bang hang hiam cih leh Israel le Judah mite Israel miteʼ Siangtho Pa tungah a khialh uh hangin, amauteʼ Pasian, Vanglian Topa in amaute taisan nai lo hi.

⁶ Babylon khuapi sung panin tai khia un. Mi khempeuh kisuahtak ciat un. Babylonʼ mawhna sihpih kei un. Bang hang hiam cih leh a mawhna bangun a thuak nadingun Topaʼ thuhkik hun ahi hi.

⁷ Babylon khuapi, Topaʼ khut sungah a om kham hai tawh kibang a, leitung buppi zu a khamsak hi. Gamdangte in a zu a dawn manun a hai khin uh hi.

⁸ Thakhat thu-in Babylon puk a, kisia gawp hi. Ama adingin kap un. A liammate adingin zatui la un, dam zo kha thei lai ding hi.

⁹ Ahi zongin midangte in, ‘Babylon khua i damsaknop hangin a dam zo ding hi nawn lo hi. Nusia ta unla, i gam ciat zuanin ciah ni. Ama tunga thukhenna in vantung dong ban khinta a, van dawn dong a pai to hi,’ a ci uh hi.

¹⁰ “Keima mite in, ‘Topa in thuman ihihna hong kilangkhiasak zo hi. Hong pai un, Topa Pasianʼ nasepna Zion khua ah va taangko ni,’ a ci uh hi.

¹¹ Thaltangte hiam un. Lumte la un. “Topa in Babylon khua susia nuam ahih manin Media kumpite a hanthawn hi. Bang hang hiam cih leh hih pen a biakinnpi hangin Topaʼ thukkikna ahi hi.

¹² Babylon khua kulhpi tungah dial khai unla, galvil ding tampi koih un. Cingsak unla, galte a buk sim dingin kithawi un. Bang hang hiam cih leh Babylon khua mite tawh kisai-in Topa in a gen sa teng a geel khinzo a, a sem khinzo hi.

¹³ Aw, tui tamna gei ah a teeng mite, sum a hau note aw, na hun uh bei ta a, na nuntakna khau uh kitat ta hi.

¹⁴ Vanglian Topa in, ‘Kauphe zahin a tam mite kong simsak dinga, amaute in note hong zo-in a kiko ding uh hi,’ ci-in keima min tawh ka kiciam khinzo hi.

¹⁵ “Pasian in ama vangliatna tawh leitung bawl a, ama pilna tawh leitung piangsakin, ama siamna tawh vantung a zal hi.

¹⁶ Amah a pau ciangin vantungah tuite ging huhu a, leimong panin tui khu a suaksak hi. Guah zuk nadingin khua phiasak a, a saal sung panin huih a nungsak hi.

¹⁷ Mi khempeuh hai-in pilna nei lo hi khin uh a, kham seekte khempeuh in a milim uh a maizumlawh uh hi. Bang hang hiam cih leh a milim uh zuau hi lel a, nak thei lo hi.

¹⁸ Kimanna a nei lo, a haihuaipi hi a, gim a kipiak ni ciangin a kisia ding uh hi.

¹⁹ Jakobʼ Pasian tua bang hi lo a, na khempeuh a piangsak pa ahi hi. Ama adingin Israel mite teel a, ama min pen Vanglian Topa ahi hi.

²⁰ “Babylon aw, nang pen ka sekpi le ka galhiam na hi a, nang hong zangin gamdangte ka satnen a, kumpi gamte ka susia hi.

²¹ Nang hong zangin sakolte le a tunga a tuangte, sakol leengte le a hawlte,

²² papite le nupite, khanghamte le khangnote, tangvalte le nungakte,

²³ tuucingte le a tuute, lokhote le a tute, kumpite le ukpite ka satnen hi.

²⁴ “Topa in kong cih in ah, Babylon khua le Khaldea gamah a teengte khempeuh in Zion khua ah siatna a bawl manun noteʼ muhna ah ka thuk ding hi.

²⁵ “En in, mualpi bangin lian a, leitung khempeuh a susia zo Babylon aw, nang kong langpan hi, Topa in kong ci hi. Keimah in nangʼ lang khat ah ka khut ka zan dinga, mual dawn panin nang hong khuk khia-in, kong kaang tumsak ding hi.

²⁶ Na suangte innkiu suangin a kiciang kei dinga, inn bul suang nuaiphahin a kizang kei ding hi. A tawntungin gam simtham na suak ding hi, Topa in kong ci hi.

²⁷ “Gal a sim dingin leitung bup thu pia unla, gamdangte kiangah peengkul mut un. Amah a sim dingin kithawisak un; Ararat, Minni le Ashkenaz gamte simsak un. Makai khat teel unla, kauphe honpi zahin a tam sakolte va la un.

²⁸ Amah a sim dingin gamdangte kithawisak un. Media kumpipa, a makaite, le a ukna gam khempeuh kithawisak un.

²⁹ Babylon gam in na sa-in, kitomin a liing hi; bang hang hiam cih leh ama tungah Topaʼ ngimna tangtung a, Babylon gam gam simtham suaksak a, kuamah a tengsak kei hi.

³⁰ Babylon galkapte in do nawn lo uh a, a phualpi uh ah a khawl uh hi. A tha uh om nawn lo a, numei tawh a kibang uh hi. A innte uh kihalsak a, a khua kongpi a kikalhna siktawnte a kitan hi.

³¹ Babylon kumpipa kiangah thu a ko dingin a hong pai kamtaite a ciah leh a kuan kiphamat uh a, ‘Mun khempeuh panin galte in Babylon khua hong simin,

³² gun-a ngahmun teng la khin mang uh a, galpanna teng mei tawh kihalin, galkapte lau mahmah uh hi,’ a ci uh hi.

³³ Vanglian Topa, Israel-teʼ Pasian in ka hong genin ah, Babylon mite tawl khat khit ciangin an lak bangin kila dinga, sual tunga ancil bangin a kicil gawp ding hi.

³⁴ “Babylon kumpipa Nebukhadnezzar in Jerusalem khua hong valh tumin, hong sukham gawp hi. Beel hawm bangin a hawmin hong koih a, gulpiʼ valh bangin hong nawmvalh hi. Ka neihsa a lim nono tawh amah kivak kham a, kei a hong hawl khia hi.

³⁵ Keiʼ tung le ka mipihte tungah hong kibawl ngongtatna Babylon mite tungah tung tahen, ci-in Zion khua ah a teengte in gen ta uh hen. Khaldea mite in ka thuakna teng thei tahen, ci-in Jerusalem khua in gen tahen.

³⁶ “Tua ahih manin Topa in kong cih in ah: En un, na thu uh ka hong sepsak dinga, note adingin ka hong thuksak ding hi. A bual ka keusak dinga, a ciktui ka kangsak ding hi.

³⁷ Tua ciangin Babylon khuapi innsia losia suak gawp dinga, se-alteʼ teenna mun suakin, a lipkhaphuai, simmawhna tawh a kiphitsan, kuamah a ten lohna gam khing a suak ding hi.

³⁸ Babylon mite humpinelkai bangin a hawk khawm ding uh a, humpinelkai no bangin a ciak lualua ding uh hi.

³⁹ A duh mahmah laitakun amaute ka vak dinga, khua a phawk nawn loh dong uh zu ka khamsak ding hi. A tawntungin ihmu paisuak ding uh a, a khanglo nawn kei ding uh hi, Topa in kong ci hi.

⁴⁰ Gawh dingin a kipaipih tuuno bangin ahi a, tuutal le keeltal bangin ahi zongin amaute ka paipih suk ding hi.

⁴¹ “Leitung bup in a pahtawi Babylon khuapi kila ta hi. Gamdangteʼ lakah Babylon khua, a mulkimhuai a suakta hi.

⁴² Babylon gamah tuipi hong kah to a, tuihual lauhuaite in a tum ta hi.

⁴³ A khuapite a mulkimhuai suak a, lei keuna sehnel gam a suak khinta hi. Gam sungah kuamah teeng lo a, kuamah in kantan ngei lo hi.

⁴⁴ Babylon khuateʼ pasian Bel zong gim ka pia dinga, a na guk sa teng ka lak khiatsakkik ding hi. Gamdangte in amah bia nuam nawn lo ding uh hi. Babylon khua kulhpi kicim khinta hi.

⁴⁵ Ka mite aw, amaute lak pan hong paikhia un. A lauhuai Topaʼ hehna panin mi khempeuh kisuahtak ciat un.

⁴⁶ Gam sungah kamdawn a kigen sawnte hangin lungkia kei un; lau kei un. Kum khatin thu khat kigen a, a kum kik ciangin thudang khat kigen lel hi. Gam sungah ngongtatna thu om a, kumpi khat le kumpi khat kidona thu kigen thei hi.

⁴⁷ Tua ahih manin en un, Babylon khua-a milimte gim ka piak hun hong tung ding hi. A gam buppi ka zumhuaisak dinga, khua sungah kithatin a tuk ding uh hi.

⁴⁸ Tua ciangin vantung, leitung, le a sunga om nate khempeuh in Babylonʼ hangin lungdamin la a sa ding uh hi. Bang hang hiam cih leh leilu lam panin amaute a susia ding mi hong pai ding uh hi, Topa in kong ci hi.

⁴⁹ Babylon khua in leitung khempeuh ah mite a sihsak mah bangin tu-in amah in sihna a thuak ding hi.

⁵⁰ “Namsau in a hong thah khak loh a nungta lai note aw, pai un; dingding kei un. Gamlapi pek panin Topa hong phawk unla, Jerusalem khua zong mangngilh kei un.

⁵¹ Note in, ‘Kote in maizumna ka thuak uh a, simmawhna kam ka za khin uh hi. Min siatna in ka maitang uh hong tuam khin hi. Bang hang hiam cih leh Topaʼ biakinn siangtho gamdang mite in a hong laksak uh hi,’ na ci uh hi.

⁵² Tua ahih manin en un, Topa in kong cih in ah, Babylon khua ah a om a milimte uh tungah thu ka khen ni hun hong tung dinga, gam sung khempeuh ah a liamte a tau ding uh hi.

⁵³ Babylon khua vantungah kah to thei a, a sangpi ah kip takin galdalna a bawl thei ahi zongin, Topa in kong cih in ah, keiʼ kiang panin amah a suan khia ding mi a hong pai teitei ding hi.

⁵⁴ “Ngai un! Babylon khua ah mi kiko hi. Khaldea gam sung mite a kisuksiatna kahna awging ahi hi.

⁵⁵ Bang hang hiam cih leh Topa in Babylon khua maimangsak a, a gamlumna zong a daisak hi. Galte, tuihual lum henhan bangin hong lut uh a, awng gawpin, a gamlum henhan uh hi.

⁵⁶ Babylon khua a susia ding mi khat hong pai khinzo hi. A galkapte uh kiman khin a, a thalte uh a tum a tel suak khin hi. Bang hang hiam cih leh Topa, a thukkik thei Pasian hi a, a thukkik taktak ding hi.

⁵⁷ A kumpi uliante le a mipilte uh a kipan ukpite, uliante le galkapte, zu ka khamsak dinga, a tawntungin ihmu-in a khanglo nawn kei ding uh hi, ci-in Vanglian Topa a kici kumpipa in kong gen hi.

⁵⁸ Vanglian Topa in ka hong genin ah: Babylon khua kulhpi sah mahmah in a muanhuai mahmah leilak ah cim suk dinga, a sang mahmah khua kongpite zong mei tawh kihal tum ding hi. Miteʼ nasepna a mawkna suak a, minamteʼ hanciamnate vutlevai a suak hi,” a ci hi.

⁵⁹ Neriahʼ tapa, Mahseiahʼ tupa Seraiah pen Zedekiah kumpipaʼ thuvaan pa ahi hi. Kumpi Zedekiah in Judah gamah a uk zawh kum li ciangin Seraiah le kumpipa Babylon ah a pai uh hi. Tua hun laitakin keimah in Seraiah thu ka vaikhak hi.

⁶⁰ Keimah in Babylon khua tawh kisai-in Babylon khua ah a tung ding gimna khempeuh laibu khat sungah ka gelh hi.

⁶¹ Seraiah kiangah, “Babylon khua na tun ciangin hih thute khempeuh na sim dinga,

⁶² tua khit ciangin, ‘Topa aw, hih munah mihing hitaleh ganhing hitaleh bangmah teeng loin, a tawntungin a kinusia a suah nadingin na suksiatna ding na gen khinzo hi,’ ci-in thu ngen in.

⁶³ Hih laibu sunga thute miteʼ zakin na sim khit ciangin suang khat tawh hen khawm inla, Eufratis gun sungah paai in. Tua khit ciangin,

⁶⁴ ‘Babylon khuapiʼ gitlohna hangin a tungah gimna ka tungsak dinga, tu-a bangin Babylon khuapi zong tum sukin a hong dawkkik to nawn kei ding hi,’ ci-in gen in,” ka ci hi. Jeremiahʼ thugenna tu-a ciang ahi hi.