Jeremiah 47 - Tedim Bible Revision 2017

Filistia Miteʼ Thu Gen kholhna

¹ Faro kumpipa in Gaza khua a sim ma-in Filistia mite tawh kisai-in Topa in kei tungah thu hong gen hi.

² Topa in a hong genin ah, “En un, leilu lam panin tui hong khang dinga, hong let khia-in hong luang ding hi. Gam sung le gam sunga om khempeuh hong tum dinga, khuapi le a sunga teeng khempeuh hong tum ding hi. Mite kiko ding uh a, gam sunga om mi khempeuh a kap ding uh hi.

³ Sakol khegingte za-in, sakol leeng gingte le a pei kigawite a zak uh ciangin, a khut uh zaw lua ta ahih manin pate in a tate uh a don zo nawn kei ding uh hi.

⁴ Filistia mi khempeuh kisia-in, Taia le Sidon panin huhnate khaktanin, suksiat ding ni hong tung ta hi. Bang hang hiam cih leh Topa keimah in Filistia mite le Kaftor tuipi gei ah a omlaite ka susia ding hi.

⁵ Gaza khuate maizum ta uh a, Ashkelon khua kisia ta hi. Aw, no Anak mi a omlaite aw, bang tanvei no le no kisu liam ding na hi uh hiam?

⁶ Note in, ‘Topaʼ namsau aw, tawlnga nai lo ding na hi hiam? Na paai sungah lutkik inla, taang loin khawl dide in,’ na ci uh hi.

⁷ Topa in ka sawl nakleh bangci-in khawl dide thei ding ahi hiam? Ashkelon khua le tuipi geiteng a sim dingin ka sawl sa ahi hi,” a hong ci hi.