Jeremiah 45 - Tedim Bible Revision 2017

Baruk Tungah Jeremiahʼ Thugenna

¹ Josiahʼ tapa Jehoiakim, Judah gamah kumpi a suah zawh kum li a cin ciangin Neriahʼ tapa Baruk in laibu khat sungah keima gen bangbang a gelh hi. Tua ahih ciangin Baruk kiangah,

² “Baruk aw, Topa, Israel miteʼ Pasian in nang hong hopih hi.

³ Nangmah in, ‘Gimna thuak ing! Bang hang hiam cih leh Topa in ka dahna le ka natna hong behlap hi. Ka tautauna-in ka gim khinzo a, ka tawlnga thei kei hi,’ na ci hi.

⁴ “Topa in nang tungah hih bang a gen dingin hong sawl hi: En in, keimah in ka lam sate ka phelkik a, ka phuh sate ka bot khiakik hi. Keimah in leitung buppi tua bangin ka hih ding hi.

⁵ Tua sung panin nang a peng thei tuam dingin kingaihsun na hi hiam? Tua bangin kingaihsun kei in; bang hang hiam cih leh en in, Topa in kong cih in ah, mi khempeuh tungah gimna ka tungsak ding hi. Ahih hangin nang pen na paina mun khempeuh ah kong suaktasak liailiai ding hi, ci hi,” ka ci hi.