Jeremiah 28 - Tedim Bible Revision 2017

Hananiahʼ Zuau Thuhilhna

¹ Tua kum mahin (Judah gamah Zedekiah kumpi a suah zawh kum li le kha nga a phak kum) Gibeon khua panin a hong pai Azzurʼ tapa kamsang Hananiah in Topaʼ biakinnpi sungah siampite le mi khempeuh a omkim laitakin hong hopih a,

² “Vanglian Topa, Israel miteʼ Pasian in hong genin ah: Babylon kumpipaʼ vangliatna ka susia khin hi.

³ Kum nih sungin Babylon kumpipa Nebukhadnezzar in hih mun pan la khia-in Babylon khua ah a puak, Topaʼ biakinnpi sunga beelte hih munah ka lakik ding hi.

⁴ Jehoiakimʼ tapa Judah kumpi Jehoiakhin le Judah gam panin Babylon ah salin a paite khempeuh zong hih munah ka lakik ding hi, Topa in hong ci hi. Bang hang hiam cih leh Babylon kumpipaʼ vangliatna ka susia ding hi, ci hi,” a hong ci hi.

⁵ Tua ciangin Topaʼ biakinnpi sungah dingin a om siampite le mi khempeuhte a omkim laitakin keimah Jeremiah in Hananiah ka hopih a,

⁶ “Amen! Topa in tua na gen bangin hong sem tahen. Topa in na thugen kholhna bangin hong tungsak henla, Babylon khua panin Topaʼ biakinnpi sunga beelte le salin a kimante khempeuh hih lai munah hong lakik tapeuh hen!

⁷ Ahi zongin tu-in nang le mi khempeuhteʼ zakin kong gen ding hih thu na ngai ta un.

⁸ Nang le keiʼ ma-in a om, tanglai-a kamsangte in gam tampi le gam lianteʼ tungah gal ahi zongin, kial ahi zongin, pulnatna ahi zongin hong tung ding hi, ci-in a gen khol zo uh hi.

⁹ Ahi zongin, nopna hong tung ding hi, ci-in a gen kamsang pa pen Topaʼ hong sawl kamsang pa hi taktak hiam, cih kamsang paʼ gen bang hong tun ciangin a kithei pan ding ahi hi,” ka ci hi.

¹⁰ Tua ciangin kamsang pa Hananiah in ka ngawng panin ka hakkol hong lak khiatsakin hong kuaihtansak hi.

¹¹ Hananiah in zong mi khempeuh a om laitakin thu gen a, “Topa in, tu-a bangin Babylon kumpipa Nebukhadnezzarʼ vangliatna kum nih sungin gam khempeuhteʼ tung panin ka beisak ding hi, ci hi,” ci-in a gen hi. Tua ciangin kei ka paikhia hi.

¹² Kamsang pa Hananiah in ka ngawng panin ka hakkol la khia a, hong kuaihtansak zawh tawl khat khit ciangin Topa in kei hong hopih a,

¹³ “Pai inla Hananiah kiangah, ‘Topa in hih bangin hong ci hi: Nangmah in sing tawh kibawl hakkol na kuaitan zo hi. Ahih hangin keimah in sik tawh kibawl hakkol khat tawh ka laih ding hi.

¹⁴ Bang hang hiam cih leh Vanglian Topa, Israel miteʼ Pasian in hong genin ah: Hih gam khempeuhteʼ ngawng ah sik hakkol ka thuah khinzo a, amaute in Babylon kumpipa Nebukhadnezzarʼ na a sem ding uh hi. Bang hang hiam cih leh gamsate nangawn ama tungah ka pia khinzo hi, ci hi,’ va ci in,” hong ci hi.

¹⁵ Tua ciangin kei zong kamsang Hananiahʼ kiangah, “Na ngai in, Hananiah! Topa in nang hong sawl lohpi, hih mite zuau thu na umsak hi.

¹⁶ Tua ahih manin Topa in a hong genin ah: ‘En in, hih leitung panin nangmah hong la khia ding hi. Topa langpanna thu gen na hih manin tu kum sung mahin na si ding hi,’ hong ci hi,” ka ci hi.

¹⁷ Tua kum mah a kha sagih kha-in kamsang pa Hananiah a si ta hi.