Jeremiah 21 - Tedim Bible Revision 2017

Jerusalem A Siat Ding Kigenkhol

¹ Zedekiah kumpipa in Malkhiahʼ tapa Pashhur le Maaseiahʼ tapa Zefaniah te, Jeremiah kiangah sawl a,

² “Kote adingin Topaʼ kiangah thu hong dotsak in. Babylon kumpipa Nebukhadnezzar in a sim dingin hong umcih hi. Topa in a nalamdangte khat keiʼ tungah hong zang leh amah kilehkiksak thei kha ding hi,” ci-in a dongsak hi.

³ Tua ciangin Jeremiah in dawngkik a,

⁴ “Zedekiah kiangah hih bangin na genkik un, ‘Topa, Israel miteʼ Pasian in a genin ah: En un, khua kulhpi pua lamah a hong umcih Babylon kumpipa le Khaldea mite na dona uh ahi, na khut sung uh a na kep na galhiamte uh bangmahin a kimang lo ka suaksak dinga, amaute khempeuh hih khuapi laizang ah kong paipih ding hi.

⁵ Kei mahmah in hehna le thangpaihna lianpi tawh ka khut zanin, a hat mahmah ka khut tawh note kong do ding hi.

⁶ Hih khuapi sungah a teengte a mi a sa ci loin ka that lum dinga, pulnatna tawh a bei khin ding uh hi.

⁷ Tua khit ciangin, Topa in kong cih in ah, Judah kumpipa Zedekiah le a nasemte le pulnatna, namsau le kialin a si lo a nungta lai teng pen, amauʼ galte le amaute a that nuam Babylon kumpipa Nebukhadnezzarʼ khut sungah ka pia ding hi. Amah in amaute namsau tawh that dinga, hehpih loin, zong a maap kei dinga, itna lungsim a nei kei ding hi,’ va ci un,” a ci hi.

⁸ Topa in Jeremiah hopih a, “Jeremiah aw, hih mite kiangah, ‘Topa in a cih in ah: En un, na mai uh ah nuntakna lampi le sihna lampi ka khung hi.

⁹ Hih khuapi sunga om mi peuhmah namsau tawh ahi a, kial tawh ahi a, pulnatna tawh ahi zongin a si ding uh hi. Ahi zongin pusuak khia-in note a hong sim Khaldea mite kiangah a lut peuhmah suakta liailiai ding uh hi.

¹⁰ Bang hang hiam cih leh Topa in kong cih in ah, hih khuapi hoih nading hi lo, a siat nadingin ka lungsim ka khensat khinzo hi. Babylon kumpipaʼ khut sungah ka pia dinga, amah in mei tawh a hal ding hi,’ na ci ding hi.

Judah Kumpite Tungah Thupiang dingte Gen kholhna

^11-12 “Judah kumpiteʼ innkuan tungah hih bangin va gen in: Davidʼ suante aw, Topaʼ kammal ngai dih un. Topa in a cih in ah: Zingsang simin mantakin thu khen unla, mi bawlsia paʼ khut sung pan a bawlsiat pa hon khia un. Tua bang na hih kei uh leh siatna na bawlnate hangun mei bangin ka hehna hong kuang dinga, kuamah in a phelh zo kei ding hi.

¹³ Mualkuam zang pan kilaam to a, zanglei lak a suangtum bangin a sang to Jerusalem aw, Topa in kong cih in ah, na lang khat ah ka pang ding hi. Nangmah in, ‘Kua in kei hong sim suk dinga, ka omna ah kua hong lut ding ahi hiam?’ na ci hi.

¹⁴ Na gamtatna tawh kizui-in gimna kong pia ding hi, Topa in kong ci hi. Tu lak a sing hoihte tawh a kilam na kumpi innte uh mei tawh kihal dinga, a kimkot khempeuh ka kaang tumsak ding hi,” a ci hi.