Isaiah 8 - Tedim Bible Revision 2017

Kamsang paʼ Tapaʼ Min

¹ Tua ciangin Topa in kei kiangah, “Suangpek lianpi khat la inla, tua tungah mihingteʼ theihkim lai tawh, ‘Maher-shalal-hash-baz,’ ci-in gelh in,” hong ci hi.

² Hih thu a thei dingin a muanhuai teci, siampi ahi Uriah le Jeberekhiahʼ tapa Zekhariah ka nei hi, hong ci hi.

³ Tua ciangin ka zi tawh ka lum khawm a, amah gai-in tapa khat hong nei hi. Tua ciangin Topa in ka tungah, “Ama min pen Maher-shalal-hash-baz, ci-in phuak in.

⁴ Bang hang hiam cih leh naungek in, ‘Nu aw, pa aw,’ a cih theih ma-in Damaskas khuaʼ hauhna le Samaria khua sunga a om a kisut vante, Assiria kumpipa in la-in masuan ding hi,” hong ci hi.

⁵ Topa in kei tungah thu hong genkik leuleu a,

⁶ “Hih mite in dam takin a luang didi Shiloah tuite nial uh a, Rezin le Remaliahʼ tapaʼ mai ah launa tawh liingliang uh hi.

⁷ Tua ahih ciangin Topa in Assiria kumpipa le ama galkap honpite, a tam mahmah a piau dimletin a khang Gunpi tui bangin amaute a sim dingin hong luangsak ding hi.

⁸ Judah gam dong hong nawt suk dinga, dimletin paisuakin, ngawng ciang dong tum ding hi,” hong ci hi. Ahih hangin Pasian in eite hong ompih a, a kizal ama khate in i gam hong hu ding hi.

⁹ No minam dangte aw, thei unla, lungkham un. Gamlapi ah a om gamte khempeuh aw, ngai un. Kigalging un; ahih hangin lungkiatna na thuak veve ding uh hi.

¹⁰ Note kikhawmin thu na vaihawm uh hangin a mawkna suak dinga, thu khat peuhpeuh na gen uh hangin kip lo ding hi. Bang hang hiam cih leh kote tawh Pasian hong om khawm hi.

Topa Na Zahtak pa Hisak In

¹¹ Bang hang hiam cih leh Topa in ama vangliatna tawh kei tungah thu hong gen a, hih miteʼ lampi ka zuih loh nadingin hong hilh khol a,

¹² “Hih miteʼ vaihawmna pawlpih kei un. Amauʼ kihtakte kihta kei unla, lau kei un.

¹³ Ahih hangin Vanglian Topa pen a siangtho-in na ngaihsun ding uh hi. Amah pen noteʼ zahtak pa le noteʼ kihtak pa na hisak ding uh hi.

¹⁴ Amah pen, a lamdang mahmah in a siangthoʼ luatna hangin miteʼ puk theih nading suangtum tawh kibang hi. Judah le Israel kumpi gam mite le Jerusalem khua-a a teeng mite a awk nading thangzak tawh kibang ding hi.

¹⁵ Mi tampi tak tuk ding uh hi. Amaute tukin kitamzan gawp ding uh a, amaute awkin kiman ding hi,” hong ci hi.

¹⁶ Ka nungzuite aw, Pasian in kei tungah hong piak hih thute, limtakin kemin koihcing un.

¹⁷ Jakobʼ innkuanteʼ kiang panin a maitang a seel Topa ngakin amah ka muang ding hi.

¹⁸ En un, Topa in kei hong piak ka tate le keima pumpi pen Zion Mual tungah a teeng Vanglian Topa’ tung panin Israel miteʼ sungah lim le kihilna ka hi uh hi.

¹⁹ Amaute in note kiangah, “Phun suausuau-in a pau mualmual vankah theite le aisan theite kiangah thu dong un. Mite in amauʼ pasian-te thu dongin, mihingteʼ thu pen misite dot ding mah hi lo ahi hiam?” hong ci ding uh hi.

²⁰ Tua ciangin note in, “Topa in note hong hilh thute ngai un. Aisanteʼ thu ngai kei un. Amauteʼ hong gen thute a kimanna om lo hi,” ci-in dawng un.

²¹ Mite pen gam sungah vak kawikawi-in, nakpi takin lungkhamin gilkial ding uh hi. A gil uh a kial ciangin amaute lungham gawp ding uh a, a kumpipa uh le a Pasian uh hamsiatin van dak ding uh hi.

²² Amaute in leilak a et suk hangun, lungkhamna le khua mialna, lungzing a gimna bek om hi. Khuamial ngeungau sungah amaute kihawl khia ding hi.