Isaiah 39 - Tedim Bible Revision 2017

Hezekiah in Babylon pan a Kamtaite Saang

¹ Tua hun laitakin Baladanʼ tapa, Babylon kumpi ahi Merodak-baladan in Hezekiah a ci na-in a damkikna thu za ahih manin ama kiangah laikhak le letsong tawh taangmite a sawl hi.

² Hezekiah in amaute limtakin zin na do hi. Amah in ama dangka inn, ngun, kham, paknamtui, sathau manpha, a galvan koihna inn khempeuh le a vankoihna sunga a kimu theite khempeuh amaute a na lak hi. Ama inn sung hitaleh, ama gam sunga om khempeuh hitaleh Hezekiah in amaute a lah loh bangmah om lo hi.

³ Tua ciangin Kumpi Hezekiah kiangah kamsang Isaiah hong pai-in, “Hih mite in bang hong gen ahi uh hiam? Koi lai panin nang kiangah hong pai ahi uh hiam?” a ci hi. Hezekiah in, “Amaute, a gamlapi, Babylon gam panin kei kiangah a hong pai uh ahi hi,” a ci hi.

⁴ Amah in, “Amaute in na inn sungah bang teng mu ahi uh hiam?” a ci hi. Hezekiah in, “Amaute in ka inn sunga a om khempeuh a vekin mu khin uh hi. Ka vankoihna innte sunga nate amau ka lah loh om lo hi,” ci-in a dawng hi.

⁵ Tua ciangin Isaiah in Hezekiah kiangah, “Vanglian Topa’ thu ngai in:

⁶ En in, na inn sunga a omte khempeuh le na pu na pate in tu ni donga a khol sate, Babylon ah a kipuak ding ni hong tung ding hi; bangmah kinusia lo ding hi, Topa in ci hi.

⁷ Nangʼ sung panin a suak, nangma tapate kim khat kipaikhiat pih dinga, Babylon kumpipaʼ inn sungah innsung maang nasep kisemsak ding hi,” a ci hi.

⁸ Tua ciangin Hezekiah in Isaiah kiangah, “Nong gen sa Topa’ thu a hoih ahi hi,” a ci hi. Bang hang hiam cih leh amah in, “Keiʼ nuntak hun sungin nopna le lungmuanna om buang ding hi,” ci-in a ngaihsun hi.