Isaiah 38 - Tedim Bible Revision 2017

Hezekiahʼ Cinatna

¹ Tua hun laitakin Hezekiah a ci na-in si dektak hi. Amozʼ tapa, kamsang Isaiah ama kiangah hong pai-in, “Topa in hih bangin ci hi: Na inn sung thu ding vaihawm in; bang hang hiam cih leh nang na damkik zo kei dinga, na si ding hi, hong ci hi,” ci-in a gen hi.

² Tua ciangin Hezekiah kawm lam nga-in Topa’ tungah thu ngen a,

³ “Topa aw, ka lungsim khempeuh le thuman tak tawh nangma mai ah gamta-in, nangma muhna ah a hoih nate ka sepna thu, tu-in nong phawk nadingin kong thum hi,” a ci hi. Hezekiah nakpi takin a kap hi.

⁴ Tua ciangin Isaiah tungah Topa’ thu hong tung a,

⁵ “Pai inla Hezekiah kiangah gen in. Topa, na pa Davidʼ Pasian in hih bangin ci hi: Na thungetna ka za khin a, na khitui ka mu khin hi. Tua ahih ciangin na nuntakna kum sawm le kum nga kong piak beh ding hi.

⁶ Assiria kumpipaʼ khut sung panin nang le khuapi kong hon khia dinga, hih khuapi ka hu ding hi, ci hi,” a ci hi.

²¹ Tua ciangin Isaiah in Hezekiah kiangah, “Theigah la sak inla, na damkik nadingin na meimate nuhsak in,” a ci hi.

²² Hezekiah in, “Topaʼ inn ah ka pai toh zawh nading a kitheih nadingin bang lim om ahi hiam?” ci-in a dong hi.

⁷ Isaiah in, “Amah in hong ciam sa thu Topa in hong bawl nadingin, hih pen Topaʼ tung panin nangma adingin lim ahi hi:

⁸ En in, Ahaz kumpipaʼ ni-nai tungah ni tum kuana liim pen kal sawm ka nungkiksak ding hi, ci hi,” a ci hi. Tua ahih ciangin a tum khin sa ni pen ni-nai tungah kal sawm a nungkik hi.

⁹ Judah kumpipa Hezekiah a ci na-in, a natna panin a damkik khit ciangin la phuakin a gelh lai in:

¹⁰ Ka hat saan laitakin a si ding ka hi ta a, ka hun om lai khempeuh Leinuai ah a om dingin hong kiseh hi ta hi, ka ci hi.

¹¹ A hingteʼ gam sungah Topa ka mu nawn kei dinga, leitung a a teeng miteʼ lakah mihing ka en nawn kei ding hi, ka ci hi.

¹² Tuucingpaʼ puanbuk bangin ka omna inn kibot khia-in kei kiang panin kila khia hi. Siamgante in a hial bangin ka nuntakna kihial khin a, amah in siambu panin kei hong at khia hi. Sun le zan tawntung gimna hong kithuaksak a,

¹³ zingsang dong huhna ngenin ka kiko hi. Humpinelkai bangin amah in ka guh khempeuh hong kuaihtansak a, sun le zan tawntung gimna hong kithuaksak hi.

¹⁴ Phialphiah ahi a, gun vapi bangin ahi zongin ka hamham a, vakhu bangin ka tautau hi. Vantung lam kong etetna-in ka mitte a gim hi. Topa aw, kei hong kinengniam hi; keima lungmuanna hong hi ta in!

¹⁵ Ahih hangin keimah in bang gen thei ding ka hi hiam? Bang hang hiam cih leh amah in kei tungah hong gen khin a, a mahmah in hih thu hong bawl hi. Ka lunggim lua a, ka ihmu thei kei hi.

¹⁶ Topa aw, nang adingin kong nungta dinga, nang ading bekbekin kong nungta ding hi. Ka ci hong damsakkik inla, hong nungtasak in!

¹⁷ Gimna lianpi ka thuakna pen keima lungnopna hong suak ding hi. Lauhuaina khempeuh panin kei nong hon khia a, ka mawhna khempeuh na hong maisak hi.

¹⁸ Bang hang hiam cih leh Leinuai ah a om mite in nangma tungah lungdamna hong ko thei lo a, a si sa mite in nang hong phat thei lo uh hi. Gum sunga a pai sukte in nangma thumanna hong muang thei lo uh hi.

¹⁹ Tu ni-in keima hong gamtat bangin a hing mite bek in nang tungah lungdamna hong ko thei hi. Pate in tate tungah nangma thumanna gen sawn uh hi.

²⁰ Topa in kei hong hon dinga, Topa’ inn sungah i nuntak sung tawntung khausai lasakna i tum ding hi.