Isaiah 31 - Tedim Bible Revision 2017

Egypt Mite Mihing, Pasian Hi lo

¹ Egypt gamah huhna ngen dingin pai suk a, sakol suanin nei-in leengte a tam manin muang a, sakol tung tuangte a hat mahmah manin muang napi-in Israel-teʼ Siangtho Pa a suang lo, Topa thu a dong lote in gimna ngah tahen!

² Ahih hangin amah pilin gimna tungsak a, thu a gen sate dokkik loin, siatna a bawl mite le mawhna nasep a seppihte gim a pia hi.

³ Egypt mite mihing hi a, Pasian hi lo hi. Amauʼ sakolte sa hi a, kha hi lo hi. Topa in a khut a zan ciangin a huhpa pukin, huhna a ngah pa tuk dinga, amaute khempeuh siakhawm ding uh hi.

⁴ Bang hang hiam cih leh Topa in keima tungah hih bangin hong ci hi: Humpinelkai ahi a, humpinelkai khanglai a hat mahmah in ahi zongin a sa nek ding a ngik ciangin tua humpi a do dingin tuucing honpi khat kikaikhawmin, amauteʼ otna hangin lau tuan het loin, amauteʼ gamlumna hangin a sin a dawi tuan loh mah bangin Vanglian Topa zong Zion Mual tungah galdo dingin kuan suk ding hi.

⁵ A bu a hongin, a kot lamlam vasate bangin Vanglian Topa in Jerusalem dal ding hi. Amah in dalin khah khia dinga, amah susia loin suaktasak ding hi.

⁶ Israel mite aw, nakpi takin na do pa uhʼ lamah kiheikik un.

⁷ Bang hang hiam cih leh a kuamah peuh in no adingin na bawl sa uh, mawhna ahi na ngun milimte uh na paihkhiat hun uh hong tung ding hi.

⁸ “Assiria pen mihingʼ namsau ahi lo, namsau khat tawh puk dinga, mihingʼ namsau ahi lo, namsau khat in susia ding hi. Namsau panin tai ding uh a, a tangvalte uh zawhthawh thu tawh nasem dingin kikoih ding hi.

⁹ Amauʼ belh a kumpipa uh a launa hangin tai dinga, buaina hangin a uliante in a dialkhai uh taisan ding uh hi,” ama meikuang Zion ah a om, ama meikhuk Jerusalem khua ah a om Topa in ci hi.