Isaiah 25 - Tedim Bible Revision 2017

Topaʼ Angvanna Hanga Phatna La

¹ Topa aw, nang pen keima Pasian na hi hi. Nangmah kong liansak dinga, nangma min ka phat ding hi. Bang hang hiam cih leh a lamdang nate na sem khin a, tanglai pek a na geelnate a kip a kho takpi ahi hi.

² Bang hang hiam cih leh nang in khuapi ninbu lomtang na suah a, a muanhuai khuapi a sia na suaksak hi. Mi kiphasakteʼ kumpi inn pen khua bang nawn lo a, cikmah hunin kilamkik nawn lo ding hi.

³ Tua ahih ciangin mi thahatte in nangma min hong thangsak dinga, thu khual lo minamteʼ khuapite in nang hong zahtak ding uh hi.

⁴ Bang hang hiam cih leh nang pen mizawngte adingin mun muanhuai, a cimawh mite adingin a lungkhamna uh ah mun muanhuai, huihpi panin bukna le nisa panin niliim na hi hi. Bang hang hiam cih leh thu khual lo miteʼ hihna pen huihpi in kulh a nawk gawp tawh kibang a,

⁵ mun keuna ah nisa mahmah tawh kibang hi. Nang in mi kiphasakteʼ gamlumna na daisak hi. Meii liim in nisa a votsak bangin thu khual lo miteʼ lasakna kitawpsak ta hi.

⁶ Vanglian Topa in hih mual tungah mi khempeuh adingin an lim nekna pawi, a ciil mahmah leenggahzu nekna pawi, guhngek tawh a kidim annekna, a siangtho leenggahzu ciil nekna pawi bawl ding hi.

⁷ Amah in mi khempeuhʼ khuk dahna puan le minam khempeuhʼ silh dahna puante, hih mual tungah susia ding hi.

⁸ Amah in sihna beisak mang dinga, maitang khempeuh panin khitui nul ding hi. Leitung khempeuh panin ama mite a kizahkona la khia ding hi. Bang hang hiam cih leh Topa in hih thu gen khinzo hi.

⁹ Tua ni ciangin, “En un, amah pen eima Pasian ahi hi. Eite a hong hon dingin amah i ngak hi. Amah pen eima Topa ahi hi. Amah i ngak hi. Amah in eite hong hon khia ahih manin lungdamin kipak ni,” kici ding hi.

¹⁰ Bang hang hiam cih leh Topa in hih Zion Mual hu dinga, ahi zongin Moab mite ahihleh ninkholna dum sungah buhkungte a kisikcip bangin kisikcip gawp ding hi.

¹¹ Tuipeek pa in tui peek dingin a khutte a van bangin amaute in a khut uh vanvan ding uh a, ahih hangin a khut uh a van simin a kiphatsaknate uh a khut uh tawh bengtum suk ding uh hi.

¹² Amah in Moab miteʼ kulh muanhuaite suksiatsakin leilak denna dinga, leivui suak khin mang ding hi.