Isaiah 20 - Tedim Bible Revision 2017

Assiria in Egypt le Ethiopia Zo ding

¹ Assiria kumpipa Sargon in a sawl galkap maang lianpen pa, Filistia khuapi Ashdod ah pai-in, tua khua va sim hi.

² Tua hun ma kum thum laitakin Topa in Amozʼ tapa Isaiah tungtawnin thu genin, “Na puanhampi suah inla, na khe panin na khedapte suah in,” a ci hi. Amah zong tua mah bangin gamta-in, tangguak le kheguak tawh lam a pai hi.

³ Ashdod khua a kilak khit ciangin Topa in, “Egypt le Ethiopia lang khat ah lim le siahil dingin ka nasem pa Isaiah tangguak le kheguak tawh kum thum sung lam a pai mah bangin,

⁴ Assiria kumpipa in, Egypt gam miteʼ maizumna ahi, a moi a hamin, tangguak kheguakin, tawbo dawk sa-in, Egypt mite galin manin, Ethiopia mite salin manin paikhiatpih ding hi.

⁵ Tua ciangin amauʼ lametna Ethiopia le amauʼ kisialh pih Egyptʼ hangin amaute lungkia-in a cih nading uh thei lo ding uh hi.

⁶ Tua ni ciangin hih tuipi gei-a teeng mite in, ‘En un, eiteʼ lametna, Assiria kumpipaʼ kiang panin eite hong hon khia dingin i belh miteʼ tungah hih bang piang khinta hi. Eite bangci suahtak ding ihi hiam?’ ci ding uh hi,” a ci hi.