Isaiah 19 - Tedim Bible Revision 2017

Egypt tawh kisai Thu

¹ Egypt tawh kisai thu hih bangin gen hi: A manlang mahmah meii tungah Topa tuangin Egypt gamah a pai hi. Ama mai ah Egypt gam milimte lau-in liing ding uh a, Egypt miteʼ hanna bei ta ding hi.

² Egypt mite amau le amau ka kitawngsak ding hi. Mi kim in ama veengte ciat do dinga, khua khatlekhat kido-in, mi khatlekhat kumpi za kituh ding hi.

³ Egypt miteʼ lungsim hawmsuak dinga, amauʼ geelnate ka siasak ding hi. Amaute in milimte, vankah theite le aisan theite tungah thu dong ding uh hi.

⁴ A thuak hak topaʼ khut sungah Egypt mite ka pia dinga, a kihtakhuai mahmah a gilo kumpipa in amaute uk ding hi, Topa, Vanglian Topa in ci hi.

⁵ Nail gun tuite keu dinga, gun tui kangcipin keu ding hi.

⁶ Lei zui-a tui kilate uihin, Egypt gam a om Nail gun hiangte kiamin keucip dinga, pumpeeng kung le phai kungte muat ding hi.

⁷ Nail gun gei, Nail gun kiang kolh dinga, Nail gun kiangah a kituh khempeuh keucipin huih in leen khia-in om nawn lo ding hi.

⁸ Nail gun sungah nga siahna sikkawi a khia ngei, ngasa bengte thumin tau ding uh a, tui tungah ngen a pai ngei mite thaneem ding uh hi.

⁹ Anthul khau ciingin na a semte le patpuan a gante lungkham ding uh hi.

¹⁰ Gam sung makaite kisusiacip dinga, a kicial nasemte dah ding uh hi.

¹¹ Zoan uliante hai cihtakin hai uh a, Faroʼ mipil thulamlakte in thu haihuai gen uh hi. Nang in Faroʼ tungah, “Mipil paʼ tapa ka hi hi; tanglai kumpiteʼ tapa ka hi hi,” bangci-in ci thei ding na hi hiam?

¹² Tua ahih kei leh Egypt kumpipa Faro aw, na mipilte koi ah om ahi uh hiam? Vanglian Topa in Egypt gam gimpiak ding a ngimna thu, na mipilte in nangma tungah hong gen thei kha ding hi.

¹³ Zoan uliante mihai suak khin uh a, Memfis uliante zong hai khin uh hi. Minamte a makai dinga kineite in a mite uh lam khialhpih khin hi.

¹⁴ Topa in amauteʼ lungsim kitukalhsak khinzo hi. Zukham pa ama luak lakah a puk bangin Egypt gam miteʼ hihna khempeuh khialin hoi mang khin hi.

¹⁵ A hau a zawng, a lian a neu, mi khat beek in Egypt adingin a hihsak theih ding bangmah om lo hi.

¹⁶ Tua ni ciangin Egypt mite, numei bang ding uh a, Vanglian Topa in amaute a khut a sinsanna hangin lau-in liing ding uh hi.

¹⁷ Judah gam pen Egypt miteʼ kihtak hong suak ding hi. Vanglian Topa in amaute gimpiak ding a ngimna hangin, hih thu a kigenna mi khempeuh lau ding uh hi.

¹⁸ Tua ni ciangin Egypt gam sungah khuapi nga in Kanaan miteʼ kampau zangin Vanglian Topa’ tungah thuman ding thu ciam ding uh hi. Hih khuapi khat pen, “Ni Khuapi,” kici ding hi.

¹⁹ Tua ni ciangin Egypt gamah Topa ading biakna tau khat, a gamgi ah Topa ading khuapi khat om ding hi.

²⁰ Tua pen Vanglian Topa adingin Egypt gam sungah lim le teci hi ding hi. A nengniam miteʼ bawlsiatna hangin Topa tungah amaute a kiko ciangin, amah in amaute kiangah honpa khat sawl dinga, amaute hu-in khah khia ding hi.

²¹ Topa in Egypt mite tungah a mahmah kitheisak ding hi. Tua ni ciangin Egypt mite in Topa thei-in biakpiakna le meihal biakna tawh bia ding uh a, amaute in Topa’ tungah thuciamna bawlin, tua thuciamnate sem ding uh hi.

²² Topa in Egypt mite sat dinga, ahi zongin damsakkik ding hi. Topa’ lamah amaute kiheikik ding uh a, amah in amauteʼ thumna donin amaute a damsak ding hi.

²³ Tua ciangin Egypt gam panin Assiria gamah lam lianpi khat pai-in, Assiria mite Egypt gamah hong pai dinga, Egypt mite Assiria gam sungah pai-in, Egypt mite in Assiria mite tawh bia khawm ding uh hi.

²⁴ Tua ni ciangin Israel, Egypt le Assiria, hih thumte pen leitung khempeuh adingin thupha hi ding uh a,

²⁵ Vanglian Topa in, “Ka mihingte ahi Egypt, ka khut tawh ka bawl sa ahi Assiria le keima luah ahi Israel mite in thupha ngah tahen,” ci-in thupha a piakte hi ding uh hi.