Isaiah 14 - Tedim Bible Revision 2017

Babylon Kumpipa A Kizahkona

¹ Topa in Jakob hehpihin Israel teelkik dinga, amaute pen a gam uh ah koihkik ding hi. Khual mite in amaute pawlin Jakob innkuan bel ding uh hi.

² Israel mite in amaute manin amauʼ gamah ciahpih ding uh a, Topaʼ gam sungah amaute pen sila numei sila pasal dingin nei ding uh hi. Amaute a man ngei mite pen tu-in amaute in leh mat ding uh a, amaute a nengniam ngei mite tungah tu-in ukna nei ding uh hi.

³ A haksa nasep hong kisepsakna, gimna le lungkhamna panin Topa in note tungah tawldamna hong piak ciangin,

⁴ Babylon kumpipa tungah hih zahkona kam na zang ding uh a, “Kumpi gilopa puk ta a, amah in kuamah nengniam zo nawn lo ding!

^5-6 Tawlnga loin mihingte satna-in a kizang, hehna tawh minamte ukin nakpi takin a bawlsia, migiloteʼ ciangkhut le gam ukteʼ kumpi ciangkhut, Topa in kuaitan khinta hi.

⁷ Leitung khempeuh tawlnga-in gamdai takin om ta uh a, amaute in la sa-in kiko uh hi.

⁸ Taksing kungte na tungah lungdamin, Lebanon mual taamtak singkungte in, ‘Nang hong kiniamkoih khit a kipanin kote a phuk dingin kuamah hong pai nawn kei,’ ci uh hi.

⁹ “Nang na pai suk ciangin a hong dawntuah dingin Leinuai-a misite kihanthawn a, nangmah a hong hopih dingin leitungah a lian ngei misi uliante kipusuaksak hi. A minamteʼ kumpite khempeuh amauʼ kumpi tokhom panin hong ding uh hi.

¹⁰ Amaute in nang hong hopihin, ‘Nang zong kote mah bangin na thahat kei hi. Kote mah na bang ta hi,’ hong ci ding uh hi.

¹¹ Nangma harp lasakna awte, nangma liatna khempeuh Leinuai ah kipaipih suk hi. Thante pen nangma delhphah hi a, thante pen nangma silh ahi hi.

¹² “Nang Khuavakʼ ta, Zingsol, Babylon kumpipa aw, vantung panin nang bangci kiat na hi hiam? Minamte a niamkoih pa ahi nangmah leilak dongah hong bangci kiphuk pai ahi hiam?

¹³ Nang in na lungsim sungah, ‘Vantungah ka kah to ding hi. A sangna mun, Pasianʼ aksiteʼ tung pekah ka kumpi tokhom ka koih dinga, leilu lam pek a kikhopna mual tungah ka tu ding hi.

¹⁴ Meiiteʼ tung pekah ka kah to dinga, Sangpen pa bangin ka kibawl ding hi,’ na ci hi.

¹⁵ Ahih hangin nang pen Leinuai thuk penna Leihawm sungah hong kikoih suk ding hi.

¹⁶ “Nangmah hong mu mite in nang hong en gega-in, nangma thu lungngai dedu ding uh a, ‘Hih mipa pen leitung a liingsak pa, kumpi gamte a lok gawp pa,

¹⁷ leitung pen sehnel gam suaksakin, khuapite a susia pa, thong sungah a kikhum mite inn ah a ciahsak lopa hih pa hi lo ahi hiam?’ hong ci ding uh hi.

¹⁸ “Minam dangteʼ kumpite khempeuh amau hankhuk sung ciat uh ah a minthangin lum uh hi.

¹⁹ Ahih hangin nang pen namsau tawh a kithat misi a uihte, Suanghawmpi sunga a pai sukte, khe tawh a kisikcip si luang hawmte bangin, na hankhuk pua lamah hong kilawn khia hi.

²⁰ Nangmah in na gam susia-in, nangma mihingte that khin na hih manin, nang pen amaute tawh hong kivui khawm lo ding hi. Siatna a bawlpaʼ suanlekhakteʼ min kilo ngei nawn kei tahen!

²¹ Amaute khangto loin leitung a neih loh nading le leitung maitang teng khuapite tawh a kidimsak loh nadingin amauʼ pateʼ mawhna hangin a tateʼ kithah nading piang tahen,” na ci ding uh hi.

²² Vanglian Topa in, “Amauteʼ lang khat ah ka pang dinga, Babylon min le a om lai miteʼ tate le suanlekhakte ka susia ding hi, Topa in ci hi.

²³ Saphulipteʼ om nadingin tua khuapi bawlin, bualtui ka suaksak dinga, siatna munphiah tawh ka phiat khia siang ding hi,” Vanglian Topa in ci hi.

Assiria Kisusia Ding

²⁴ Vanglian Topa kiciam khin a, “Ka geel sa bangin piang dinga, ka ngimna sa bangin kip ding hi.

²⁵ Keimah in ka gam sungah Assiria mite ka susia dinga, ka mual tungah ka sikcip ding hi. Ka miteʼ tung panin Assiria-teʼ hakkol amauteʼ liangko panin Assiria-teʼ van gik kia khia ding hi,” a ci hi.

²⁶ Hih ngimna pen leitung buppi adingin a kingim ahi hi. Hih ka khut pen minam khempeuh gimpiak nadingin a kizan ahi hi.

²⁷ Vanglian Topa in ngim khin ahih manin kua in phiat zo ding ahi hiam? Ama khut kizan khin ahih manin kua in kaitonkik zo ding ahi hiam?

Filistia tawh kisai Thu

²⁸ Kumpi Ahaz a sih kumin thu hong tung a,

²⁹ “Filistia mi khempeuh aw, note hong kisatna ciangkhut a kitan manin lungdam kei un. Bang hang hiam cih leh singbul panin a sel a om bangin, gulpi a sih khit ciangin a siahuai zaw gul gunei hong om dinga, tuate pen a leng thei gulpi hong hi ding uh hi.

³⁰ Mizawngte in keima gankhahna sungah an ne ding uh a, a cimawhte lungnuam takin lum hithiat ding uh hi. Ahih hangin no Filistia mite, kialpi tawh kong that dinga, a suakta kha a omlaite keimah in ka that ding hi.

³¹ “Filistia khuapi kongpite aw, nakpi takin kap un; khuapite aw, kiko un. Filistia mi khempeuh aw, lau-in liing un! Bang hang hiam cih leh leilu lam panin galkap honteʼ hong paina leivui khu hong kitung a, tua galkapte a meidawi khat beek om lo hi,” hong ci hi.

³² Filistia mite in a hong sawl kamtaite mi khatpeuh in bangci dawn ding ahi hiam? “Topa in Zion kipsak khin a, gimna a thuak ama mite in tua sungah bukna mu uh hi,” ci-in a dawng ding uh hi.