Isaiah 13 - Tedim Bible Revision 2017

Babylon tawh kisai Thu

¹ Amozʼ tapa Isaiah in Babylon siat nading tawh kisai a thumuhnate:

² Mual kolh tungah lim khat lak to unla, galkapte tungah nakpi takin kiko un. Mi lianteʼ kongpi ah amaute va pai-in a sim nadingun amaute khut vaan un.

³ Keimah in ka tuam koih sa mite thu pia khinin, ka hehna thu a sem khia dingin kiphatsakna tawh a lungdam ka mi thahatte ka sam khin hi.

⁴ Ngai un, mihonpi lungdam bangin mualtungte ah gamlumna! Ngai un, minamteʼ kumpi gamte kikhawmin a gamlumna! Vanglian Topa in galdo dingin mihon khat kai khawm hi.

⁵ Leitung buppi a susia dingin Topa le ama hehna galhiamte gamlapi van mong panin hong pai hi.

⁶ Topa’ ni hong nai ta ahih manin nakpi takin kap un. Vanglian paʼ kiang panin suksiatna hong tung ta ding hi.

⁷ Tua ahih ciangin khut khempeuh zaw-in, mi khempeuhʼ lungsim tui suak dinga, amaute lungkia ding uh hi.

⁸ Amaute in gim mahmahna le nat velvalna thuak ding uh a, numei nausuak ding bangin na sa ding uh hi. Amaute khatlekhat lamdangsakna tawh ki-en ding uh a, a maitangte un gimna mel pua ding hi.

⁹ En un, leitung gamkhing suaksakin, leitung mawhneite a susia dingin hehna le sinsona tawh nasia takin Topa’ ni hong tung ding hi.

¹⁰ Bang hang hiam cih leh vantung aksite le amauʼ aksi honpite in khuavak pia khia lo ding hi. Ni a suah tung a kipan mial dinga, kha in zong khuavak taang khiasak lo ding hi.

¹¹ Leitung mite a tatsiatna hangun gim ka pia dinga, migilote a mawhna hangun gim ka thuaksak ding hi. Mi kihisakteʼ kiphatsakna beisiang sakin, a kisatheiteʼ kiliatsakna ka niamkhiat ding hi.

¹² Mihingte pen kham hoihte sangin a hoih zaw, minam pen Ofir gam khamte sangin a hoih zaw-in ka bawl ding hi.

¹³ Tua ahih ciangin ka sin so ni-in Vanglian Topa ka hehna hangin vantung lausakin ka liingsak dinga, ama omna panin leitung kising khia ding hi.

¹⁴ A kidelh sanang le a cing om lo tuu bangin mi khempeuh amauʼ miteʼ lam ciatah kihei-in, amauʼ gam ciatah tai ding uh hi.

¹⁵ A kimu mi peuhmah kithat dinga, a kiman mi peuhmah namsau tawh si ding hi.

¹⁶ Amauʼ muhna mahah a naungekte uh leilak kiden gawp nading hi. Amauteʼ inn kiluhin, a zite uh kibuansak ding hi.

¹⁷ En un, ngun le khamte tawh a lungkim lo Media mite pen amaute a sim dingin ka hanthawn hi.

¹⁸ Amauʼ thalte in tangvalte that ding hi. Amaute in gil sung pan a piang naungekte hehpih lo ding uh hi. Amauteʼ mit in naupangte khasiat lo ding hi.

¹⁹ Khaldea miteʼ hoihna, a kiphatsakpih, kumpi gam a minthang bel Babylon khuapi pen Pasian in Sodom le Gomorrah a siatsak lai hun bang ding hi.

²⁰ Khang tawntungin tua lai ah kuamah teeng lo dinga, tua lai ah kuamah omngei nawn lo ding hi. Arabia mite kuamah in tua lai ah a puanbuk lam lo dinga, tuucingte kuamah in tua lai ah a tuute lumsak lo ding hi.

²¹ Tua munah gamsate lum ding uh a, tua mun a innte pen a hawk ganhingte tawh kidim ding hi. Tua munah vasa-kalaoh golpite teengin, tua munah keeldawite laam ding uh hi.

²² Mihauteʼ inn sungah ngiate, kumpi inn nuam sungah se-alte a ham ding uh hi. Babylon khuapi a siat ding hun hong nai ta a, a ni sawt nawn lo ding hi.