Hosea 3 - Tedim Bible Revision 2017

Hosea le A Paktat Numei

¹ Topa in kei kiangah thu hong genkik a, “Lawm a ngai khin sa, pasal tawh a lum khawm sa numei khat tawh va kingai in. Israel mite, pasian dangte kiangah pai uh a, leenggahkeu tawh a va biak uh hangin, amaute ka it lai veve mah bangin tua numei va it in,” hong ci hi.

² Tua ahih ciangin ngun shekel sawm le nga le mangbuhham seu sawm le nga tawh zi lei-in

³ ama kiangah, “Sau veipi sung keima zi bangin na om dinga, midang tawh na paktat nawn kei ding hi. Midang tawh na lup khop loh mah bangin kei nangawn tawh zong i lum khawm kei ding hi,” ka ci hi.

⁴ Hih pen kumpi ahi a, makai ahi zongin, biakpiakna le biakpiakna khuampite ahi zongin, siampi puanpi le milim pasian-te nei loin hun saupi sung Israel mite om ding a cihna ahi hi.

⁵ Tua khit ciangin Israel mite in Topa amauʼ Pasian le a kumpipa uh David lamah hong kiheikik ding uh hi. Tua hun ciangin amaute in Topa zahtakin, ama letsongte a ngah ding uh hi.