Hosea 14 - Tedim Bible Revision 2017

Topa Lamah A Kihei nading uh Israel-te Kikun

¹ Israel-te aw, noteʼ Topa Pasianʼ lamah kiheikik un. Na mawhna hangun note na puk khin uh hi.

² Topaʼ lamah kihei unla, “Ka mawhna khempeuh uh hong maisak inla, kong thumna uh hong ngai in. Ka kampauna bangun kong gamta ding uh hi.

³ Assiria mite in hong hon khia zo ngei lo dinga, sakol galkapte in zong hong hu zo ngei lo ding uh hi. Koteʼ bawl sa milimte pen Pasian hi, ka ci nawn kei ding uh hi. A cimawh mite in nangma tung panin hehpihna a ngah lamtak uh ka thei uh hi,” ci-in thu ngen un.

⁴ Tua ciangin Topa in, “Ka mite tungah heh nawn lo ka hih manin ka kiangah ka mite ka samkik dinga, lungsim takpi tawh amaute ka it ding hi.

⁵ Gam keuna mun a guahzu bangin Israel mite tungah nuntakna guah ka hi ding hi. Paak bangin amaute palh ding uh a, Lebanon gam a singkungte bangin zung thuk khakin a kip ding uh hi.

⁶ Amaute meeng thakin oliv kung bangin melhoih ding uh a, Lebanon Mual bangin namtui ding uh hi.

⁷ Keima liim nuai ah khatvei hong omkik ding uh hi. Huan hoih sunga a po ankung hoihte bang ding uh a, leenggui gah pha bangin tampi a pha ding uh hi. Lebanon gam leenggahzu bangin minthang ding uh hi.

⁸ Israel mite in milim bia kha nawn lo ding uh hi. Amauteʼ thungetna pia-in amaute ka kem ding hi. Amaute, a hing tawntung singkung kep bangin ka kem ding hi; amauteʼ thupha ngah khempeuh keima kiang pan ahi hi,” a ci hi.

Thukhupna

⁹ Mipil, thu ngaihsun theite in hih thute thei telin limtakin ciamteh tahen. Topaʼ lampi tang mahmah a, a thutang mite in tua lampi a tawn uh hi. Mawhneite in tua lampi tawn lo ahih manin a puk uh hi.