Hebru 7 - Tedim Bible Revision 2017

Melkhizedek Siampi Nam

¹ Abraham in a galsimna ah kumpite thatin gualzo-in a hong ciah ciangin A Lianpen Pasianʼ siampi ahih banah Jerusalem khua kumpi zong ahi Melkhizedek in Abraham na dawnin thupha a pia hi.

² Abraham in a na ngah khempeuh sung panin Melkhizedek tungah sawm-ah-khat a pia hi. Melkhizedek min a khiatna in, “Thuman Kumpi,” a cihna hi phot a, tua banah Jerusalem khua kumpi zong hi lai ahih manin ama min pen, “Kilemna Kumpi,” cihna zong ahi hi.

³ Melkhizedekʼ pa le a nu a kipanin a suahna thu, a sihna thu le a khang tangthu peuhmah a kiciaptehna om lo ahih manin Pasianʼ Tapa tawh a kibang hi a, siampi mah hi tawntung paisuak hi.

⁴ Tua ahih manin bangzah takin mi lian ahihna thu na thei uh hi. I pupi Abraham nangawn in zong gal sungah a ngah nate sung panin ama tungah sawm-ah-khat na pia hi.

⁵ Levi suanlekhak sung panin siampi a sem mite pen Abrahamʼ suanlekhak mah hi napi-in, amau mipih Israel-te tung panin sawm-ah-khat a lak nadingun Thukham a na kibawl hi.

⁶ Ahi zongin Melkhizedek ahihleh Leviʼ suanlekhak hi lo napi-in Abrahamʼ tung panin sawm-ah-khat na la-in thuciamna a ngah mipa zong thupha a na pia lai hi.

⁷ A lian zawte in a neu zawte thupha a na piakna pen a man thu hi a, sel theih ding hi lo hi.

⁸ Siampiteʼ lakna tawh kisai-in ahihleh a si thei mi mah ahi siampite in mite tung panin sawm-ah-khat a la uh hi. Ahi zongin Melkhizedekʼ lakna tawh kisai-in ahihleh Lai Siangtho in a gen mah bangin a nungta tawntung mipa in sawm-ah-khat a la ahi hi.

⁹ Abraham in Melkhizedek tungah sawm-ah-khat a piak ciangin ama suan Levi in zong ama pupi Abraham tungtawnin a pia mah kici thei hi.

¹⁰ Bang hang hiam cih leh Melkhizedek in Abraham a na dawn laitakin Levi suak nai lo ahih manin a pupi Abrahamʼ sung mahah a om lai ahi hi.

¹¹ Israel mite in Leviʼ suanlekhak siampite tungtawnin Thukham ngah uh hi. Leviʼ suanlekhak siampiteʼ nasepna kicingtaak hileh Melkhizedek siampi nam zui-in siampi namdang a pian ding kisam nawn lo dinga, Aaron gui zui-in siampi om sa a kimang pah ding ahi hi.

¹² Siampi nam kikheel ahih manin a thukham zong a kikheel ding kisam hi.

¹³ Hih bang thute a kigenna i Topa pen a namtuam khat hi a, ama phung sung panin biakna tau ah siampi na a sem khat beek om lo hi.

¹⁴ I Topa pen Judah suan sung panin a piang ahih manin Moses in siampi thu a na gen ciangin hih Judah minam genin na nei lo hi.

¹⁵ Melkhizedek tawh a kibang siampi namtuam khat hong pian ciangin hih thu hong kitel pha semsem hi.

¹⁶ Amah pen mihingteʼ bawl ngeina zui-in siampi a suak hi lo a, a si thei lo nuntak tawntungna vang tawh siampi a suak ahi hi.

¹⁷ Bang hang hiam cih leh Lai Siangtho in, “Melkhizedek nam bangin tawntung siampi na hi hi,” na ci hi.

¹⁸ Ngeina lui pen gina loin, a kimanna om lo ahih manin kinawl khiin hi.

¹⁹ Moses Thukham ahi ngeina lui in a cingtaaksak zawh bangmah om lo ahih manin eite in Pasian i naih theih nading lametna ahi ngeina thak hong kithun hi.

²⁰ Tua banah Pasianʼ kiciamna zong hong om lai hi. Midangte siampi-in a kibawl laitakin tua bang kiciamna na om lo hi.

²¹ Ahi zongin Pasian in Jesu kiangah, “Topa in a lungsim a kheel loh nading limtakin kiciam khin a, ‘Nang, tawntung siampi na hi hi,’” na ci ahih manin kiciamna tawh Jesu siampi a na suak ahi hi.

²² Hih bangin a kilamdang diakin a kibawlna in Jesu pen kiciamna hoih zaw ahihna thu hong kilangsak hi.

²³ A kilamdanna a dang khat in: Siampi dangte pen si thei-in a nasep zom paisuak thei lo ahih manin a mi malin tampi pha uh hi.

²⁴ Ahi zongin Jesu nungta tawntung ahih manin midang tungah a nasep ki-ap nawn loin a mahmah in siampi nasep sem paisuak hi.

²⁵ Tua hi a, mite adingin a thumsak thei dingin amah nungta tawntung ahih manin ama tungtawnin Pasian kiang a zuante khempeuh, tu a kipanin a tawntungin a hon khia thei ahi hi.

²⁶ Tua bangin a siangtho, paubaanna a nei lo, vantungah a lian penin a kikoih Siampi Lianpen Jesu i neih a hoih mahmah ahi hi.

²⁷ Siampi lianpen dangte in nisimin amauʼ mawhna hangin biakna pia masa-in, tua ciangin midangteʼ mawhna hangin a piak niloh bang hi loin, amah khatvei bek a kipiakna tawh a tawntung adingin a kimang paisuak ahi hi.

²⁸ Moses Thukham in siampi lianpen a sem dingin cingtaakna a nei thei lo mihing mah na seh a, ahi zongin tua Thukham nungah a hong piang Pasianʼ thuciamna in a tawntungin a cingtaakin a kibawl Tapa, Siampi Lianpen dingin kiciamna tawh a na seh hi.