Hebru 2 - Tedim Bible Revision 2017

A Thupi Mahmah Hotkhiatna

¹ Tua ahih manin i zak sa thuman thutakte i khahsuah khak loh nadingin kiptak kho takin i letkip ding kisam hi.

² Vantung mite in hong gen thute thuman hi a, tua thu a palsatte in a kilawm bangin gim thuak ding uh hi.

³ Tua ahih manin a thupi mahmah hih hotkhiatna thudon loin i om leh suahtakna om thei ngei lo ding hi. A masa-in Topa mahmah in hotkhiatna thu hong pulak a, tua thu a za mite in thuman ahihna thu eite tungah hong gen leuleu uh hi.

⁴ Amauteʼ thugenna banah Pasian in vangliatna lim le nalamdang a tuamtuamte bawlna tawh hong gen beh lai hi. Tua banah ama hoihsak bangin Pasian in Kha Siangtho zong hong hawm lai hi.

Hotkhiatna Thuah A Makai pa

⁵ Eite in gen belin i neih a hong tung ding leitung pen Pasian in vantung miteʼ khut sungah koih lo hi.

⁶ Lai Siangtho mun khat ah a kigenna ah, “Pasian aw, nangma ngaihsut tham dingin mi pen bang hi a, na phawk tham dingin mihingʼ ta bang hi lel ahi hiam?

⁷ Ahi zongin vantung mite sangin a neu zaw deuhin na bawl a, minthanna le pahtawina na guan a,

⁸ na khempeuh na uksak hi,” na ci hi. “Pasian in na khempeuh a uk dingin bawl,” a cih ciangin na khempeuh a huam khin hi ta hi. Mihing in na khempeuh a uk lam i thei nai kei hi.

⁹ Ahi zongin Pasianʼ hehpihna hangin mi khempeuh adingin Jesu a sih theih nadingin tawl khat sung vantung mite sangin a neu zaw-in a kibawlna i mu a, sihna a thuakna hangin minthanna le pahtawina a ngahna thu i thei hi.

¹⁰ Na khempeuh ama adingin a piangsak Pasian in tate tampi minthanna a ngahsak theih nadingin a thuakna tawh hotkhiatna thu ah a makai dingin Jesu a bawl ding a kilawm mah ahi hi.

¹¹ Mawhna panin mite a siangthosak pa le sianthosakna a ngah mite in, Pa, a kibang a neikhawm uh hi. Tua hi a, Jesu in mite, “Sanggam,” a cih ding zum ngaihsut lo ahih manin,

¹² “Pasian aw, ka sanggamte kiangah nangma thu ka gen dinga, mi khempeuh mai ah nangmah kong phat ding hi,” na ci a,

¹³ tua ciangin, “Pasian muanin ka nei ding hi,” na cikik a, tua ciangin, “Pasian in hong piak ta dangte tawh hih lai ah ka om hi,” na ci leuleu hi.

¹⁴ Tate a cih mite pen leitung cilesa a nei mite ahih manin, ama sihna hangin sihna a uk Dawimangpa a suk gawp theih nadingin Jesu in mihing pianzia mah hong nei phot hi.

¹⁵ Tua ahih manin sihna a kihtak manin sal bangin a om mite amah in hong suaktasak hi.

¹⁶ Ama lunghihmawh pen vantung mite hi lo a, Abrahamʼ suanlekhakte a lunghimawh ahihna thu hong kitel hi.

¹⁷ Tua ahih manin mihingteʼ mawhna a kimaisak theih nadingin Pasianʼ na a sepna ah mite adingin hehpihna le cihtakna tawh Siampi Lianpen a suah theih nadingin a sanggamte tawh a kibangin mihing lim a hong puak ding a kisam ahi hi.

¹⁸ Ama pumpi mahmah in ze-etna le gimna thuak ahih manin tu hun ciangin tua bang a thuakte a hong huh thei hi.