Gamlak-vakna 3 - Tedim Bible Revision 2017

Levi mi Phazah le a Nasep uh

¹ Hihte pen Sinai Mual tungah Topa in Moses tawh a thugen hun lai-a Aaron le Mosesʼ huna mite ahi hi.

² Aaronʼ tapateʼ minte in: A ta upa Nadab, Abihu, Eleazar le Ithamar hi a,

³ sathau a kinilh siampi, siampi za ah na a sem dingin a kikipsak, Aaronʼ tapateʼ minte ahi hi.

⁴ Ahih hangin Sinai sehnel gam Topaʼ mai ah mei siangtho lo a zat uh ciangin Topaʼ mai ah Nadab le Abihu si hi. Amaute in ta nei lo uh ahih ciangin Eleazar le Ithamar in a pa uh Aaronʼ nuntak sungteng bek siampi na a sem uh ahi hi.

⁵ Topa in Moses kiangah,

⁶ “Levi minamte va paipih inla, amaute in siampi Aaronʼ na a sep theih nadingun a mai ah va koih in.

⁷ Amaute in biakbuk ah a sep uh ciangin amah le mihonpi adingin kikhopna buk mai ah na sem ding uh hi.

⁸ Amaute in kikhopna buk sung nazat khempeuh vaan ding uh a, biakbuk ah a sep uh ciangin Israel mite adingin na sem ding uh hi.

⁹ Nangmah in Aaron le a tapateʼ tungah Levi mite na pia dinga, amaute pen Israel mite lak panin keima tungah a kipiate hi ding uh hi.

¹⁰ Nangmah in Aaron le a tapate na seh dinga, amaute in a siampi nasep uh don ding uh hi. Ahih hangin midang khatpeuh in siampi nasep a sep leh, tua mi kithat ding hi,” a ci hi.

¹¹ Topa in Moses kiangah,

¹² “En in, Israel mite lakah tacil khempeuh tang dingin Levi mite ka la khin hi. Levi mite pen keima aʼ hi ding hi.

¹³ Bang hang hiam cih leh tacil khempeuh keima-aʼ ahi hi. Egypt gam sungah tacil khempeuh ka thah ni-in, Israel sungah tacil khempeuh, mihing tacil le ganhing tacil khempeuh, keima adingin ka ap a, amaute pen keima aʼ hi ding hi; kei pen Topa ka hi hi,” a ci hi.

¹⁴ Topa in Sinai sehnel gam Moses kiangah,

¹⁵ “Levi mite, a behbeh, a inn kuankuanin, pasal kha khat a pha panin a tungsiah peuhmah na sim ding hi,” a ci hi.

¹⁶ Tua ahih ciangin Moses thu a kipiak bangin amah in Topaʼ thupiakna tawh kizui-in amaute a sim hi.

¹⁷ Leviʼ tapateʼ min in: Gershon, Kohath le Merari ahi hi.

¹⁸ Gershonʼ tapateʼ min in: Libni le Shimei ahi hi.

¹⁹ Kohathʼ tapateʼ min in: Amram, Izhar, Hebron le Uzziel ahi hi.

²⁰ Merariʼ tapateʼ min in: Mahli le Mushi ahi hi. Hih mite pen Levi mite beh lutangte ahi uh hi.

²¹ Gershon-te beh pen Libni mite le Shimei mite hi a, hihte pen Gershon-te beh ahi uh hi.

²² Amaute, kha khat pan a tungsiah a pha pasal peuhmah tul sagih le za nga ahi hi.

²³ Gershon-te beh in nitumna lam biakbuk nungah giahphual sat ding uh a,

²⁴ tua Gershon mite sung pan a beh ukpi pen Laelʼ tapa Eliasaf hi ding hi.

²⁵ Gershon-te beh in kikhopna buk sungah a et dingte pen a biakbuk, puanbuk a tuamna tawh, kikhopna buk kongkhak puankhai,

²⁶ buktual a puan kikhaite, biakbuk kiim a om buktual a kongkhak puankhai le biakna tau le a khaute le hihte tawh a kizom nasep khempeuh ahi hi.

²⁷ Kohath-te beh pen Amram mite, Izhar mite, Hebron mite le Uzziel mite hi a, hihte pen Kohath-te beh ahi hi.

²⁸ Pasal khempeuh kha khat pan a tungsiah, biakbuk nasep a sem peuhmah tul giat le za guk ahi hi.

²⁹ Kohath-te beh in biakbuk leitaw lam pangah giahphual sat ding uh a,

³⁰ Kohath mite sung pan a beh ukpi pen Uzzielʼ tapa Elizafan hi ding hi.

³¹ Amauʼ et dingte pen thuciamna singkuang, a sabuai, a meivak khuam, a biakna taute, siampite in nasepna-in a zat uh biakbuk nazatteʼ kidalna puan le hihte tawh a kizom nasep khempeuh ahi hi.

³² Siampi Aaronʼ tapa Eleazar pen Levi mi makaite tungah a ukpi hi dinga, biakbuk a en miteʼ nasepna vil ding hi.

³³ Merari-te beh pen Mahli mite le Mushi mite hi a, hihte pen Merari-te beh ahi hi.

³⁴ Amaute kha khat panin a tungsiah pasal peuhmah tul guk le za nih ahi hi.

³⁵ Merari-te beh sung pan a beh ukpi pen Abihailʼ tapa Zuriel hi dinga, amaute pen biakbuk leilu lam pangah giahphual a sat dingte ahi uh hi.

³⁶ Merari-te behʼ et dinga a kisehte pen biakbuk khuampeekte, a zawlte, a khuampite, khuam bullente, a nengneng teng le hihte tawh a kizom nasep khempeuh ahi hi.

³⁷ Buktual kimkot a khuampite le a bullente tawh, khetphimte le a khaute zong ahi hi.

³⁸ Nisuahna lam pang biakbuk mai, kikhopna buk mai ah giahphual a sat ding mite pen Israel mite adingin bang khat peuhpeuh sep nadingin biakbuk sungah thu a nei Moses le Aaron le a tapate hi a, midang khatpeuh in biakbuk sungah na a sep leh kithat ding hi.

³⁹ Moses le Aaron in Topaʼ thupiakna tawh a inn kuankuanun a sim Levi mi pasal kha khat panin a tungsiah peuhmah tul sawm nih le tul nih a pha hi.

Levi mite le Tacil Kitatna

⁴⁰ Topa in Moses kiangah, “Israel mite sung pan pasal tacil khempeuh sim inla, kha khat panin a tungsiah peuhmah a min la in.

⁴¹ Israel mite lak panin tacil khempeuh tang dingin Levi mite nong laksak dinga, Israel miteʼ ganhing tacil khempeuh tang dingin Levi miteʼ ganhing nong laksak ding hi - kei pen Topa ka hi hi,” a ci hi.

⁴² Tua ahih ciangin Moses in Topaʼ thupiak bangin Israel mite lakah tacil khempeuh a sim hi.

⁴³ Kha khat panin a tungsiah tacil pasal a kisim peuhmah tul sawm nih le tul nih le za nih le sawm sagih le thum ahi hi.

⁴⁴ Topa in Moses kiangah,

⁴⁵ “Israel mite lakah tacil khempeuh le a ganhingte uh tang dingin Levi mite le a ganhingte uh la in. Levi mite keima aʼ hi ding hi; kei pen Topa ka hi hi.

⁴⁶ Levi mi pasal khempeuh sangin Israel mi tacil khempeuh za nih le sawm sagih le thumin tam zaw ahih manin,

⁴⁷ tuate tat nadingin shekel khat ah gerah sawm nih a pha, biakinn shekel zangin mi khat ciangin shekel nga pai la inla,

⁴⁸ tua a tam zaw teng a kitatna uh sumte Aaron le a tapate tungah pia in,” a ci hi.

⁴⁹ Tua ahih ciangin Moses in Levi mite banah a val lai mite tung panin kitatkhiatna sum la a,

⁵⁰ biakinn shekel zangin Israel mi tacilte tung panin sum shekel tul khat le za thum le sawm guk le nga a la hi.

⁵¹ Tua ciangin, Topa in Moses a thupiak mah bangin Topaʼ thu tawh kizui-in kitatkhiatna sumte Aaron le a tapate tungah Moses in a pia hi.