Gamlak-vakna 1 - Tedim Bible Revision 2017

Sinai ah Israel Mi Phazah A Kisimna

¹ Amaute, Egypt gam panin a paikhiat zawh uh a kum nihna, a kha nihna a ni masa ni-in, Sinai sehnel gam kikhopna puanbuk sungah Topa in Moses hopihin hih bangin ci hi:

² “Nang le Aaron in Israel mihonte khempeuh a innkuankuan, a behbehin, pasal peuhmah a milipin a phazah sim un.

³ Israel sungah kum sawm nih panin a tungsiah a pha, galdo dingin a kuan thei ding mi khempeuh a honhonin na sim ding uh hi.

⁴ A minam simin a beh sungah a lutang ahi mi khat ciat in hong huh ding uh hi.

⁵ No hong huh dingteʼ min: Reuben sung panin Shedeurʼ tapa Elizur;

⁶ Simeon sung panin Zurishaddaiʼ tapa Shelumiel;

⁷ Judah sung panin Amminadabʼ tapa Nahshon;

⁸ Issakhar sung panin Zuarʼ tapa Nethanel;

⁹ Zebulun sung panin Helonʼ tapa Eliab;

¹⁰ Josef tapate, Efraim sung panin Ammihudʼ tapa Elishama le Manasseh sung panin Pedahzurʼ tapa Gamaliel;

¹¹ Benjamin sung panin Gideoniʼ tapa Abidan;

¹² Dan sung panin Ammishaddaiʼ tapa Ahiezer;

¹³ Asher sung panin Okranʼ tapa Pagiel;

¹⁴ Gad sung panin Deuelʼ tapa Eliasaf;

¹⁵ Naftali sung panin Enanʼ tapa Ahira ahi hi,” a ci hi.

¹⁶ Hihte pen mihon sung panin a kiteel, amauʼ phung sung panin a makaite, Israel behteʼ lutangte ahi uh hi.

^17-19 Topa in Moses a thupiak bangin Moses le Aaron in a min kilo sa hih mite khawmin, a kha nihna a ni masa ni-in amaute in kum sawm nih panin a tungsiah a pha peuhmah a milipin a innkuankuan, a behbehin amau le amau a kiciamteh mihon buppite khawm uh hi. Tua ahih ciangin amah in Sinai sehnel gamah amaute a phazah a sim hi.

^20-46 Kum sawm nih panin a tungsiah a pha pasal peuhmah, a milipin, a innkuankuan, a behbehin, galdo dingin a kuan thei khempeuh, Israelʼ tacil Reuben suanlekhakte a kipanin a mi phazah a sim uh a nuai-a bang ahi hi: Reuben minam tul sawm li le tul guk le za nga a pha hi. Simeon minam tul sawm nga le tul kua le za thum a pha hi. Gad minam tul sawm li le tul nga le za guk le sawm nga a pha hi. Judah minam tul sawm sagih le tul li le za guk a pha hi. Issakhar minam tul sawm nga le tul li le za li a pha hi. Zebulun minam tul sawm nga le tul sagih le za li a pha hi. Efraim minam tul sawm li le za nga a pha hi. Manasseh minam tul sawm thum le tul nih le za nih a pha hi. Benjamin minam tul sawm thum le tul nga le za li a pha hi. Dan minam tul sawm guk le tul nih le za sagih a pha hi. Asher minam tul sawm li le tul khat le za nga a pha hi. Naftali minam tul sawm nga le tul thum le za li a pha hi. Tua ahih ciangin Israel mi a vekpi, kum sawm nih panin a tungsiah, a beh behin, Israel sung pan galdo dingin a kuan thei pasal peuhmah: A vekpi-in tul za guk le tul thum le za nga le sawm nga a pha hi.

Biakbuk lamah Levi mite Kiseh

⁴⁷ Ahih hangin Levi mite in amauʼ nam min mah a tuamin pua uh ahih manin a dangte tawh kisim khawm lo hi.

⁴⁸ Bang hang hiam cih leh Topa in Moses kiangah,

⁴⁹ “Levi minamte na sim kei dinga, Israel mite lakah amaute na simkhawm kei ding hi.

⁵⁰ Ahih hangin Levi mite pen thuciamna biakbuk le a sung nazat khempeuh le tua tawh a kisai na khempeuh a uk dingin seh in. Amaute pen biakbuk le a nazat khempeuh a pua dingte hi a, amaute in a biakbuk semin, a kimkot ah phual sat ding uh hi.

⁵¹ Biakbuk a kikhiin ding ciangin Levi mite in phel ding uh a, biakbuk a kilam ding ciangin Levi mite mah in lam ding uh hi. Midang khat peuhpeuh in tua nasep a sep leh tua mi kithat ding hi.

⁵² Israel mite in a milipun amauʼ giahphual ciat le a dialkhai gei ciat uh ah a pawlpawlin a puanbuk uh lam ding uh hi.

⁵³ Ahih hangin Israel mihonte tungah hehna a om loh nadingin thuciamna biakbuk kiimah Levi mite bek in phual sat ding uh a, Levi mite bek in thuciamna biakbuk kem ding uh hi,” a ci hi.

⁵⁴ Tua bangin Israel mite gamta uh a, Topa in Moses a thupiak bangin amaute in a sem uh hi.