Filippi 4 - Tedim Bible Revision 2017

Topa Sungah Lungdam Un

¹ Tua ahih manin sanggamte aw, note ka hong it mahmah a, nakpi takin ka hong goih hi. Note in nakpi takin kei na hong lungnuamsak uh a, note ka hong angtan pih mahmah hi. Tua hi a, sanggamte aw, Topa sungah kip takin nungta un.

² Euodia le Sintikhe, Topaʼ hangin a kilemkik ding uh ka thum nuam hi.

³ Hih numei nihte in Klement le a nungta mite a kikhumna Pasianʼ laibu sungah a kikhum, ka nasep pih dangte khempeuh tawh, lungdamna thu a kizelh nadingin nakpi takin kei tawh na hong sem khawm uh ahih manin, citakin kei tawh na a sem khawm note in zong amau tegel na huh nadingun kong thum hi.

⁴ Topa sungah lungdam tawntung un, ka hong cih sa bangin tu-in zong lungdam un, ka hong cikik hi.

⁵ Mi khempeuh tungah na dik un. Topa hong pai baih ta ding hi.

⁶ Thu khat peuhpeuh ah lunghimawh lua kei unla, na kisap bangbang uh, lungdamna tawh Pasian kiangah na ngen un.

⁷ Mihingte in a theih tel zawh loh Pasianʼ hong piak lungsim nopna in, Khris Jesu tawh na kipawlna uh hangin note hong lungnuamsak ding hi.

Ngaihsut Ding Thute

⁸ Sanggamte aw, a tawpna ah ka hong gen nop thu in, a hoih le a phat taak thute tawh na lungsim uh na kidimsak un. Tuate in: A man, a dik, a tang, a siangtho, a deihhuai le a pahtakhuai thute ahi hi.

⁹ Keima genna le ka gamtatna panin thei-in na san uh thute, nomau pumpi mahmah tawh na zui un. Tua hileh nopsakna a hong pia thei Pasian in note hong ompih ding hi.

Filippi Miteʼ Na Khakteʼ Hangin Lungdam Zaksakna

¹⁰ Topaʼ hangin ka lungdamna lian mahmah hi. Hun sau veipi khit ciangin kei na hong phawkna uh na hong langsakkik thei uh hi. Kei hong kin loin omngei uh teh, a ci ka hi kei a, na hong kinna uh na hong lah nading uh hun om thei lo, ka cihna ahi hi.

¹¹ Bangbangin om taleng a lungkim thei dingin a kisin sa ka hih manin hih bang kong gen ciangin ka kitangsapna a hong pulak nuam ka hi kei hi.

¹² Cihmawhna le cihtheihna a sin sa ka hi hi. Tua ahih manin ka hau a ka zawng zongin, ka vah a ka kial zongin, koi mun koi mun hitaleh ah a lungkim thei dingin a kisin sa ka hi hi.

¹³ Khris in a hong piak vangliatna tawh hihte khempeuh nawk zawh nading thahatna a nei ka hi hi.

¹⁴ Ahi zongin ka lungkham laitakin na hong huh manun hoih mahmah hi.

¹⁵ Na theih sa uh mah bangin Lungdamna Thu ka hilh cil lai-in noteʼ gam Masedonia panin ka paikhiat hunin no Filippi pawlpite bek mah in kei na hong huh uh a, ka ngahna le ka piakkhiatnate, note bek mah in a hong theih pih na hi uh hi.

¹⁶ Thesalonika khua ah cimawhin ka om lai-in huhna nong puak uh khatvei bek hi lo hi.

¹⁷ Note tung panin na tampi ka ngah nop man hi lo a, noteʼ hamphatna a kibehlap nading ka deihna hizaw hi.

¹⁸ Noteʼ hong piak nate kicing piikpeek hi. Epafroditas in noteʼ hong na khakte hong tunpih ahih manin ka kitangsapna khempeuh kicing kim hi. Hih nate pen Pasian biakna-in na piak uh, lungdam takin a hong san, a namtui nate ahi hi.

¹⁹ A na ka sep i Topa Pasian in ama hauhna tawh kizui-in Khris Jesu hangin noteʼ kitangsapna khempeuh hong pia ding hi.

²⁰ I Pa Pasian in a tawntungin minthanna ngah tahen. Amen.

Vaikhakna

²¹ Khris Jesu sungah a om mi siangthote khempeuh na na hopihsak un. Kei tawh a om khawm kamsangte khempeuh in zong note hong hopih uh hi.

²² Hih lai-a om Khristian khempeuh, a diakdiakin kumpi nasem i lawmte in note hong hopih uh hi.

²³ Topa Jesu Khris hehpihna thupha, note khempeuh tungah hong tung tahen.