Ezra 4 - Tedim Bible Revision 2017

A Galte un Nasep Khawlsak

¹ Salsuahna panin a hong ciahkik mite in Israel Pasian Topa adingin biakinn khat a lamna thu Judah le Benjamin miteʼ galte in a zak uh ciangin

² Zerubbabel, Jeshua le innkuan lutangte kiangah va pai-in amaute kiangah, “Biakinn lamna ah ko zong hong kihelsak un; bang hang hiam cih leh note mah bangin ko zong na Pasian uh ka bia uh a, hih lai ah kote hong koih Assiria kumpipa Esar-haddonʼ hun lai a kipanin noteʼ Pasianʼ tungah biakna ka pia uh hi,” a ci uh hi.

³ Ahih hangin Zerubbabel le Israel sunga innkuan lutang a omlaite in amaute kiangah, “Koteʼ Pasian adingin ka lam uh biakinn pen noteʼ hong lunghihmawh pih ding hi lo hi. Persia kumpipa Sairas in kote hong thupiak sa bangin Israel Pasian, Topa adingin ko teng guak mah in ka lam ding uh hi,” a ci uh hi.

⁴ Tua ciangin tua gam a teeng midangte in Judah mite lungkiasakin biakinn a lam zom lai ding uh a lausak uh hi.

⁵ Amauʼ ngimna a tangtun theih loh nadingin amaute in a langpang dingin zum nasemte golhguk pia uh hi. Persia kumpipa Sairasʼ hun a kipan kumpi Darias hun dong hih bangin hih ngitnget uh hi.

⁶ Ahasueras in uk ding hong kipat ciangin Judah gam le Jerusalem-a a teengte a khiatna thu tua gamah a na teeng sate in lai-in a gelh uh hi.

⁷ Tua ciangin Persia kumpi Artakzaksis hun ciangin Mithredath, Tabeel le a lawmte uh thukimna tawh kumpipa tungah lai gelh uh a, a lai pen Aram lai-in kigelh a, Aram pau mahin kisim khia hi.

⁸ Menzipipa Rehum le lai-at pa Shimshai in Kumpi Artakzaksis tungah Jerusalem tawh kisai thu a nuai-a bangin gelh uh hi.

⁹ Menzipipa Rehum, lai-at Shimshai le a lawmte khempeuh, thukhente, mangpite, thuvaante, uliante, Erek khuami le Babylon khuami, Susa khua-a om Elam mite,

¹⁰ le a lian a minthang Ashurbanipal in hong pua khia-in Samaria khuapi ah a hong tensak mite le Eufratis Gun lang khat a kizawhna gam sunga a om mite tung panin lai puak, a ci uh hi.

¹¹ A lai sung thu hih a nuai-a bang ahi hi: “Artakzaksis Kumpipa tungah, Eufratis Gun gal gam a om na nasemte in hopihna kam kong puak uh hi.

¹² “Nangma kiang panin ko kiangah a hong pai Judah mite, tu-in Jerusalem ah tung khin uh a, a gilo, mi lehdo thei ahi khuapi pen amaute in lamkikin, amaute in a khua bulpi vel khinin, kulhpi cian a kipat khitna thu thei in.

¹³ Amauʼ khuapi kilam kikin kulhte kizo leh amaute in siah ahi a, mangmu ahi a, losap ahi zongin hong pia nawn lo ding uh a, a tawpna ah kumpi hong sukkhak ding thu thei in.

^14-15 Kote in kumpipa tawh thuciamna kip nei khin ka hih manun kumpipaʼ min siatna ka muh ding uh kilawm lo hi. Tua ahih manin nangma mai-a a semteʼ thuciaptehna laibute a ki-etkik theih nadingin kumpipa tungah thu kong zasak uh hi. Thuciaptehna laibu sung en lecin hih khuapi pen a lehdo thei khuapi, kumpipa tung le a ukna gamte tungah siatna a piangsak, kumpi dona a khua sungah a om tawntungna thu na mu khia ding hi. Hih khuapi a kisukcipna zong hih thu hang mah ahi hi.

¹⁶ Hih khuapi kilam kikin a kulhte kizo khin leh Eufratis Gun gal gam na uk nawn loh nading thu, nangma tungah kong thei kholsak uh hi,” a ci uh hi.

¹⁷ Tua ciangin kumpipa in a lai uh hih bangin thuk hi: “Menzipipa Rehum, lai-at pa Shimshai le Samaria le Eufratis Gun gal gam sunga om na lawmte khempeuh uh tungah hopihna lai kong khak hi.

¹⁸ “Keima tungah nong khak uh lai pen a kitel takin keima zakna ah hong kisim khin hi.

¹⁹ Keimah in hih thu a kikanna ding thu ka pia a, tu-in kikantel khinta hi. Tanglai a kipanin hih khuapi pen kumpi langah pangin, hih khua sungah lehdona le kumpi dona a om ngitngetna thu kimu khia hi.

²⁰ A vanglian kumpite in Jerusalem ah uk ngei-in, Eufratis Gun gal gambup tungah aana zang uh a, siah, mangmu le losapte tua kumpite tungah kipia hi.

²¹ Tua ahih ciangin hih mite a nasep uh a khawl nading thu pia in. Keimah in thu kong piakkik mateng hih khuapi kilamkik lo ding hi.

²² Hih thu tawh kisai-in na sep ding don loin om mawk kei in. Tua hikeileh kumpi tungah siatna le gimna hong khang ding hi,” a ci hi.

²³ Menzipipa Rehum, lai-at Shimshai le amauʼ lawmteʼ zakna ah Kumpi Artakzaksis tung panin a kingah lai a kisim ciangin, Jerusalem ah amaute pai pahin Judah mite a nasep uh aana tawh a khawlsak uh hi.

²⁴ Tua hun a kipanin Jerusalem-a om Pasianʼ biakinn a kisepna a khawl hi. Persia kumpi Dariasʼ uk a kum nihna dong tua bangin a khawlcip phot hi.