Ezra 1 - Tedim Bible Revision 2017

Sairasʼ Taangkona

¹ Persia kumpi Sairasʼ uk kum khatna kumin, Jeremiah tungtawnin Topaʼ thugen a tun theih nadingin, ama gam sung khempeuh ah taangkona khat bawlin lai-in zong a gelh nadingin Persia kumpi Sairasʼ lungsimah Topa in a suaksak hi. Amah in hih bangin a hih hi:

² “Persia kumpi Sairas in hih bangin ci hi: Vantung Pasian, Topa in leitung kumpi gam khempeuh keima tungah hong pia khin a, Judah gam sung Jerusalem khua ah ama adingin biakinn khat ka lamsak ding hong sawl hi.

³ Note lakah ama mi peuhmah a Pasian in ompih henla, Judah gam sung Jerusalem khua ah pai to henla, Israel Pasian, Topaʼ biakinn lamkik hen. Amah pen Jerusalem ah a om Pasian ahi hi.

⁴ Tua ciangin koi lai mun koi lai gam a om hitaleh Judah mi a om lai khempeuh, ama omna mun mite in Jerusalem-a om Pasianʼ biakinn adingin utthu-a a piakte uh banah, ngun le kham, nate le ganhingte tawh zong huh ciat uh hen,” a ci hi.

Jerusalem ah Salte A Ciahkikna

⁵ Tua ciangin Judah le Benjamin sunga innkuan lutangte le siampite le Levi mite, Jerusalem khua-a om Topaʼ biakinn a lamkik dingin a lungsim sung uh ah Pasian in a suahsak mite khempeuh kithawi uh hi.

⁶ Tua ciangin a veeng a pamte in thatang tawh a huh uh banah ngun tawh kibawl umlebeel, kham, van tuamtuamte, ganhingte le letsong manphate tawh huh thuah lai uh hi.

⁷ Tua tham loin, Nebukhadnezzar in Jerusalem panin pua khia-in ama pasian-teʼ biakinn sungah a koih sa ahi Topaʼ biakinn-a omngei umlebeelte zong kumpipa Sairas in pusuah hi.

⁸ Persia kumpi Sairas in hihte pusuah in sumkem pa Mithredathʼ khut sungah ap hi. Tua pa in Judah ukpa Sheshbazzar adingin a malzah simin sazian bawlsak hi.

⁹ Tua nate a phazah: Kham kuang tul khat, ngun kuang tul khat, umlebeel a nam tuamtuam sawm nih le kua,

¹⁰ kham kuang-uk sawm thum, ngun kuang-uk a nam tuamtuam za li sawm khat, le umlebeel a dang tul khat ahi hi.

¹¹ Kham le ngun kibawl umlebeelte khempeuh a vekpi-in tul nga za li sawm guk kua pha hi. Tua hi a, Babylon panin salte a kiciahpihkik ciangin Sheshbazzar in tua nate khempeuh Jerusalem ah a ciahpih hi.