Efesa 5 - Tedim Bible Revision 2017

Khuavak tawh A Kilawmin Gamta Un

¹ Note pen Pasian in a hong it a tate na hih manun amah tawh na kibat nadingun hanciam un.

² Khris in eite a hong it manin Pasian in eiteʼ mawhna hong maisak theih nadingin a namtui biakna-in Pasian kiangah a kipiak mah bangin note zong itna tawh na gamta un.

³ Note pen Pasianʼ mi na hih manun note lakah nulepa khialhna, a kilawm lo-a gamtatna, huaihamna cihte genin zong na nei vet kei un.

⁴ A kilawm lo-a kampauna le ciamnuih hoih lo cihte zong na zang kei unla, Pasian tungah lungdamkohna kam na pau zaw un.

⁵ Nulepa khialhna a gamta mi, a kilawm lo-a a gamta mi le a huaiham (huaihamna zong milim biakna zahin sia hi) mite in Khris Ukna le Pasian Ukna sungah bangmah ngah nei het lo ding ahihna uh teltakin thei ta un.

⁶ Hih bang mawhnate i bawl hangin phamawh kei, ci-in a mawk gen miteʼ khem sa-in ta kei un. Pasian thu mang loin hih bangin a gamta mite in Pasianʼ hehna a thuak ding uh ahi hi.

⁷ Tua ahih manin tua bangin a gamta mite tawh kisu kha vet kei un.

⁸ Note pen khuamial sungah a omngei hi napi-in, Topaʼ mi na suah khit uh ciangin khuavak sungah a om hi ta na hih uh manin khuavak sungah a om mite bangin na gamta un.

⁹ Bang hang hiam cih leh khuavak sunga omna in a hoih, a man, a thutakte hong piangsak hi.

¹⁰ Bang teng in Topa lungkimsak ahi hiam, ci-in kan un.

¹¹ Khuamial gamtatna, bangmahin a kimang lo nasepnate su vet kei unla, tua bang gamtatnate a hoih lohna pholak zaw un.

¹² Kuama theih lohin a simthamin a hihte uh gen ding nangawnin zong zumhuai lua hi.

¹³ Na khat peuhpeuh khuavak ah pusuah lehang a pianzia man taktak hong kilang hi.

¹⁴ Tua ahih manin la sungah, “A ihmu mi aw, khanglo inla, sihna panin tho in. Tua hileh Khris in nang hong taan ding hi,” kici hi.

¹⁵ Tua ahih ciangin hoihtakin kingaihsunin gamta unla, mihaite bang hi loin mipilte bangin gamta un.

¹⁶ Tu hun pen hunhoih lo hun ahih manin na hun neih khempeuh uh a hoih lamin zang un.

¹⁷ Tua ahih manin hai om mawk kei unla, Topa in bang a sem dingin hong deih ahi hiam, ci-in kan un.

¹⁸ Zu in mi siasak thei ahih manin zu ne kei unla, Kha Siangtho tawh a kidimin om zaw un.

¹⁹ La a tuamtuamte genin sakna tawh Topaʼ thu gen belin nei unla, na lungsim khempeuh uh tawh Topa phatna la sa un.

²⁰ I Topa Jesu Khris hangin thu khempeuh ah Pa Pasian tungah lungdamna ko ta un.

Nupa Thu

²¹ Khris na zahtakna uh hangin na thu uh na kimang tuak un.

²² Zite aw, Topaʼ thu na man uh mah bangin na pasalte uh thu na mang un.

²³ Bang hang hiam cih leh Khris pen ama pumpi ahi pawlpi a hon khia pa hi-in, pawlpi tungah ukna thu a neih mah bangin pasal in a zi tungah ukna thu a nei ahi hi.

²⁴ Pawlpi pen Khrisʼ khutnuai ahih mah bangin zite zong thu khempeuh ah a pasalte uh khutnuai hi ding uh hi.

²⁵ Pasalte aw, Khris in pawlpi itin a pumpi a piak mah bangin na zite uh na it un.

^26-27 Pawlpi pen paubaanna a om het lo, a siangtho mahmah in Khris kiangah a kipiak theih nadingin Pasian thu tawh tui ah a silsiang khit ciangin Pasian kiangah a ap theih nadingin pawlpi adingin Khris a kipia ahi hi.

²⁸ Tua mah bangin pasalte in zong amau pumpi zah mah bangin a zite uh a it ding uh ahi hi. A zi a it mi pen amah a ki-it mi ahi hi.

^29-30 Eite pen ama pumpi nate ihihna hangin Khris in hong it mah bangin kuamah in ama pumpi mudah ngei lo a, hoihtakin kemin a vak zaw hi.

³¹ Tua ahih manin Lai Siangtho in, “Hih thu hangin pasal in a nu le a pa nusia-in a zi tawh kigawm dinga, amau tegel khat a suak ding uh hi,” na ci hi.

^32-33 Pasalte in amau pumpi zahin a zite uh itin, zite in zong amau pumpi zah mahin a pasalte uh a it ding uh ahih mah bangin, Lai Siangtho in hih bangin a gen ciangin a thuk zaw khat, Khris le pawlpi a ki-itna a gen nopna ahi hi, ci-in ka ngaihsun hi.