Efesa 4 - Tedim Bible Revision 2017

Kha Siangtho Hangin Pum Khat Hihna

¹ Tua ahih ciangin Topaʼ na ka sepna hangin thong a kia keimah in noteʼ nuntak zia dingin a hong deihna tawh a kilawm a kituakin na nuntak nadingun ka hong hanthawn hi.

² Kiniamkhiatin, thunemin, lungduai-in om tawntung un. Khatlekhat kihuhna tawh na ki-itna uh kilangsak un.

³ Kha Siangtho kimakai sakin, khatlekhat kilemin pawl khat na hihna uh na kipsak tawntung un.

⁴ A kibang lametna khat bek a ngahkhawm dingin Pasian in note hong sap mah bangin eite khempeuh pum khat bek hi-in Kha Siangtho zong khat bek mah a neikhawm ihi hi.

⁵ Topa khat bek, upna khat bek, tuiphumna khat bek mah a zangkhawm ihi hi.

⁶ Mi khempeuhʼ Pa ahi Pasian khat bek om a, mi khempeuhʼ Topa hi-in, na khempeuh hih kimin, mun citeng ah a om hi.

⁷ Ahi zongin eite khempeuh in Khris hong piakna tawh kizui-in siamna a tuam khat ciat i ngah hi.

⁸ Tua ahih manin Lai Siangtho sungah, “A sangna munah a pai toh ciangin mat sa salte tampi paipih a, mite tungah letsong a pia hi,” ci-in na kigelh hi.

⁹ “Pai to,” a cih ciangin bang a cihnopna ahi hiam cih leh, lei sung a thuk penna munah pai suk masa khinzo, a cihnopna ahi hi.

¹⁰ Tua ahih manin mun khempeuh ah a omkim khit theih nadingin a pai suk mipa pen mah vantung a sang pen dawn nangawn kheng to-in na pai to hi.

¹¹ Amah in mite tungah siamna a tuamtuam hong pia a, pawl khatte sawltak nasep a sem ding, pawl khatte kamsang nasep a sem ding, pawl khatte thuhilh kawikawi nasep a sem ding, pawl khatte pawlpi kem nasep a sem ding le pawl khatte laihilh nasep a sem dingin a hong seh hi.

¹² Hih nasep a tuamtuamte khempeuh a sem dingin Pasianʼ mi khempeuh kiging kholsakin Khris adingin na semin Khris pumpi a khansak theih nading deihna ahi hi.

¹³ Tua hileh Pasianʼ Tapa i theihna le i thu upna ah kithukhatin, eite a khang cing suakin, Khrisʼ cingtaakna ciang i ban to ding hi.

¹⁴ Tua hun ciangin thu upna lamah naupang ihi nawn kei dinga, mite khemin a khialsak theiteʼ mutna hangin i suk hoi i to hoi nawn kei dinga,

¹⁵ itna lungsim tawh thutak genin, lutang ahi Khris tawh i kibat dongin i khangto ding hi.

¹⁶ Ama ukna mangin pumpi na a tuamtuamte a kituak takin kizom a, amaute limtakin a kizop dimdiamna hangin pumpi pen pum khat a suak thei hi. Pumpi na a tuamtuamte in amauʼ sep ding ciat hoihtakin a sep uh ciangin itna hangin pumpi khangin a cingtaak a suak thei hi.

Khris hangin Nuntakna Thak

¹⁷ Tu-in Topaʼ min tawh limtakin note kiangah ka hong gen nop thu in: Thu um lo dawi biate bangin gamta nawn kei un. Amauteʼ thu ngaihsutte a kimang bangmah om lo a,

¹⁸ a ngaihsutnate uh khuamial tawh kibang hi. Amauteʼ lungsim khauhin bangmah thei het lo uh ahih manin Pasianʼ hong piak nuntakna nei kha het lo uh hi.

¹⁹ Amaute in maizumna mel thei nawn lo uh a, siatna sung tungin, a ututun a kilawm lo pipi-in gamta uh hi.

²⁰ Tua bang gamtatnate pen Khris thu panin na theihkhak uh hi lo hi.

²¹ Note in Khris thu na zak sa uh hi a, ama nungzui na hih manun Jesuʼ thutakna na theih sa uh ahi hi.

²² Zuauna lungsim in a suksiat khit sa, nidangin na nuntakna ngei uh ahi na pian lui uh paikhia unla,

²³ na lungsim uh le na ngaihsutna uh thaksuaksak un.

²⁴ A thutang a siangtho ahihna thu, nuntakna mahmah panin a kilangsak, Pasianʼ pianzia tawh kibangin a kibawl na ngeina thak uh bangin na nungta un.

²⁵ Tua ahih manin zuaugen nawn kei unla, Khris pumpi nate ihihna hangin pawl khat ihih manin khatlekhat tungah thuman kigen ni.

²⁶ Na heh uh ciangin, tua hehna hangin khial kha kei unla, a tawntungin heh paisuak kei un.

²⁷ Dawimangpa in hong suksiat theih nading hun omsak kei un.

²⁸ Guta ngeite in gu nawn loin, ama nuntak nading thuman takin thalawhin, mizawngte zong a huh theih lai nadingin thatang tawh nasep ding kipan ta uh hen.

²⁹ Na kiho uh ciangin kamguh zang kei unla, na pauna uh a za mite in phattuamna a ngah theih nadingin na-in a kimang kam hoihte bek na pau un.

³⁰ Ni khat ni ciangin Pasian in note hong tatkhiat taktak nading thu a ciantakin hong lahna le Pasianʼ neihsa na hihna uh hong ciaptehna-in Kha Siangtho hong pia ahih manin, tua Pasianʼ Kha Siangtho na dahsak kei un.

³¹ Kimuhdahna, hehna, thangpaihna, kitotna, kikona, kilungsim neihna khempeuh beisak unla,

³² khatlekhat kihehpihin, lungsim nem tawh na kiho zaw unla, Khrisʼ hangin Pasian in noteʼ mawhna hong maisak mah bangin khatlekhat na mawhna uh na kimaisak ta un.