Efesa 3 - Tedim Bible Revision 2017

Gentail mite ading Paulʼ Nasepna

¹ No Gentail mite hangin Jesu Khris thu tawh kisai-in thong kia keimah Paul in Pasian kiangah thu ka ngen hi.

² Noteʼ phattuam nadingin Pasian in hong hehpihna tawh hih nasep a sem dingin a hong sawlna thu na theih sa uh ahi hi.

³ Lai ka hong khak sate sungah a tomno-in kong gen sa bangin Pasian in ama thusim kei tungah hong hilh khinzo hi.

⁴ Tua ka laigelh na sim le-uhcin Khris tawh kisai a thusim ka theihna thu na phawk ding uh hi.

⁵ A beisa hunah tua thusim pen kuama tungah kigen lo a, ahi zongin Pasian in tu-in a siangtho a sawltakte le a kamsangte tungah Kha Siangtho a hilhsak hi.

⁶ Tua thusim pen: Lungdamna thu a kihilhna hangin Gentail mite in Jew mite tawh Pasianʼ thupha ngahkhawm thei a, amaute tawh pawl khat suakin, Pasian in piak dingin a ciam thute, Khris hangin a ngah khop theihna uh ahi hi.

⁷ Tua lungdamna thuhilh a sem dingin Pasian in a tuam vilvelin ama vangliatna tawh kei a hong seh hi.

⁸ Pasianʼ mi khempeuh lakah kei a neu pen hi napi-in, Khris hangin a kigen zo lo thu manpha ahi Lungdamna Thu, Gentail mite lakah a gen ding,

^9-10 le Pasian in a geel sim thute a kisep khiatna thu mi khempeuh a musak dingin Pasian in kei tungah hih hamphatna hong pia hi. Tu hun laitakin vantung a uk van mite in pawlpiʼ hangin Pasianʼ pilna a nam tuamtuamin a muh theih nadingun na khempeuh a bawl Pasian in a beisa hunah hih thu khempeuh a imcip hi.

¹¹ Pasian in a tawntungin a ngimna a om sa bangin i Topa Khris Jesu nasepna tawh a ngimna a hong tungsak hi.

¹² Amah tawh i kipawlna le amah i muanna hangin kimuang takin Pasian kiangah pai theih nading hun i nei hi.

¹³ Tua ahih manin note hangin ka thuakna pen noteʼ phattuam nading ahih manin tua ka thuakna thu hangin lungkiatna-in na nei kei un.

Khrisʼ Hong Itna

^14-15 Hih ama geelna teng ka ngaihsut ciangin, vantung a tung khin sa mite le leitungah a om lai mite khempeuhʼ pianna i Pa Pasianʼ mai ah ka khukdin a,

¹⁶ noteʼ lungsim a thahat nadingin Pasian in a kicing ama vangliatna sung panin a Kha Siangtho tawh note hong tha khauhsakin,

¹⁷ na upna hangun note lungsim sungah Khris hong teengin, itna thu ah zung thuk kha-in bulkip na neih nadingun thu ka ngen hi.

¹⁸ Tua hileh note in Pasian mi ahi midangte khempeuh tawh Khris hong itna bangzah takin sau-in zai a, bangzah takin thukin sang ahi hiam, cih na thei khawm ding uh hi.

¹⁹ Khris hong itna a kicing takin theih khit zawh loh ding ahi ta zongin note in thei-in, Pasian thu a cingin na theih nadingun thu ka hong ngetsak hi.

²⁰ Eite adingin na a hong sepsak, eiteʼ ngetzah val le i ngaihsut zawh loh zah dongin a vangliatna tawh tampi tak a hong hihsak thei

²¹ eiteʼ Pasian pen, pawlpi mite khempeuh le Khris Jesu tawh a kipawl mi khempeuh in a khangkhangin a tawntungin phat ciat ta uh hen. Amen.