Daniel 7 - Tedim Bible Revision 2017

Daniel in Ganhing Li Maangin Mu

¹ Belshazzar, Babylon kumpi a suah zawh a kum masa kumin keimah Daniel in mang khat ka man a, zanin maang ka mu hi. Ka mangmat lai-in ka gelh a, tua zan a ka maangmuhnate ka ciaptehna hih bang ahi hi:

² Mun khempeuh panin huihpi hong nungin tuipi tung a seem gawp hi.

³ Tua ciangin tuipi sung panin a kibang lo sa golpi li hong pusuak to uh hi.

⁴ A masa pen humpinelkai tawh kibang a, ahi zongin muvanlai kha tawh a kibang kha a nei hi. Ka et laitakin a kha tegel a hong kibot khia hi. Leitung panin tua ganhing kidom kaang to-in, mihing bangin a khe nihin kidingsak a, mihing lungsim ama tungah a kipia hi.

⁵ Tua ciangin a nihna sapi vompi tawh a kibang khat ka mu hi. A nung lam khe tawh dingin a ha tawh nakguh thum pet a, “Na duh zahzah sa tampi ne in,” cihna aw khat a hong ging hi.

⁶ Ka et lai leh kamkei tawh a kibang sapi dang khat ka mu hi. A nungzang ah vasa kha tawh a kibang kha li a nei hi. Tua sapi in lutang li nei a, ukna aana ama tungah a kipia hi.

⁷ Ka et lai leh sapi lina ka mu hi. Tua sapi kihtakhuai mahmah a, lipkhaphuai-in a thupi mahmah hi. Amah in a gol mahmah sik-ha a nei hi. Amah in nene-in a nek val teng a khe tawh a tuancil gawp hi. Sapi dangte tawh kibang loin amah in ki sawm a nei hi.

⁸ Tua kite ka et laitakin tuateʼ lakah a dang ki neu khat hong po a, a om sa sung pan ki thumte a bot khia hi. Tua kiʼ tungah mihing mittang tawh a kibang mittang le kam om a, kiphatsakna kam tampi a pau hi.

⁹ Ka et laitakin kumpi tokhomte a hong kikoih hi. A nungta tawntung mipa tua tokhomte khat tungah a tu hi. A puante vuk bangin ngo a, a samte tuumul hoih tawh a kibang hi. A tokhom pen meikuang leengpei tungah kinga-in mei kuang zuazua a,

¹⁰ tua sung panin meikuang a hong leeng khia niloh hi. Ama nasem ding mihing tul za tampi om a, a mai ah mihing tul za sawm tampi a ding uh hi. Thukhenna ding hun kipan a, laibute a kiphen hi.

¹¹ Ka et laitakin tua ki neu in kiphatsakna kamsia a pau ka za hi. Ka et lailai leh tua sapi lian a lina kithat a, a pumpi meikuang sungah kikhulin a kisusia hi.

¹² Sapi dangte ahihleh a vangliatna uh kilak khiatsak a, ahih hangin a nuntak lai nading uh hun ciangtan khat a kipia hi.

¹³ Zan ka maangmuh hun sungin ka khuadak leh mihing tawh a kibang mi khat meii tungah a hong pai ka mu hi. A nungta tawntung mipa kiangah pai-in, ama kiangah a kipia hi.

¹⁴ Amah in vangliatna, minthanna le kumpi za ngah ahih manin minamkimte, minam tuamtuamte, pau nam tuamtuamte khempeuh in ama na a sem ding uh ahi hi. Amah in a tawntungin uk dinga, a kumpi gam a bei ngei kei ding hi.

¹⁵ Ka maangmuhnate in hong liing lawng sakin a hong patausak mahmah hi.

¹⁶ Ka pam a ding mite khat kiangah pai-in hihte khempeuh a khiatna hong hilh in, ci-in ka thum hi. Tua ciangin amah in a khiatna a hong hilh hi.

¹⁷ “Hih sapi lite pen leitung panin a hong khang khia ding kumpi gam li ahi hi.

¹⁸ Ahih hangin a Lianpen Pasianʼ mite in kumpi za ngah ding uh a, a tawntungin a nei paisuak ding uh hi,” hong ci hi.

¹⁹ Tua ciangin a dangte tawh a kibang lo a kihtakhuai sik-ha le sumngo khecin a nei sapi lina thu ka thei nuam hi. Amah in nene-in na khempeuh tuancil gawp hi.

²⁰ Tua ciangin a lu tungah ki sawm le, a nung ciangin ki khat hong po a, a om sa kite sung pan ki thum a kitanna thu ka thei nuam hi. Amah in mittang le kiphatsakna kamsia pauna ding kam a nei hi. A dangte sangin nakpi takin kihtakhuai zaw hi.

²¹ Ka et laitakin, tua ki in Pasianʼ mite galin do a, amaute a zo gawp hi.

²² Tua ciangin a nungta tawntung mipa hong pai a, a Lianpen Pasianʼ mite ading a hoih thukhenna a hong gen hi. Pasianʼ mite in kumpi za a ngah nading uh hun a hong tung hi.

²³ Hih bangin hilh telna kei a hong kipia hi: “Sapi lina pen leitung a hong om ding kumpi gam lina ding hi a, kumpi gamdangte tawh kilamdang mahmah ding hi. Amah in leitung buppi valh tum dinga, tuancil gawpin a sukham ding hi.

²⁴ “Ki sawmte pen tua kumpi gam sung panin a hong piang ding kumpi sawmte ahi uh hi. Tua ciangin kumpi dang khat hong piang leuleu dinga, amah in a om sate tawh a kilamdang mahmah in kumpi thum a nuaisiah ding hi.

²⁵ “Amah in a Lianpen Pasian langpangin thu gen dinga, Pasianʼ mite a bawlsia ding hi. Amah in amauteʼ biakna tawh kipawl thukhamte le pawi bawlna hunte kheelsak ding hanciam dinga, ama khut sungah kum thum le alang sung Pasianʼ mite a om ding uh hi.

²⁶ “Tua ciangin thukhenna hun hong kipan dinga, ama vangliatna lak khiatsakin, amah a kisusia maimang ding hi.

²⁷ “Hih leitung kumpi gam, vangliatna le liatna khempeuh a Lianpen Pasianʼ mite tungah a kipia ding hi. Amauʼ kumpi za cikmah hunin bei ngei lo dinga, leitung ukna za a nei khempeuhte in a thu uh mangin amauteʼ na a sem ding uh hi,” hong ci hi.

²⁸ Hih tangthu a beina hi ta hi. Hih thu ka ngaihsut ciangin keimah Daniel ka lau mahmah a, ka mel a daang gawp hi. Ahih hangin hih thu keima lungsim sung bekah ka koih hi.