Amos 3 - Tedim Bible Revision 2017

Kamsang paʼ Nasep

¹ Israel mite aw, noteʼ lang khat a Topaʼ thugen, hih thu limtakin ngai un: Egypt gam panin na minam bupun note kong paikhiatpih hi.

² Leitung minam khempeuh lakah note bek hong thei-in, note bek ka hong don hi. Tua ahih manin na khialhna khempeuh uh hangin note gim kong pia ding hi.

³ Mi nih, thukimna om masa lopi-in lampi ah tonkhawm thei uh ahi hiam?

⁴ A samat ding mu lopi-in, gamlak ah humpinelkai mawk hawk ahi hiam? Samat nei lopi-in, a kua sungah humpinelkai khanglai mawk hawk ahi hiam?

⁵ Thang antah om lopi-in leilak a thang ah vasa mawk awk ahi hiam? A su khat om lopi-in, thang kimawk sai ahi hiam?

⁶ Khuapi sungah pataukohna gal peengkul a kitum ciangin mite lau loin om mawk thei ahi hiam? Topaʼ tunsak lohpi-in khuapi sungah lauhuaina mawk tun ahi hiam?

⁷ Topa Pasian in ama nasem kamsangte tungah ama geelna theisak masa lopi-in bangmah hih het lo hi.

⁸ Humpinelkai a hawk ciangin lau loin ki-om thei ahi hiam? Topa Pasian in thu a gen ciangin kua in ama thu gen loin om thei ding ahi hiam?

Samaria A Siatna

⁹ Samaria gam munmuanhuai ah a om mite le Egypt gam munmuanhuai ah a om mite tungah thu zasak unla, “Samaria ah hong kikhawm unla, tua lai-a buaina lianpite le kinenniamnate hong mu un,” ci un.

¹⁰ Topa in hih bangin ci hi: Hih mite in a manin gamtat ding thei lo uh a, gilo mahmah uh a, miʼ na a suh uh vante tawh a inn lianpipite uh kidimsak uh hi.

¹¹ Tua ahih ciangin galte in a gam uh umcihin, a panmun muanhuai teng uh susia gawp dinga, a inn lianpipite uh luh gawp ding uh hi, Topa in ci hi.

¹² Topa in hih bangin ci hi: Humpinelkaiʼ nek baang tuu khebom nih ahi a, a bil them khat bek ahi zongin tuucingpa in a ngah tei mah bangin, tutphah nip kiu khat le lupna them khat tawh a kibang, Samaria sungah a om Israel mi tawmno khat suakta tei ding hi.

¹³ Tu-in ngai un: Jakobʼ suanlekhakte hilh khol un, Vanglian Pasian ahi, Topa Pasian in ci hi.

¹⁴ Amauʼ khialhna hangin Israel gim ka piak ni ciangin, Bethel a biakna taute zong ka susia dinga, biakna tau kite kitanin leilak ah kia ding hi.

¹⁵ Keimah in phalbi le khuakhal innte ka susia dinga, saiha tawh a kibawl inn hoihte zong kisia-in, inn lian khempeuh bei mang ding hi, Topa in ci hi.