3 JOHAN THUMNA 1 - Tedim Bible Revision 2017

Hopihna

¹ A khangham bel keimah Johan in Lungsim takpi tawh ka hong it ka lawm Gaias tungah lai ka hong khak hi.

² Ka lawm it Gaias aw, nang na ci damin na vai khempeuh zong na maa pai ding hi, ci-in ka lamen hi. Kha thu tawh kisai lamsang ah zong bangmah lungkhamna om lo ding hi, ci-in ka thei hi.

³ Nang a mantakin a gamta na hih takpi mah bangin, i Khristian mipih hih lai-a hong pai peuhpeuh in a mantakin na nuntakna thu hong gen uh ahih manin ka nuam mahmah hi.

⁴ Tate bangin ka hong neih mite a mantakin a gamtatna uh ka zakna hangin ka lungdamna sangin a dang lungdamna lian zaw bangmah om lo hi.

Gaiasʼ Zin Do Siamna Kiphat

⁵ Ka hong it lawm Gaias aw, na theih ngei loh hi napi-in i Khristian mipihte lungsim takpi tawh na na huh hi.

⁶ Amaute na limbawlna thu, hih lai-a pawlpite kiangah hong gen uh hi. I biak Pasianʼ deihna tawh kituakin a khualzinna uh nuam takin a zoptheih nadingun na huh in.

⁷ Amaute pen Pasianʼ nasem dingin a khualzin khia uh hi a, thu um lo mite tung panin bangmah huhna ngah lo uh hi.

⁸ Tua ahih manin Pasian thuman nasepna ah nasem khawm mite ihih theih nadingin ei Khristiante in hih bang mite i huh ding ahi hi.

Diotrefes in a Langpanna

⁹ Na pawlpite kiangah lai ka gelh ngei hi. Ahi zongin na pawlpi sungah mi lian pen a ut Diotrefes in ka thugen hong mang nuam lo hi.

¹⁰ Tua ahih manin kong pai ciangin kote hong gensiatna, zuau thu a genna le a gamtatna khempeuh ka pholak ding hi. Tua bang mi gensiatna ciang bek hi loin, i Khristian mipihte zin nangawn tungsak nuam lo a, zin a tungsak nuamte nangawn khamin, pawlpi panin hawlkhiat ding hanciam lai hi.

Demetrias A Kiphatna

¹¹ Ka hong it lawm Gaias aw, mihoih loteʼ gamtatna zui kei inla, mihoihteʼ gamtatna zui in. A gamtat hoih mite pen Pasian tawh a kipawl mi hi a, a gamtat hoih lo mite pen Pasian a thei nai lo ahi uh hi.

¹² Mi khempeuh in Demetrias phatkim uh a, a manin ama gamtatna mahmah in hih thu a manna hong kilangsak hi. Kote in zong ama hoihna ka thei uh a, tua ama hoihna ka gennate uh a thuman ahi hi.

Vaikhakna

¹³ Gen ding tampi ka neih hangin lai-in gelhkhiat ding kong sawm kei zaw hi.

¹⁴ Nang tawh kimu baih thei dingin kilamen ka hih manin, tua hun ciangin maitang kimu-in i kiho ding hi.

¹⁵ Nangma tungah nopsakna thupha hong tung tahen. Hih lai-a om i lawmte in hong hopih uh hi. Tua lai-a om i lawmte khempeuh a milipin na hopihsak in.