2 TIMOTI NIHNA 2 - Tedim Bible Revision 2017

Khris Jesuʼ Galkap Hoih

¹ Ka ta aw, nang na hih leh Khris Jesu tawh i kipawl manin i ngah hehpihna hangin thahatin om in.

² Mi tampiteʼ theihin ka thuhilh, na zak sa thu khempeuh, midangte a hilh sawn thei dingin a citak mite tungah hoihtakin a zuih dingun na hilh in.

³ Khris Jesuʼ galkap hoih hihna tawh thuak dingin a kisam khempeuh na na thuak in.

⁴ Galkap a sem lai mipa in ama tungah a om bupa a lungkimsak theih nadingin na sem ahih manin tualsung miteʼ nasep tawh thuah khawm lo hi.

⁵ Kimawl kidemna ah a kihel mi khatpeuh in kimawlna ngeina zui lopi-in gualzawh pahtawina ngah thei lo hi.

⁶ Hahkat takin lo a kho pa in anlak hun ciangin a tam pen a ngah dingin a kilawm ahi hi.

⁷ Topa in thu khempeuh na theih nadingin hong huh ding ahih manin hih ka thugente khempeuh limtakin na ngaihsun in.

⁸ Lungdamna Thu ka hilhna sungah ka gen mah bangin Davidʼ suan, sihna panin a kithosak Jesu Khris na na phawk in.

⁹ Ama hangin a kingah Lungdamna Thu ka hilh manin gimna ka thuak a, mi that bangin sikkol hong kibulh hi. Pasianʼ thu ahihleh sikkol kibulh thei lo hi.

¹⁰ Tua ahih manin Pasianʼ teel mite in zong Khris Jesu hangin hotkhiatna le tawntung minthanna a ngahkhawm theih nadingun amauteʼ hangin na khempeuh ka thuak hi.

¹¹ Tua ahih manin, “Amah tawh i sih khawm le amah tawh i nungta khawm ding hi.

¹² Eite in gimna i thuak paisuak zawh leh amah tawh i uk khawm ding hi. Amah i nial leh amah in zong eite hong nial ding hi.

¹³ Amah le amah kikhem thei lo ahih manin eite i citak kei zongin amah citak veve ding hi,” ci-in a kigenna thu man mahmah hi.

A Kipakta Nasem pa

¹⁴ Na mite thu kinialin a kitot loh nadingun Pasianʼ mai ah thupi takin na hilh khol in. Tua bang thu kinialna in a za mite phattuamna ngahsak loin a siasak bek ahi hi.

¹⁵ Pasianʼ thuman a mantakin hilhin, na nasepna ah maizumna thuak loin, Pasianʼ pahtakna na ngah theih nadingin na siam tawpin hanciam in.

¹⁶ Pasian tawh mite a kigamlasak semsem thei thu gina lo, a haihuai thu kikup thu kiseelnate na pelh in.

¹⁷ Tua bangin amauʼ thugennate in mite siasak a, tua banga thugente lakah Hymenaias le Filetas a kihel uh hi.

¹⁸ Thuman lampi panin amaute pial khin uh a, thawhkikna thu pen a beisa thu hi ta hi, ci-in thu um mi pawl khat lungmangsak uh hi.

¹⁹ Ahi zongin Pasian in a phuh sa sutpi kilok zo ngei lo ding hi. Tua sutpi tungah, “Topa in ama mi kua teng hiam cih thei hi,” cihna le, “Topa tawh kipawl ing, a ci peuhmah in mawhna su kha lo ding hi,” cihna kigelh hi.

²⁰ Inn lian khat peuhpeuh sungah umlebeel a nam tuamtuam a om hi. Pawl khatte ngun tawh kibawl a, pawl khatte kham tawh kibawl a, pawl khatte sing tawh, pawl khatte tungman tawh kibawl hi. Pawl khatte a thupi diakin zat theih ding, pawl khatte nisimin a mawk mawkin zat theih ding ahi hi.

²¹ Mi khatpeuh a hoih lo na khempeuh panin kikemin a siangtho takin a om nakleh na hoih nam khempeuh a sem dingin a Topa tungah ki-apin, a Topa tungah a manpha suak ahih manin a thupi diakte ah amah kizang ding hi.

²² Tua ahih manin khangno lunggulhna hoih lote pelh inla, lungsim takpi tawh Topa tungah huhna a ngen mite tawh thuman thutak, upna, itna, kilemna na neih theih nadingun hanciam khawm un.

²³ Thu kihai seelna, thei lo pi-a thu kinialnate na pelh in. Tua bangte in kitotna a piansak lamtak na theih sa ahi hi.

²⁴ Topaʼ na a sem mite, kitot a hatte hi lo dinga, mi khempeuh tungah lungsim nemin, thugen siamin, thuak zawhna nei-in,

²⁵ thunem tawh a langteʼ hoih lohna a puah theite hi ding hi. Tua bang hileh Pasian in amaute kisiksak thei dinga, thuman thutak hong thei-in,

²⁶ Dawimangpa in ama deihna bangin a gamta dingin a mat khit hangin ama thang panin amaute suakta kha thei ding uh hi.