2 PETER NIHNA 2 - Tedim Bible Revision 2017

Kamsang Man lote le Sia Man lote

¹ Mite lakah kamsang man lo a omngei mah bangin note lakah sia man lo hong om ding hi. Siatna a piangsak thei thuhilhna a man lo hong lutpih simin, amaute mahmah a tan khia Topa nangawn nial ding uh hi. Tua ahih manin thakhat thu-in siatna thuak lawh ding uh hi.

² Tua bang hi napi-in mi tampi tak in amauʼ gamtat hoih lohna zui ding uh a, tua bangin amau gamtatna hangin mite in thuman lampi gensia ding uh hi.

³ Hih sia man lote in a huaiham manun note kiang panin sum a ngah theih nadingun phuahtawm thu hong gen ding uh hi. Ahi zongin sawt pek a kipanin amauteʼ thu a Khen ding pa a kiging sa-in om niloh a, amaute a Susia ding pa in en gige hi.

⁴ Bang hang hiam cih leh vantung mite nangawn in khialhna a neih ciangin Pasian in khah khong loin hell khuk sungah khia a, Thukhen Ni hun dong ngakin khuamial sungah kol bulh sa-in a omsak hi.

⁵ Pasian in tanglai mite khah khong loin amah a um lo mite, tuiciin tumsak a, thuman thutak a hilh Noah le a dang mi sagih bek suaktasak hi.

⁶ Pasian in Sodom le Gomorrah khuapite tungah thu khenin mei tawh hal tum a, Pasian a um lo miteʼ thuak nading limin a bawl hi.

⁷ Ngeina bangin a gamta lo mite in Lot a lungkhamsakna panun Pasian in mihoih Lot a hon khia hi.

⁸ Tua mihoih pa, amaute lakah teeng a, nisimin amauteʼ gamtat hoih lohnate za-in mu tawntung ahih manin lunggim mahmah hi.

⁹ Tua ahih manin Topa in tua bang mihoihte a gimna uh panin suaktasakin, tua bang migilote Thukhen Ni hun dongin gimna pia-in a koihcip theih nading siamna a nei hi.

¹⁰ Pasianʼ thu nialin amau pumpi deihna zui-in a gamta mite gim pia phadiak hi. Hih sia man lote kiphasakin hangsan mahmah uh a, minthanna a nei vantung a omte zahtak het loin gensia ngam uh hi.

¹¹ Hih sia man lote sangin hat zaw-in a vanglian zaw vantung mite nangawn in Topaʼ mai ah minthanna a nei vantung mite gensia ngam lo, mawhsak ngam lo uh hi.

¹² Ahi zongin mat ding le thah dingin a piang gamlak ganhing gilote bangin a pianpih lungsim uh zui-in gamta uh a, a theih loh uh thute a gen sia uh hi. Tua ganhingte mah bangin amaute kisusia dinga,

¹³ mite a gimsak mah bangun amaute tungah gimna kipia ding hi. A ut bangbangun suntangpi-in gamtat ding nuam a sa uh hi. Tua bang mite in note tawh ankuang hong um khawmin, a zuau gamtatnate uh ah nuamsa-in a om uh pen amaute adingin a zumhuai mahmah ahi hi.

¹⁴ Numei bekbek etnopin nei uh a, a mawhnopna lungsim uh kam thei lo hi. Upna cingtaak lo mite zol belin nei uh a, huaihamna lungsim bekbek a nei uh hi. Tua bang mite, Pasianʼ samsiat mite ahi uh hi.

¹⁵ Thuman lampi nusia-in gammang uh a, a man loin gamtatna tawh sum a ngah nuam Beorʼ tapa Balaamʼ gamtat bangin gamta uh hi.

¹⁶ Balaam in ama mawhna hangin taiina a thuak hi. A pau thei lo la, mihing bangin hong pau a, kamsang Balaamʼ hai tatna a khawlsak hi.

¹⁷ Hih bang mite pen a kangcip khin sa ciktui, huih in a mutkhiat meiipi tawh kibang uh a, Pasian in amauteʼ om nadingin khuamial sahpi omna mun a koih kholhsak hi.

¹⁸ Amaute kiphasakin hai pau uh a, a khial gamtat mite sung panin a suakta khin liailiai zo mite, leitung pumpi deih bangin a gamtat nadingun a zol uh hi.

¹⁹ Amaute pen siatna a piangsak thei zongsatna lelin sila hinapi-un mite tungah suahtak nading thu a gen uh hi. Bang hang hiam cih leh mite pen, a hong zo peuhpeuhteʼ sila ihi hi.

²⁰ I Topa le Honpa Jesu Khris theihna hangin leitung siatna sung panin suakta khin napi-un, leitung siatna ah awkkikin a lelte pen, a masa a pianzia uh sangin a nunung a pianzia uh siahuai zaw hi.

²¹ Tua bang mite in amaute tungah a kipia thu siangthote thei-in a nusiatkik sangun thuman lampi a thei ngei het lo uh hileh amau adingin hoih zaw thampek ding hi.

²² Paunak ah, “Ui in a luak nekik hi,” a cihna le, “Vok a kisilsiang khit ciangin buannawng lak mahah bualkik veve hi,” a kicihna thu, amaute tungah a piang ahi hi.