2 PETER NIHNA 1 - Tedim Bible Revision 2017

Hopihna

¹ Jesu Khris nasem le sawltak ahi keimah Simon Peter in: Eiteʼ Pasian le Honpa ahi Jesu Khris a thumanna hangin koteʼ upna zah mahin upna manpha a nei mite tungah lai ka hong khak hi.

² Pasian le i Topa Jesu na theihna uh hangin hehpihna le nopsakna thupha note tungah tampi tak hong tung tahen.

Note Hong Kisapna le Hong Kiteelna

³ Ama minthanna le a hoihnate a neikhawm dingin a hong sam pa i theihna hangin Pasianʼ deih bangin biakna mantak i nuntak theih nadingin ama vangliatna in eiteʼ kisap na khempeuh a hong pia hi.

⁴ Amah in piak dingin a hong ciam a manpha mahmah nate hih bangzia-in hong pia a, hih ama hong piak nate hangin leitungah a om siatna a piangsak thei duh luatna le deih luatnate panin na suakta uh a, Pasianʼ pian ziate na nei uh hi.

⁵ Hih thu hangin na upna ban uh ah gamtat hoihna na behlap unla, na gamtat hoihna uh thutheihna tawh na behlap un;

⁶ na thutheihna uh pumpi ki-uk zawhna tawh na behlap unla, na pumpi ki-uk zawhna uh thuak zawhna tawh na behlap un; na thuak zawhna uh Pasianʼ deih bangin gamtatna tawh na behlap unla,

⁷ Pasianʼ deih bangin na gamtatna uh sanggam ki-itna tawh na behlap un; na sanggam ki-itna uh itna thukpi tawh na behlap zawh nadingun na hanciam un.

⁸ Hih bang hoihnate a kicingin na neih uh leh i Topa Jesu Khris na theihna uh ah thahatin kimanna na nei ding uh hi.

⁹ Ahi zongin hih bang hoihna a nei lo mite pen mittaw-in a gamla a mu thei lo mite hi a, a mawhna lui uh panin a siang khin ahih lam uh zong a mangngilh ta ahi uh hi.

¹⁰ Tua ahih manin sanggamte aw, Pasian in note hong sapna le hong teelna ah a kip taktak na hih nadingun hahkat mahmah un. Tua bangin hahkat le-uhcin na puk ngei kei ding uh hi.

¹¹ Tua hileh eiteʼ Topa le Honpa Jesu Khris Uk tawntungna sungah nuam takin na lut thei ding uh hi.

¹² Tua ahih manin note in hih thute thei khinin, na theih sa uh thuman ah kip takin na om khin uh ahi zongin a hong phawksak kikkik ka hi hi.

¹³ Ka nuntak lai teng hih thute ka hong phawksak kikkik ding thuhoih khat hi, ci-in ka ngaihsun hi.

¹⁴ I Topa Jesu Khris in teltakin hong gen khin ahih manin hih leitung pumpi ka nusiat baih nading thu ka thei hi.

¹⁵ Tua ahih manin ka sih khit ciangin hih thute na phawk kikkik theih nadingun ka hih theih zahin ka hanciam ding hi.

Khrisʼ Minthanna Vang, Mit tawh a Mute

¹⁶ I Topa Jesu Khris a vangliatna le a hong paikik nading thute note kiangah kong gen uh ciangin mihingteʼ phuahtawm tuanthute siksanin a hong gen hi loin, ka mit mahmah uh tawh ka muh uh a vangliatnate a hong gen ka hi uh hi.

¹⁷ Vanglian Minthang pa in, “Hih pen ka it ka Tapa hi a, ama tungah ka lung a kim mahmah hi,” ci-in genin, Pa Pasian in ama tungah minthanna vang le pahtawina a piak laitakin komau pumpi mahmah tawh a om ka hi uh hi.

¹⁸ Mual siangtho tungah amah tawh ka om khawm laitakun vantung panin hong ging awte komau mahmah in ka za uh hi.

¹⁹ Tua ahih manin kamsangteʼ gen thute a man taktak ahihna thu ka tel theih uh hi. Noteʼ lungsimah Zingsol hong suakin khua a hong vak matengin khuamial lak a mei taang bangin hih thute ngaihsun le-uhcin hoih mahmah ding hi.

²⁰ Na phawk ding uh a thupi mahmah khat in: Lai Siangtho sunga om thugen kholhnate, kuamah in ama pilna tawh a khiatna gen thei lo hi.

²¹ Bang hang hiam cih leh mihingte in a deih manin mailam thugen kholh theihna a kingah hi lo a, Kha Siangthoʼ sawlna tawh Pasianʼ kiang panin a hong pai thute a kigen ahi zaw hi.