2 KUMPI NIHNATE 6 - Tedim Bible Revision 2017

Heitang Laamsak

¹ Ni khat, kamsangte khat in Elisha kiangah, “Thei in, nangma khutnuai-a om koteʼ teenna mun kote adingin neu lua hi.

² Kote Jordan ah hong paisakin kote in singluang khat ciat la-in ka ten nading uh mun khat ko hong bawlsak in,” a ci uh hi. Tua ciangin amah in dawngin, “Pai un,” a ci hi.

³ Tua ciangin amaute khat in, “Na nasemte tawh kuan kawm ding hong ut in,” a ci hi. Amah in dawngin, “Kong kuan ding hi,” a ci hi.

⁴ Tua ahih ciangin amaute tawh amah a kuan hi. Jordan a tun uh ciangin amaute in sing phuk uh hi.

⁵ Ahih hangin khat in singluang a tan laitakin a heitang leengin tui sungah kia hi. Amah kiko-in, “Ala! ka topa! A kikawm hi veʼn,” a ci hi.

⁶ Tua ciangin Pasianʼ mipa in, “Koi lai ah kia ahi hiam?” a ci hi. Amah in a kiatna mun ama kiangah a lah ciangin amah in ciangkang khat khiakin tua munah lawn a, a heitang laam tosak hi.

⁷ Tua ciangin amah in, “La to in,” a ci hi. Tua ahih ciangin amah in a khut zanin a heitang a la hi.

Elisha le Syria-te

⁸ Khat vei Syria kumpipa le Israel mite kido a, Syria kumpipa le a nasemte thu kikumin, “Tua mun tua munte i panmun ding hi,” a ci hi.

⁹ Ahih hangin Pasianʼ mipa in Israel kumpipa tungah thu puak a, “Syria-te in hong buk sim uh ahih manin hih mun na nawk loh nadingin kingaihsun in,” a ci hi.

¹⁰ Tua ciangin Israel kumpipa in Pasianʼ mipa genna mun kiimah a om mite kiangah mi sawlin hilh kholsak hi. Tua ahih manin tua bangin amaute suakta zelzel uh hi.

¹¹ Tua ciangin hih thu hangin Syria kumpipa nakpi takin patau hi. Amah in a nasemte samin amaute kiangah, “Eite sung panin Israel kumpipa lamah a pangsim mipa hong gen lo ding na hi uh hiam?” a ci hi.

¹² Tua ciangin a nasemte khat in, “Kuamah om lo hi, ka topa, kumpipa aw; ahih hangin Israel sungah kamsang Elisha in na lupna inn dei sunga na thugente Israel kumpipa tungah gen hi,” a ci hi.

¹³ Tua ciangin amah in, “Keimah in mi sawlin amah ka mat theih nadingin pai inla, amah a omna mun va thei in,” a ci hi. Tua ciangin ama kiangah, “En in, amah Dothan ah om hi,” ci-in kigen hi.

¹⁴ Tua ahih ciangin amah in sakolte le leengte le galkap hon lianpi khat tua lai ah a sawl hi. Amaute zanin hong pai-in a khuapi umcih uh hi.

¹⁵ Pasianʼ mipaʼ nasem pa zingsangin tho baihin a paikhiat ciangin, en in, khuapi kimkot ah sakolte le leengte tawh galkap honpi na om hi. Tua ciangin nasem pa in, “Ala! ka topa! Bang cih ding ihi hiam?” a ci hi.

¹⁶ Amah in, “Kihta kei in; bang hang hiam cih leh amaute tawh a omte sangin eite tawh a omte tam zaw hi,” a ci hi.

¹⁷ Tua ciangin Elisha in thu ngenin, “Topa aw, kong thum hi; amah in a muh theih nadingin ama mitte honsak in,” a ci hi. Tua ahih ciangin Topa in tangvalpaʼ mitte honsak a, tua ciangin amah in mu hi. En in, Elishaʼ kimkot mual tung khempeuh sakolte le meileengte tawh kidim hi.

¹⁸ Amah a sim dingin Syria-te hong pai suk ciangin Elisha in Topa kiangah thu ngenin, “Hih mite mittawtna tawh vat gawp in, kong thum hi,” a ci hi. Tua ahih ciangin Elishaʼ thungetna bangin amah in mittawtna tawh amaute vat gawp hi.

¹⁹ Tua ciangin Elisha in amaute kiangah, “Hih pen a lampi hi lo a, hih zong a khuapi hi lo hi; hong zui un; na zon uh mipa kiangah note kong paipih ding hi,” a ci hi. Tua ciangin amah in Samaria ah amaute a paipih hi.

²⁰ Amaute Samaria ah a lut phetin Elisha in, “Topa aw, amaute in a muh theih nadingun hih miteʼ mitte honsak in,” a ci hi. Tua ahih ciangin Topa in amauʼ mitte honsak a, tua ciangin amaute in khua mu uh hi. Samaria khua sungah a om ahihna uh thei uh hi.

²¹ Israel kumpipa in amaute a muh ciangin amah in Elisha kiangah, “Ka pa aw, amaute ka that ding hiam? Amaute ka that ding hiam?” a ci hi.

²² Amah in dawngin, “Amaute na that kei ding hi. Na namsau le na thal tawh loin galmatin na lak sate that ding na hi hiam? Amaute in an ne-in tui a dawn khit ciangin a topa uh kiangah a ciahkik theih nadingun amauteʼ mai ah anletui lui in,” a ci hi.

²³ Tua ahih ciangin amah in amaute adingin pawi lianpi khat bawl hi. Amaute in an ne-in tui a dawn khit uh ciangin amaute sawl khia a, tua ciangin a topa uh kiangah amaute a ciah uh hi. Tua ciangin Israel gam a sim dingin Syria-te hong pai nawn lo uh hi.

Elisha le Samaria a Ki-umcihna

²⁴ Tua khit ciangin Syria kumpipa Benhadad in a galkap buppi khawmin pai to a, Samaria a umcih hi.

²⁵ Amaute in a umcih hun sungteng, la lutang khat ngun shekel sawm giat, gam lo-uih bul hai khat ngun shekel nga-in a kizuak dongin Samaria ah kialpi lianpi a tung hi.

²⁶ Israel kumpipa kulhzang ah a pai laitakin numei khat ama tungah kiko-in, “Hong huh in, ka topa, Aw Kumpipa!” a ci hi.

²⁷ Tua ciangin amah in, “Topa in nang hong huh ding ahih kei leh koi lai panin nang hong huh ding ka hi hiam? An ahi a, leenggahzu ahi zongin nei ka hi hiam?” a ci hi.

²⁸ Tua ciangin kumpipa in tua nu dongin, “Na lungkhamna bang ahi hiam?” a ci hi. Amah in dawngin, “Hih numei in kei kiangah, ‘Tu ni-in amah i nek theih nadingin na tapa hong pia in; zing ciangin keima tapa i ne ding hi,’ hong ci hi.

²⁹ Tua ahih ciangin kote in ka tapaʼ sa huanin ka ne uh hi. A zing ciangin keimah in ama kiangah, ‘Amah i nek theih nadingin na tapa hong pia in,’ ka ci hi. Ahih hangin tua nu in a tapa na seel hi,” a ci hi.

³⁰ Kumpipa in tua numeiʼ thugente a zak ciangin ama puante bal kek hi. Kulhzang ah kumpipa pai kawikawi a, mite khuadakin amah a et uh ciangin amah in a sung lamah puanhampi a silh mu uh hi.

³¹ Tua ciangin amah in, “Tu ni-in Shafatʼ tapa Elishaʼ lutang a kitankhiat kei taak leh Pasian in kei hong dawm kei tahen,” a ci hi.

³² Elisha a inn sungah tu a, upate amah tawh tukhawm uh hi. Tu-in kumpipa in ama omna panin mi khat sawl khia hi. Ahih hangin kamtai pa a tun ma-in Elisha in upate kiangah, “Hih mi that pa in ka lutang a tan khia dingin hong sawlna na mu uh hiam? En un, kamtai pa hong tun ciangin kong khak unla, ama lang khat ah khauh takin kongkhak lencip un. Ama nungah a topaʼ kheging hong kiza hi lo ahi hiam?” a ci hi.

³³ Amaute tawh amah a kiho laitakin ama kiangah kumpipa hong pai sukin, “Hih lungkhamna Topaʼ piansak hi lo ahi hiam! Bang hangin Topa in bang khat peuhpeuh a sep ding ngak lai ding ka hi hiam?” a ci hi.