2 KUMPI NIHNATE 25 - Tedim Bible Revision 2017

Jerusalem A Pukna

¹ Tua ciangin Zedekiah in Babylon kumpipa lehdo hi. Tua ahih manin ama uk a kum kuana, tua kum a kha sawmna, tua kha a ni sawm ni-in Babylon kumpipa Nebukhadnezzar a galkap khempeuh tawh Jerusalem a sim dingin hong kuanin tua khua a umcih uh hi. Tua ciangin amaute in a kimkot ah umcih nading panmun a bawl uh hi.

² Tua ahih ciangin Kumpi Zedekiahʼ kum sawm le kum khatna kum dong tua khuapi ki-umcih hi.

³ A kha lina a ni kua ni-in tua khuapi sungah kialpi nasia mahmah ahih manin tua gam mite ading an om lo hi.

⁴ Tua ciangin khuapi kulh su let uh hi. Khaldea mite khuapi kiimah a om pi mahin, kumpipaʼ huan kiang lam kulhpi nih kikal kulh kongpi lampi zui-in kumpipa le a galhang mi khempeuh zanin a tai uh hi. Arabah lam manawhin amaute pai uh hi.

⁵ Ahih hangin Khaldea miteʼ galkapte in kumpipa delh uh a, Jerikho zanglei ah amah pha uh hi; tua ciangin a galkap khempeuh ama kiang panin kithehthang hi.

⁶ Tua ciangin amaute in kumpipa man uh a, ama tungah thukhenna a pia, Riblah a Babylon kumpipa kiangah amah paipih uh hi.

⁷ Amaute in Zedekiahʼ muhna ah a tapate thatin, Zedekiahʼ mitte khel khia uh a, amah kol bulhin Babylon ah a paipih uh hi.

Judah Mite A Kimatna

⁸ A kha ngana, tua kha a ni sagih ni-in, Babylon Kumpi Nebukhadnezzarʼ kum sawm le kum kuana kumin, Babylon kumpipaʼ nasem, amah a cingte a ukpa Nebuzaradan Jerusalem ah hong pai hi.

⁹ Amah in Topaʼ biakinn a kipan kumpipaʼ inn le Jerusalem khua sunga om inn khempeuh hal a, inn lian khempeuh amah in hal tum hi.

¹⁰ Tua ciangin a cingte a ukpa tawh a om Khaldea mi galkapte khempeuh in Jerusalem kimkot a kulhpi susia uh hi.

¹¹ Tua ciangin a cingte a ukpa Nebuzaradan in khuapi sungah a kinusia a om lai mite le Babylon kumpipa a taisan mite, mihonpi a om lai teng khempeuh salin paipih khawm hi.

¹² Ahih hangin a cingte a ukpa in leenggui lote a en ding le lokho dingin tua gam mi a zawng pente pawl khat nusia lai hi.

¹³ Tua ciangin Topaʼ biakinn sungah a om sumngo khuampite, Topaʼ biakinn sungah a om tuikuang kingaknate le sumngo tuikuangpi, Khaldea mite in satnen uh a, Babylon ah a sumngo pua uh hi.

¹⁴ Tua ciangin amaute in beelte, kawbiate, taitehte, paknamtui adingin pakante le biakinn sung nasepna a kizang sumngo nazatte khempeuh,

¹⁵ vutluahna le haite la khia uh hi. A cingte a ukpa in kham ahite kham mahin la-in, ngun ahite a ngun mahin a la hi.

¹⁶ Solomon in Topaʼ biakinn ading a, a bawl khuampi nihte, tuikuangpi khat le a kingaknate, sumngo tawh kibawl hih nazatte khempeuh ahihleh tawi teh zawh ding hi lo hi.

¹⁷ Khuampi khat a sanna pi sawm nih le sagih hi a, tua tungah sumngo khuam luzepna khat om hi; khuam luzepna a sanna pi li le alang ahi hi. Sumngo tawh a kibawl ngen banga kikalh simsiam le mang kawlsingte khuam luzepna kimkot ah om hi. A khuampi nihna zong tua mah bangin, ngen banga kikalh simsiam tawh ahi hi.

¹⁸ Tua ciangin a cingte a ukpa in siampi lianpa Seraiah, siampi nihna Zefaniah le kong a cing mi thumte a la hi.

¹⁹ Tua ciangin khuapi panin galkapte a uk ngei ulian khat le khuapi sungah a om kumpipaʼ thukuppihte mi nga a la hi. Tua ciangin gam sung mite a khawm galkapte a ukpaʼ lai-at pa a la hi. Tua ciangin khuapi sungah a om tua gam sung mi sawm guk a la hi.

²⁰ Tua ciangin a cingte a ukpa Nebuzaradan in amaute la-in Riblah a Babylon kumpipa kiangah amaute a paipih hi.

²¹ Tua ciangin Babylon kumpipa in amaute vat a, Hamath gam sung Riblah ah amaute a that hi. Tua ahih ciangin amauʼ gam panin salin Judah mite kila khia hi.

A Omlaite Egypt ah Tai

²² Tua ciangin Judah gam sungah a om lai, Babylon kumpipa Nebukhadnezzar in a nusiatte tungah a uk dingin Shafanʼ tapa Ahikam, a tapa Gedaliah amah in a seh hi.

²³ Tu-in gam sunga om galkap a ukte le a mite in Babylon kumpipa in a uk dingin Gedaliah a sehna thu a zak uh ciangin amaute a mite uh tawh Mizpah a Gedaliah kiangah hong pai uh hi. Tuate pen Nethaniahʼ tapa Ishmael, Kareahʼ tapa Johanan, Netofah mi Tanhumethʼ tapa Seraiah le Maakath mi Jaazaniah ahi uh hi.

²⁴ Tua ciangin amaute le a mite uh tungah Gedaliah kiciamin, “Khaldea mi ulianteʼ hangin lau kei un; gam sungah teengin, Babylon kumpipaʼ na sem un. Tua hileh note adingin thu hong nuam ding hi,” a ci hi.

²⁵ Ahih hangin a kha sagihna sungin kumpi innkuan sung panin Elishamaʼ tapa Nethaniah, a tapa Ishmael mihing sawm tawh hong kuanin Gedaliah le Mizpah ah amah tawh a om Judah mi le Khaldea mite simin a that hi.

²⁶ Tua ciangin a lian a neu-in mi khempeuh le galkap a ukte kithawi-in Egypt ah pai uh hi; bang hang hiam cih leh amaute in Khaldea mite kihta uh hi.

Babylon ah Jehoiakhin Kikhahin Kipahtawi

²⁷ Judah kumpi Jehoiakhin thong sungah a om zawh kum sawm thum le kum sagihna kum, kha sawm le nihna, tua kha ni sawm nih le sagih ni, Babylon kumpipa Evil-merodak in uk ding a kipat kumin, hehpihna tawh thong panin Judah kumpi Jehoiakhin a khah hi.

²⁸ Amah in migitna kam tawh amah hopih a, Babylon sunga amah tawh a om kumpi a mat dangte khempeuh sangin a sang zaw-in amah a pahtawi hi.

²⁹ Tua ahih ciangin Jehoiakhin in a thong puante suah khia hi. Tua ciangin a nuntak sung nisimin kumpipaʼ sabuai ah a manmanin an a ne hi.

³⁰ Tua ciangin ama ngah thuap dingin, amah a nuntak sung tawntung nisimin tanh khat, a manmanin ngahthuapna ama tungah kumpipa in a pia hi.