2 KUMPI NIHNATE 15 - Tedim Bible Revision 2017

Judah Kumpi Uzziahʼ Ukna

¹ Israel kumpi Jeroboam Nihnaʼ kum sawm nih le sagihna kumin Judah kumpipa, Amaziahʼ tapa Uzziah in uk ding kipan hi.

² Amah in uk ding a kipatin kum sawm le kum guk pha a, Jerusalem ah kum sawm nga le nih sung uk hi. Ama nuʼ min Jekoliah hi a, Jerusalem khuami ahi hi.

³ A pa Amaziahʼ sepna khempeuh tawh kizui-in Topaʼ mitah a man gamta hi.

⁴ Ahi zongin mual tunga biaknate kila khia lo hi. Mite in tuate tungah biakna pia-in paknamtui hal lai uh hi.

⁵ Tua ciangin Topa in phak natna tawh kumpipa vat ahih manin a sih ni dongin amah a phak hi a, inn tuam sungah amah teeng hi. Tua ciangin kumpipaʼ tapa Jotham pen a innkuan tungah a uk hi a, tua gam mite a uk hi.

⁶ Tu-in Uzziahʼ gamtatna a omlaite le a hih khempeuh, Judah Kumpiteʼ Khang Tangthu Laibu sungah kigelh hi.

⁷ Tua ciangin Uzziah si a, amaute in David khuapi sungah a pate tawh amah vui uh a, tua ciangin ama tangin a tapa Jotham in a uk hi.

Israel Kumpi Zekhariahʼ Ukna

⁸ Judah kumpi Uzziahʼ kum sawm le kum giatna kumin Jeroboam Nihnaʼ tapa Zekhariah in Samaria panin Israel tungah kha guk sung uk hi.

⁹ A pateʼ hih sa bangin Topaʼ muhna ah amah a sia gamta hi. Israel a khialhsakna, Nebatʼ tapa Jeroboamʼ khialhnate panin amah kihem khia lo hi.

¹⁰ Jabeshʼ tapa Shallum in amah sawm sim a, Ibleam ah amah sat pukin that a, tua ciangin ama tangin a uk hi.

¹¹ Tu-in Zekhariahʼ sepna a omlaite, Israel Kumpiteʼ Khang Tangthu Laibu sungah kigelh hi.

¹² (Hih pen Topaʼ thuciamna, Jehu tungah a piak, “Na suante khang lina dongin Israel kumpi tokhom tungah tu ding hi,” a cih ahi hi. Tua ahih ciangin tua bangin a piang ahi hi.)

Israel Kumpi Shallumʼ Ukna

¹³ Judah kumpi Uzziahʼ kum sawm le kum kuana kumin Jabeshʼ tapa Shallum in uk ding kipan a, amah in Samaria ah kha khat sung uk hi.

¹⁴ Tua ciangin Tirzah panin Gadiʼ tapa Menahem hong pai to-in Samaria hong tunga, tua ciangin amah in Samaria ah Jabeshʼ tapa Shallum sat pukin that a, ama tangin a uk hi.

¹⁵ Tu-in Shallumʼ sepna a omlaite le amah in a hih sa a sawm simna, Israel Kumpiteʼ Khang Tangthu Laibu sungah kigelh hi.

¹⁶ Tua hun laitakin Menahem in Tappuah le a sunga teeng khempeuh le Tirzah pan a kipan a gam sungteng a luh hi. Bang hang hiam cih leh amaute in ama adingin a kongpite uh hong lo uh hi. Tua ahih ciangin amah in luhin, a sunga om numei naupaii khempeuh a phel kham hi.

Israel Kumpi Menahemʼ Ukna

¹⁷ Judah kumpi Uzziahʼ kum sawm thum le kuana kumin Gadiʼ tapa Menahem in Israel tungah uk ding kipan a, amah in Samaria panin kum sawm sung uk hi.

¹⁸ Topaʼ muhna ah amah a sia gamta hi. Israel khempeuh a khialhsakna, Nebatʼ tapa Jeroboamʼ khialhnate khempeuh panin a nuntak sung tawntung amah kihem khia lo hi.

¹⁹ Assiria kumpi Tiglath-pileser tua gam a sim dingin kuan to hi. Tua ciangin ama kumpi aana a kip nading a huh ding a deihna-in Menahem in Tiglath-pileser tungah ngun talen tul khat a pia hi.

²⁰ Menahem in Assiria kumpipa tungah a piak dingin mihau khempeuh, a mi kim khut tung panin ngun shekel sawm nga, Israel-te tung panin sum a dok hi. Tua ahih ciangin Assiria kumpipa kiheikik a, tua gam sungah om lo hi.

²¹ Tu-in Menahemʼ sepna a omlaite le a hih khempeuh, Israel Kumpiteʼ Khang Tangthu Laibu sungah kigelh hi.

²² Tua ciangin Menahem si a, ama tangin a tapa Pekahiah in a uk hi.

Israel Kumpi Pekahiahʼ Ukna

²³ Judah kumpi Azariahʼ kum sawm ngana kumin Menahemʼ tapa Pekahiah in Samaria panin Israel tungah uk ding kipan a, amah in kum nih sung uk hi.

²⁴ Topaʼ muhna ah amah a sia gamta hi. Israel a khialhsakna, Nebatʼ tapa Jeroboamʼ khialhnate panin amah kihei khia lo hi.

²⁵ Tua ciangin ama nuai ah a ukpa, Remaliahʼ tapa Pekah in Gilead mi sawm nga tawh amah sawm sim a, kumpipaʼ inn sung tawng, Samaria ah amah that hi. Amah a thah khit ciangin ama tangin a uk hi.

²⁶ Tu-in Pekahiahʼ nasepna a omlaite le a hih khempeuh, Israel Kumpiteʼ Khang Tangthu Laibu sungah kigelh hi.

Israel Kumpi Pekahʼ Ukna

²⁷ Judah kumpi Uzziahʼ kum sawm nga le nihna kumin Remaliahʼ tapa Pekah in Samaria panin Israel tungah uk ding kipan a, kum sawm nih sung uk hi.

²⁸ Topaʼ muhna ah amah a sia gamta hi. Israel a khialhsakna, Nebatʼ tapa Jeroboamʼ khialhnate panin amah kihem khia lo hi.

²⁹ Israel kumpi Pekahʼ hun laitakin Assiria kumpi Tiglath-pileser hong pai-in Ijon, Abelbeth-maakah, Janoah, Kedesh, Hazor, Gilead le Galilee le Naftali gam khempeuh la a, amah in galmatin mite Assiria ah a ciahpih hi.

³⁰ Tua ciangin Uzziahʼ tapa Jothamʼ kum sawm nihna kumin Elahʼ tapa Hoshea in Remaliahʼ tapa Pekah sawm simin amah sat pukin that a, tua ciangin ama tangin a uk hi.

³¹ Tu-in Pekahʼ gamtatna a omlaite le a hih khempeuh, Israel Kumpiteʼ Khang Tangthu Laibu sungah kigelh hi.

Judah Kumpi Jothamʼ Ukna

³² Israel kumpi Remaliahʼ tapa Pekahʼ kum nihna kumin Judah kumpi Uzziahʼ tapa Jotham in uk ding kipan hi.

³³ Amah in uk ding a kipatin kum sawm nih le nga pha a, amah in Jerusalem ah kum sawm le kum guk sung uk hi. Ama nuʼ min Jerushah hi a, Zadokʼ tanu ahi hi.

³⁴ A pa Uzziahʼ gamtatna sa khempeuh bangin Topaʼ mitah amah a manin gamta hi.

³⁵ Ahi zongin mual tunga biaknate kikoih khia lo hi. Mite in tuateʼ tungah biaknate pia-in paknamtui hal lai uh hi. Amah in Topaʼ biakinn kulh kongpi tungnung bawl hi.

³⁶ Tu-in Jothamʼ nasepna a omlaite le a hih khempeuh, Judah Kumpiteʼ Khang Tangthu Laibu sungah kigelh hi.

³⁷ Tua hunin Topa in Judah a sim dingin Syria kumpipa Rezin le Remaliahʼ tapa Pekah sawl ding kipan hi.

³⁸ Jotham si a, a pu David khuapi sungah a pate tawh kivui hi. Ama tangin a tapa Ahaz in uk hi.