2 KHANG TANGTHU NIHNATE 3 - Tedim Bible Revision 2017

Solomon in Topaʼ Biakinn Lam

¹ Tua ciangin Solomon in Jerusalem sung Moriah Mual tung, a pa Davidʼ tungah Topa a kilahna mun, David in a sehna sa mun ahi, Jebus mi Ornanʼ ancilna phualah Topaʼ biakinn lam ding kipan hi.

² Amah in ama uk a kum lina a kha nihna sungin lam ding kipan hi.

³ Pasianʼ biakinn lam nading Solomonʼ geelna hih bang ahi hi: A dung pi sawm kua hi a, a vai pi sawm thum ahi hi.

⁴ Inn mai-a innliim pen inn vai tawh kikimin pi sawm thum sau a, a sanna zong pi sawm thum mah ahi hi.

⁵ Amah in taaksan tawh innpi kawm dapin kham hoih tawh zut a, tua tungah nisuh le khainiang a bawl hi.

⁶ Amah in suangmanpha phutin a inn zem hi. A kham zatte Parvaim kham ahi hi.

⁷ Tua ahih ciangin amah in a inn, a innsunte, a sangkilte, a kawmte le a kongkhakte kham tawh zut a, tua ciangin a kawmte tungah kherub-te a bawl hi.

⁸ Tua ciangin amah in siangtho pen mun bawl hi. A dung pen a vai tawh kizui-in pi sawm thum hi a, a vai zong pi sawm thum mah ahi hi. Amah in kham hoih talen za guk tawh a zut hi.

⁹ A kilhnate a gihna kham shekel sawm nga ahi hi. Tua ciangin amah in a inn dawl tungnungte kham tawh a zut hi.

¹⁰ Amah in siangtho pen mun sungah sing kherub nih bawlin kham tawh tuate zut hi.

¹¹ Tua kherub tegelʼ kha a kizalin pi sawm thum ahi hi. A khatʼ kha pen pi sagih le alang hi-in inn kawm ban a, tua ciangin a lang khat pi sagih le alang in a kherub dang khatʼ kha ban hi.

¹² Tua mah bangin a kherub dang khatʼ kha lang khat zong pi sagih le alang hi-in inn kawm lang khat ban a, pi sagih le alang mah a sau a kha lang khat pen a kherub masaʼ kha tawh kizom hi.

¹³ Hih kherub-teʼ khate in pi sawm thum huam hi. Kherub-te amauʼ khe-in dingin innpi sung lam nga uh hi.

¹⁴ Tua ciangin amah in a dum, a ausan le a dupsan puante le saihadial puan tawh a dalna puan bawl a, tua tungah kherub-te a bawl hi.

Biakinn Sungah Huramʼ Nasep

¹⁵ Amah in inn mai sanah pi sawm nga le pi nih le alang a sang, a dawn tuakah pi sagih le alang a pha khuam luzepna a nei khuampi nih bawl hi.

¹⁶ Amah in ngawng a awhte bangin khainiangte bawlin khuampite dawnah khai hi. Tua ciangin amah in mang kawlsing za khat bawlin khainiangte tungah koih hi.

¹⁷ Amah in tua khuamte, khat leitaw lam, a khat leilu lam, biakinn mai ah phut hi. Amah in leitaw lam a om pen Jakhin phuakin, leilu lam a om pen Boaz a phuak hi.