2 KHANG TANGTHU NIHNATE 29 - Tedim Bible Revision 2017

Judah Kumpi Hezekiahʼ Ukna

¹ Hezekiah in uk ding a kipatin kum sawm nih le nga pha a, amah in Jerusalem ah kum sawm nih le kua sung uk hi. Ama nuʼ min Abijah hi a, Zekhariahʼ tanu ahi hi.

² A pu Davidʼ hihnasa khempeuh bangin Topaʼ mitah a man gamta hi.

Hezekiah in Biakinn Biakna Omsakkik

³ Ama uk a kum khatna, a kha masa sungin amah in Topaʼ biakinn kongkhakte hongin tuate a puah hi.

⁴ Amah in siampite le Levi mite paipihin nisuahna lam mun awngah amaute khawmin

⁵ amaute kiangah, “Levi mite aw, ka thugen hong za un! Tu ni-in nomau kisiansuah unla, na pu na pate uh Pasian, Topaʼ biakinn siangthosakin a ninsak thei na khempeuh siangtho mun panin nawn khia un.

⁶ Bang hang hiam cih leh i pute i pate citak lo a, Topa i Pasianʼ muhna ah a sia gamta uh hi. Amaute in amah nusia-in, Topa i Pasianʼ muhna ah a sia gamta uh hi. Amaute in amah nusia-in, Topaʼ teenna panin a mai uh hei khia uh a, a nung uh ngat uh hi.

⁷ Amaute in innliim kongkhakte zong khakin meivakte sumit uh a, siangtho munah paknamtui halna le meihal biaknate Israel Pasian tungah bawl lo uh hi.

⁸ Tua ahih ciangin Judah le Jerusalem tungah Topaʼ hehna hong tung a, noteʼ mit mahmah tawh na muh uh mah bangin amah in amaute a cikzethuai, lamdangsakna le a dipkuathuai-in a bawl hi.

⁹ Bang hang hiam cih leh en un, hih thu hangin namsau-in i pu i pate puk uh a, i tapate, i tanute le i zite galmatin om uh hi.

¹⁰ Tu-in a lauhuai a hehna eite tung pan a kiheikhiat theih nadingin Israel Pasian, Topa tawh thuciamna khat bawl ding ka lungsimah om hi.

¹¹ Ka tate aw, Topa in ama omna ah a ding ding, ama na a sem ding le ama nasemte hi-in ama tungah paknamtui a hal dingin note hong teel khin ahih manin tu-in mawk om kei un,” a ci hi.

¹² Tua ciangin Levi mite, Kohathʼ beh sung panin Amasaiʼ tapa Mahath le Azariahʼ tapa Joel; Merariʼ beh sung panin Abdiʼ tapa Kish le Jehallelelʼ tapa Azariah; Gershon beh sung panin Zimmahʼ tapa Joah le Joahʼ tapa Eden;

¹³ Elizafanʼ beh sung panin Shimri le Jeuel; Asafʼ beh sung panin Zekhariah le Mattaniah;

¹⁴ Hemanʼ beh sung panin Jehiel le Shimei; Jeduthunʼ beh sung panin Shemaiah le Uzziel kipan uh hi.

¹⁵ Amaute in a sanggamte uh khawmin amau kisiansuah uh a, Topaʼ genna tawh kumpipaʼ thupiak bangin Topaʼ biakinn a puahsiang dingin a tum uh hi.

¹⁶ A puahsiang dingin Topaʼ biakinn sung tawng nung ah a siampite lut uh a, Topaʼ biakinn sunga a muh uh a nin khempeuh Topaʼ biakinn tual ah hong paikhiatpih uh hi. Tua ciangin Levi mite in la-in Kidron lui ah pua khia uh hi.

¹⁷ Kha masa a ni masa ni-in amaute in siansuah ding kipan uh a, tua kha a ni giat ni-in Topaʼ inn liimah amaute hong pai uh hi. Tua ciangin amaute in ni giat sung Topaʼ biakinn siansuah uh a, a kha masa a ni sawm le guk ni-in zo uh hi.

¹⁸ Tua ciangin kumpipa Hezekiah kiangah amaute tumin, “Topaʼ biakinn khempeuh, meihal biakna tau le a nazatte khempeuh le Ompihna Anlum sabuai le a nazatte khempeuh ka puahsiang khin uh hi.

¹⁹ Kumpi Ahaz a cihtak loh laitakin ama uk sungin a paihkhiat nazat khempeuh a baih sa-in bawlin ka siansuah uh hi. Topaʼ biakna tau mai ah tu-in tuate om hi,” a ci uh hi.

²⁰ Tua ciangin kumpipa Hezekiah tho baihin khuapi sung zaneite khawmin Topaʼ biakinn ah a pai to uh hi.

²¹ Tua ciangin amaute in kumpi gam le biakinn le Judah adingin khialhna hanga biakna-in bawngtal sagih, tuutal sagih, tuuno sagih le keel sagih hong paipih uh hi. Tua ciangin amah in Topaʼ biakna tau tungah tuate a pia dingin Aaronʼ suan siampite a sawl hi.

²² Tua ahih ciangin amaute in a bawngtalte go uh a, siampite in a sisan la-in biakna tau tungah theh uh hi. Tua ciangin amaute in tuutalte go-in a sisan tawh biakna tau theh uh hi. Tua ciangin amaute in tuunote go-in a sisan tawh biakna tau theh uh hi.

²³ Tua ciangin khialhna hanga biak nading keeltal sagihte kumpipa le a kikhawmte kiangah hong kipaipih a, amaute in tuate tungah a khut uh nga hi;

²⁴ tua ciangin Israel khempeuh adingin pum khat suahna bawl nadingin siampite in go-in tuateʼ sisan tawh biakna tau tungah khialhna hanga biakna a bawl uh hi. Bang hang hiam cih leh Israel khempeuh adingin meihal biakna le khialhna hanga biakna a bawl ding uh kumpipa in thu pia hi.

²⁵ Tua ciangin amah in David le kumpipaʼ thumu pa Gad le kamsang Nathanʼ thupiakna bangin Topaʼ biakinn sungah daltuahte, harp lasaknate le laiza lasaknate tawh Levi mite a koih hi; bang hang hiam cih leh tua thupiakna pen kamsangteʼ tungtawnin Topaʼ kiang pan a hong pai ahi hi.

²⁶ Davidʼ lasaknate tawh Levi mite ding uh a, peengkulte tawh siampite ding uh hi.

²⁷ Tua ciangin biakna tau tungah meihal biakna a kipiak nading Hezekiah in thu a pia hi. Meihal biakna a kipat ciangin Topaʼ tungah lasakna zong kipan a, Israel kumpi Davidʼ lasaknate in peengkulte pawm hi.

²⁸ A kikhawm khempeuh in Pasian bia-in, lasate in la sa uh a, peengkul tumte in peengkul tum uh hi. Meihal biakna a kiman mateng hihte khempeuh hih paisuak uh hi.

²⁹ Biakpiakna a kiman ciangin kumpipa le amah tawh a om khempeuhte kunin Pasian a bia uh hi.

³⁰ Tua ciangin Davidʼ kammalte le thumu pa Asafʼ kammalte zangin Topaʼ tungah phatna la a sak nadingun kumpipa Hezekiah le uliante in Levi mite thu a pia uh hi. Tua ciangin amaute in lungdamna tawh phatna late sa uh a, tua ciangin amaute kunin Pasian a bia uh hi.

³¹ Tua ciangin Hezekiah in, “Tu-in Topaʼ tungah nomau mah na ki-ap khin uh hi. A nai ah hong pai unla Topaʼ biakinn ah biakpiaknate le lungdam piaknate hong paipih un,” a ci hi. Tua ciangin a kikhawmte in biakpiaknate le lungdam piaknate hong paipih uh hi. Tua ciangin piak nopna lungsim a nei khempeuh in meihal biaknate hong paipih uh hi.

³² A kikhawmte in a hong paipih meihal biakna a phazah bawngtal sawm sagih, tuutal za khat le tuuno za nih hi a, hihte khempeuh pen Topaʼ tungah meihal biakna khat ahi hi.

³³ A ki-ap biaknate bawngtal za guk le tuu tul thum ahi hi.

³⁴ Ahih hangin siampite a mi tawm lua uh ahih manin meihal biaknate khempeuh a vun hawk khinzo lo uh a, siampi dangte a kisiansuah ma sungteng, a sanggam uh Levi mite in nasep a kizawh mateng amaute huh uh hi. Bang hang hiam cih leh kisiansuahna thu ah siampite sangin Levi mite ngentel zaw uh hi.

³⁵ Meihal biakna a tampite banah thunuam a biakna thaute le meihal biakna adingin leenggahzu tawh biaknate om hi. Tua bangin Topaʼ biakinn sungah nasepna ki-omsakkik hi.

³⁶ Pasian in mite adingin a bawlsak thute hangin Hezekiah le mi khempeuh lungdam uh hi; bang hang hiam cih leh tua thu thakhatin hong piang vat hi.