2 KHANG TANGTHU NIHNATE 24 - Tedim Bible Revision 2017

Judah Kumpi Joashʼ Ukna

¹ Joash in uk ding a kipatin kum sagih pha a, Jerusalem ah kum sawm li sung uk hi. Ama nuʼ min Zibiah hi a, Beer-sheba khuami ahi hi.

² Siampi Jehoiadaʼ hunsung khempeuh Topaʼ mitah Joash a manin gamta hi.

³ Jehoiada in ama adingin zi nih laksak a, amah in tapate le tanute a nei hi.

⁴ Hih hun khit ciangin Joash in Topaʼ biakinn a ngei batsakkik ding ngaihsun hi.

⁵ Amah in siampite le Levi mite khempeuh khawmin amaute kiangah, “Judah khuapite ah pai unla, Pasianʼ biakinn a kumkumin puah nadingin Israel khempeuh tung panin sum khawm un; hih thu na nawh hih ding uh thei un,” a ci hi. Ahih hangin Levi mite kinawh lo uh hi.

⁶ Tua ahih ciangin kumpipa in amauʼ ukpi Jehoiada samin ama kiangah, “Topaʼ nasem Moses in Topaʼ ompihna puanbuk a dingin Israel mihonte tung panin a khon mangmu bang hangin Judah le Jerusalem panin Levi mite khawmsak lo na hi hiam?” a ci hi.

⁷ Bang hang hiam cih leh tua a gilo numei Athaliah le a pawlte in Pasianʼ biakinn luh uh a, Topaʼ biakinn sunga om a ki-ap nate khempeuh zong Baal-te adingin zang uh hi.

⁸ Tua ahih ciangin kumpipa in thu pia a, amaute in singkuang khat bawlin Topaʼ biakinn kulh kongpi pua lamah a koih uh hi.

⁹ Gamlak ah a om lai-un Pasianʼ nasem Moses in Israel mite a piaksak mangmu Topa adingin hong puak nadingun Judah le Jerusalem sung khempeuh ah thu zaksakna kibawl hi.

¹⁰ Tua ciangin ulian khempeuh le mi khempeuh lungdamin a mangmu uh hong sung uh a, a man khit mateng uh singkuang sungah khia uh hi.

¹¹ Levi mite in kumpipaʼ uliante kiangah a singkuang paipih uh a, a sungah sum tampi a om lam a muh peuhpeuh uh ciangin, kumpipaʼ lai-at pa le siampi lianpen paʼ sawltak pa hong pai-in singkuang sunga sum teng bung khia-in la uh a, tua ciangin a omna ngei ah a singkuang koihkik uh hi. Tua bangin a nini-in amaute in hih uh a, sum tampi a khawm uh hi.

¹² Tua ciangin kumpipa le Jehoiada in Topaʼ biakinn nasep a ukte tungah tua sumte pia uh a, amaute in Topaʼ biakinn a ngei a bangsakkik dingin leilesuang nasep a siamte le khutsiamte le Topaʼ biakinn a puahkik dingin sik le sumngo nasep a siamte zong a cial uh hi.

¹³ Tua ahih ciangin tua nasepna ah a kisehte in na semin amauʼ khut sungah puahkikna nasep in mai nawt a, amaute in a ngei bangin Topaʼ biakinn bawlkikin kipsak uh hi.

¹⁴ Amaute in a zawh khit uh ciangin, kumpipa le Jehoiada kiangah sum a omlaite hong paipih uh a, amaute in tuate tawh Topaʼ biakinn ah nasep nading le meihal biak nadingin nazatte le paknamtui adingin pakante le kham le ngun beelte a bawl uh hi. Tua ahih ciangin amaute in Jehoiadaʼ nuntak sung khempeuh a tawntungin Topaʼ biakinn sungah meihal biaknate a pia uh hi.

¹⁵ Ahih hangin Jehoiada teekin a hun kicing ta a, tua ciangin a si hi. A sihin kum za le kum sawm thum pha hi.

¹⁶ Amah in Israel sung le Pasianʼ na le Pasianʼ biakinn ah nasep hoih sem ahih manin amaute in David khuapi sung kumpiteʼ lakah amah a vui uh hi.

¹⁷ Jehoiada a sih khit ciangin Judah uliante hong pai-in amauʼ thu a zuih nadingin kumpipa tungah thu va gen uh a, kumpipa in zong amauteʼ thu a ngai hi.

¹⁸ Tua ahih ciangin amaute in a pu a pate uh Pasian, Topaʼ biakinn nusia uh a, Asherah milimte le milim dangteʼ na sem uh hi. Hih amauʼ mawhna hangin Judah le Jerusalem tungah hehna hong tung hi.

¹⁹ Ahi zongin Topaʼ lamah amaute a paipihkik dingin amah in amaute lakah kamsangte a puak hi. Hihte in amauʼ lang khat ah teci pang a, ahih hangin amaute in don lo uh hi.

²⁰ Tua ciangin siampi Jehoiadaʼ tapa Zekhariahʼ sungah Pasianʼ kha hong lut hi. Tua ciangin amah dingin mite en sukin mite kiangah, “Pasian in hih bangin ci hi: ‘Bang hangin na mavan theih loh nadingun Topaʼ thupiaknate palsat na hi uh hiam? Note in Topa nusia na hih manun amah in note hong nusia hi,’ ci hi,” a ci hi.

²¹ Ahih hangin amaute in amah sawm sim uh a, kumpipaʼ thupiakna tawh amaute in Topaʼ biakinn tual ah suang tawh amah deng lum uh hi.

²² Tua bangin kumpipa Joash in Zekhariahʼ pa Jehoiada in ama tungah a lah dikna phawk nawn loin ama tapa thahsak mawk hi. Amah in a sih ding ciangin, “Topa in mu henla thuk tahen!” a ci hi.

²³ Kum bei ciangin Joash a simin Syria galkapte hong kuan to hi. Judah le Jerusalem ah amaute hong pai-in mite lak panin ulian khempeuh that uh a, a van ngahte khempeuh uh Damaskas kumpipa kiangah puak uh hi.

²⁴ Syria galkapte mi tawmno hong pai hi napi-in, amaute in a pu a pate uh Pasian, Topa nusia uh ahih manin Topa in amauteʼ khut sungah galkap tampi ahi mite a pia hi. Tua bangin amaute in Joashʼ tungah thukhenna a pia uh hi.

²⁵ Amah nakpi tak a liam sa-in nusia-in, ama kiang panin Syria mite a kihepkhiat khit uh ciangin, siampi Jehoiadaʼ tapa a thahna hangin a nasemte in amah sawm sim uh a, a lupna tungah amah that uh hi. Tua ahih ciangin amah si hi. David khuapi sungah amah vui uh a, ahih hangin amaute in kumpiteʼ hanah amah vui lo uh hi.

²⁶ Amah a sawm sim mite pen Ammon numei Shimeathʼ tapa Zabad le Moab numei Shimrithʼ tapa Jehozabad ahi uh hi.

²⁷ Ama tapateʼ thute le amah a kigensiatna thute le Pasianʼ biakinn a kilamkikna thute, Kumpiteʼ Khang Tangthu Laibu sungah kigelh hi. Tua ciangin a tapa Amaziah in ama tangin a uk hi.