1 SAMUEL MASA 4 - Tedim Bible Revision 2017

Filistia Mite in Thuciamna Singkuang Man

¹ Tu-in Filistia mite a sim dingin Israel-te kuan khia uh hi. Amaute in Ebenezer ah phual sat uh a, Filistia mite in Afek ah phual sat uh hi.

² Israel-te a do dingin Filistia mite kipan uh a, gal a kido uh ciangin Filistia mite in Israel-te zo-in galphual sungah mi tul li bang that uh hi.

³ Mihonte giahphual ah hong ciah ciangin Israel upate in, “Bang hangin Topa in tu ni-in Filistia miteʼ mai ah eite hong taisak ahi hiam? Eiteʼ lakah amah hong pai-in a thahat i galteʼ khut sung panin amah in eite hong hotkhiat theih nadingin Shiloh panin Topaʼ Thuciamna Singkuang paipih ni,” a ci uh hi.

⁴ Tua ahih ciangin mite in Shiloh ah mi paisak uh a, kherub-te tungah a tu Vanglian Topaʼ Thuciamna Singkuang tua lai panin hong pua uh hi. Eliʼ tapa nihte, Hofni le Finehas, Pasianʼ Thuciamna Singkuang tawh tua lai ah om uh hi.

⁵ Topaʼ Thuciamna Singkuang giahphual sung hong tun ciangin Israel-te khempeuh nakpi takin awng uh a, lei a thawn hi.

⁶ Filistia mite in otna gamlumna a zak uh ciangin amaute in, “Hebru miteʼ giahphual ah nakpi a hih bang otna bang a cihnopna ahi hiam?” a ci uh hi. Topaʼ Thuciamna Singkuang giahphual a tun khitna a theih uh ciangin

⁷ Filistia mite lau uh hi. Bang hang hiam cih leh amaute in, “Giahphual ah a pasian-te uh tung zo hi,” a ci uh hi. Amaute in, “Gimna ngah hi ta hang! Bang hang hiam cih leh nidangin hih bang piang ngei lo hi.

⁸ Gimna ngah hi ta hang! Kua in hih a thahat pasian-teʼ khut sung panin eite hong hon khia zo ding ahi hiam? Hihte pen gimna a tuamtuamte tawh gamlak ah Egypt-te a vat gawp pasian-te ahi hi.

⁹ Filistia mite aw, hang unla, pasal bangin gamta un. Tua hikeileh amaute, noteʼ sila hong hih mah bangin Hebru miteʼ sila na suak ding uh hi. Pasal lungsim nei-in do un,” a ci uh hi.

¹⁰ Tua ahih ciangin Filistia mite in do uh a, Israel-te kizo-in mi khempeuh a inn ciatah tai uh a, mi tampi tak kithat hi. Bang hang hiam cih leh Israel-te khe galkap mi tul sawm thum puk hi.

¹¹ Tua ciangin Pasianʼ Thuciamna Singkuang zong kiman a, Eliʼ tapa nihte, Hofni le Finehas zong kithat hi.

¹² Giahphual panin Benjamin mi khat hong tai-in a puan kikeek sa le a lu tungah leivui khu-in Shiloh hong tung hi.

¹³ Amah a tun ciangin, lampi gei ah a vilin ama tutna ah Eli na tu hi; bang hang hiam cih leh Pasianʼ Thuciamna Singkuang hangin a lungsim liing hi. Mipa khuapi sung hong tungin a thu teng a gen ciangin khuapi mi khempeuh lau-in kiko uh hi.

¹⁴ Eli in kikona awging a zak ciangin amah in, “Hih gamlumna bang ahi hiam?” a ci hi. Tua ciangin mipa manlangin hong pai-in Eli kiangah a gen hi.

¹⁵ Tu-in Eli kum sawm kua le kum giat pha a, a mitte maangin khua mu thei lo hi.

¹⁶ Mipa in Eli kiangah, “Keimah, galphual panin hong ciah ka hi a, tu ni-in giahphual panin kong tai hi,” a ci hi. Tua ciangin amah in, “Ka tapa aw, bangci ahi hiam?” a ci hi.

¹⁷ A thu hong puak pa in dawngin, “Filistia miteʼ mai ah Israel-te tai uh a, mi tampi tak zong kithat hi; na tapa nihte, Hofni le Finehas zong si uh a, Pasianʼ Thuciamna Singkuang kiman khin hi,” a ci hi.

¹⁸ Amah in Pasianʼ Thuciamna Singkuang a gen ciangin kulh kongpi gei-a a tutna mun panin Eli thal pukin a ngawng kitanin a si hi. Bang hang hiam cih leh amah puteek hi-in gik hi. Amah in Israel-te kum sawm li sung thu khen hi.

¹⁹ Tu-in a monu, Finehasʼ zi, naupaii-in a suak dektak ahi hi. Pasianʼ Thuciamna Singkuang a kimatna le a pasal a sihna thu a zak ciangin amah kunin nausuak hi. Bang hang hiam cih leh a nat hun tung ta hi.

²⁰ Amah si dektak a, ahi zongin amah a don numeite in ama kiangah, “Lau kei in, tapa khat na nei hi,” a ci uh hi. Ahih hangin amah in dawng lo a, zong don lo hi.

²¹ Tua ciangin amah in, “Israel-teʼ sung panin minthanna paikhia khinta!” ci-in a naungek min Ikhabod a phuak hi. Bang hang hiam cih leh Pasianʼ Thuciamna Singkuang a kimatna hang le a teekpa le a pasalʼ hang ahi hi.

²² Amah in, “Pasianʼ Thuciamna Singkuang kiman khin ahih manin Israel-teʼ sung panin minthanna paikhia khinta hi,” a ci hi.