1 SAMUEL MASA 18 - Tedim Bible Revision 2017

David tawh Jonathanʼ Thuciamna

¹ David le Saul a kiho khit a kipanin Saulʼ tapa Jonathan in ama pumpi zahin David a it hi.

² Saul in tua ni a kipanin ama kiangah David omsak a, a paʼ inn ah ciahsak lo hi.

³ Jonathan in ama pumpi zahin David it ahih manin amah tawh thuciamna khat a bawl hi.

⁴ Jonathan in ama silh lai a puan tualpi suahin David pia a, a gal kidalna le a namsau nangawn le a thal le a kawnggak zong a pia hi.

⁵ Saul in a sawlna mun khempeuh ah David in a maa tun hi. Tua ahih ciangin Saul in galkapte a uk dingin amah a koih hi. Mi khempeuh le Saulʼ nasemte in zong hih thu hoih a sa uh hi.

Saul in David Haza

⁶ Filistia-pa a thahna panin David ciahin, amaute in inn lam a zuat uh ciangin Israel khuapi khempeuh sung panin kumpi Saul a dawn dingin khuangtung le lasaknate tawi-in numeite a laam kawmin hong kuan khia uh hi.

⁷ Amaute gualnuamin numeite khatlekhat in, “Saul in a tulin that, David in a tul sawmin that,” kici uh hi.

⁸ Saul heh mahmah a, hih thugenna in amah lungkim losak hi. Amah in, “Amaute in David tungah a tul sawmin pia-in, kei tungah a tulin hong pia bek uh hi. Kumpi min puak cih sim loh bang dang nei nawn ka hi hiam?” a ci hi.

⁹ Tua ni a kipan Saul in David encik hi.

¹⁰ A zing ciangin Pasianʼ sawl kha gilo in Saul hong bawh a, nisimin David in a hih ngei bangin laiza lasakna a tum laitakin ama inn sung tengah Saul hang gawp hi. Saul in a khut sungah a teipi tawi hi.

¹¹ Saul in a teipi-in David nih vei a khawh hi; bang hang hiam cih leh, “Kawm tawh David ka khawhcip ding hi,” ci-in ngaihsun hi. Ahih hangin David in a nih vei mahin na pelh thei hi.

¹² Saul in David kihta hi; bang hang hiam cih leh Topa in amah ompih a, ahih hangin Saul kiang panin amah kihem khia khinta hi.

¹³ Tua ahih ciangin Saul in a omna panin David la khia-in mihing tul khat a ukin koih a, mite a makai-in amah kuan khia-in hong ciah hi.

¹⁴ David in a sepna khempeuh ah a maa tun hi; bang hang hiam cih leh Topa in amah ompih hi.

¹⁵ Amah in matut zawhna lianpi a neih lam Saul in a muh ciangin amah lamdang sa-in om hi.

¹⁶ Ahih hangin Israel-te khempeuh le Judah-te khempeuh in David it uh hi; bang hang hiam cih leh amaute makaihin amah kuan khia-in hong ciah hi.

¹⁷ Tua ciangin Saul in David kiangah, “Hih lai ah ka tanu u zaw Merab om hi. Nang tungah zi dingin kong pia ding hi. Kei adingin hang peuh inla, Topaʼ gal do in,” a ci hi. Bang hang hiam cih leh Saul in, “Keima khut sungah amah si loin Filistia-teʼ khut sungah si hen,” ci-in ngaihsun hi.

¹⁸ David in Saul kiangah, “Kei pen kumpipaʼ makpa ka hih nadingin kei, bang hi a, Israel-te tungah ka tanaute, ka paʼ innkuante bang ahi hiam?” a ci hi.

¹⁹ Ahih hangin Davidʼ tungah Saulʼ tanu Merab a kipiak ding laitakin Meholah mi Adriel tungah a zi dingin kipia hi.

²⁰ Tu-in Saulʼ tanu Mikhal in David ngai hi. Saul kiangah hih thu a kigen ciangin Saul a lungdam hi.

²¹ Saul in, “Ama adingin ka tanu pen thangzak ahih theih nading le Filistia-teʼ khut sungah a sih theih nadingin ama tungah ka tanu pia ning,” ci-in ngaihsun hi. Tua ahih ciangin Saul in David kiangah a nih veina genin, “Nang pen tu-in ka makpa na hi ding hi,” a ci hi.

²² Saul in a nasemte thu pia a, “David kiangah thu tuam genpih unla, ‘En in, nang tungah kumpipa lungkim a, ama nasemte khempeuh in nang hong it hi. Tua ahih ciangin tu-in kumpipaʼ makpa suak in,’ ci un,” a ci hi.

²³ Saulʼ nasemte in David kiangah hih thute gen uh hi. David in, “Kei pen mizawng hi-in a zahtakhuai lo ka hihna mu napi-in kumpipaʼ makpa suah ding a thuneu sa na hi uh hiam?” a ci hi.

²⁴ Tua ciangin Saulʼ nasemte in ama kiangah, “Tua bang tua bangin David in gen hi,” a ci uh hi.

²⁵ Tua ciangin Saul in, “David kiangah hih bangin na gen ding uh hi: ‘Kumpipa in a galte a thukkik theih nadingin Filistia-teʼ zangvun teep za khat cih sim loh kumpipa in moman deih lo hi,’ ci un,” a ci hi. Tu-in Saul in Filistia-teʼ khut tawh David sihsak ding ngaihsun hi.

²⁶ Saulʼ nasemte in David kiangah hih thute a gen uh ciangin kumpipaʼ makpa ahih ding David a lungkim hi. A hun a bei ma-in,

²⁷ David dingin ama mite tawh pai a, Filistia mi za nih that hi. Tua ciangin amah kumpipaʼ makpa a suah theih nadingin kumpipa tungah a cingin a kipia amauteʼ zangvun teepte David in hong paipih hi. Saul in a tanu Mikhal ama zi dingin a pia hi.

²⁸ Ahih hangin Topa in David a ompihna le Israel-te khempeuh in amah a itna thu Saul in a muh ciangin

²⁹ David a kihta semsem hi. Tua ahih ciangin Saul pen Davidʼ gal hi tawntung hi.

³⁰ Tua ciangin Filistia mi uliante galsim dingin hong kuan khia uh a, amaute hong kuan khiat simin Saulʼ nasem dangte khempeuh sangin David in a maa tun zaw hi. Tua ahih manin mite in David thupi muh semsem hi.