1 PETER MASA 4 - Tedim Bible Revision 2017

Pasianʼ Piak Na A Zatsiamte

¹ Khris in ama pumpi-in thuak ahih manin note in zong tua bang lungsim mah nei-in na kithakhauhsak ding uh ahi hi. Bang hang hiam cih leh pumpi-in a thuak mite peuhmah, mawhna tawh kisawh kha nawn lo uh hi.

² Tua ahih manin tu a kipanin na leitung nuntak sung uh mihingteʼ deihna bangin gamta loin Pasianʼ deihna bangin na gamtat ding uh ahi hi.

³ A beisa hunah dawi biateʼ gamtat bangin a hoih khop khat na gamta khinta uh a, a kilawm loin gamtatna, hukna lanna, zunekna, uangtatna, zukham luatna le a muhdahhuai milim biakna-in na hun uh na beisak uh hi.

⁴ Tu-in note in dawi biate pawlpih nawn loin ututin na pheng tat loh uh ciangin lamdang sa-in note hong ko sia uh hi.

⁵ Ahi zongin amaute in a site le a hingteʼ thu a khen dingin a om Pasianʼ mai ah thudotna thuak ding uh hi.

⁶ Tua thu hang mahin, midang khempeuh thu a khen mah bangin a leitung nuntakna uh ah Pasian in thu a khen khit tei hangin kha nuntakna ah Pasian mah bangin a nuntak theih nadingun mi si sate kiangah Khris in Lungdamna Thu a hilh ahi hi.

⁷ Na khempeuh a bei nading hun hong nai ta hi. Nomau pumpi ki-uk tawm thei-in pilvang unla, hoihtakin thu a ngen thei-in om ta un.

⁸ Itna in mawhna tampi khuhcip thei ahih manin lungsim takpi tawh khatlekhat ki-it ding thupi ngaihsut pha pen un.

⁹ Khatlekhat maitai takin zinleleeng na kido un.

¹⁰ Pasianʼ piak na a zatsiamte bangin Pasianʼ kiang panin na ngah uh nate, midangteʼ phattuam nadingin na zang un.

¹¹ Minthanna le vangliatna a nei tawntung Pasian in Jesu Khris hangin thu khempeuh ah phatna a ngah theih nadingin thuhilhte in Pasianʼ thu na hilh unla, na a semte in Pasianʼ piak thahatna tawh na sem un. Amen.

Khristian Hihna Hangin Thuakna

¹² Ka itte aw, noteʼ upna hong kize-etna-in gimna haksate na thuak manun a thu lamdangpi-in ngaihsun kei unla, na lungkham ngaihsut kei un.

¹³ Tua bangin Khris tawh thuak khawm le-uhcin ama minthanna hong kilat ciangin note lungdam mahmah ding na hih manun, tua banga na thuakna uh ah na lungdam zaw un.

¹⁴ Khris nungzui hihna hangin miteʼ kosiatna na thuak uh leh note sungah a minthang Kha Siangtho ahi Pasianʼ Kha Siangtho hong om ahihna lim ahih manin a hampha mahmah na hi uh hi.

¹⁵ Ahi zongin mi thahna, guktaakna, gamtat khialhna le thusia bawlna hangin gimna a thuakte na hi kha kei un.

¹⁶ Ahi zongin Khristian hihna hangin gimna na thuak uh leh kuamah in maizum ngaihsut kei unla, Khris min hangin na thuak manun Pasian tungah na lungdam un.

¹⁷ Tu-in thukhen kipat hun ding hong tung ta-in Pasianʼ mi eite tungah hong kipan ahihleh Pasian kiang panin hong pai Lungdamna Thu a um lo mite adingin bangzahin lungkham huai ding ahi hiam?

¹⁸ Lai Siangtho in, “Mihoihte kihon khia zo liailiai bek ahihleh Pasian a um lo mawhnei mite bang suak ding ahi hiam?” na ci hi.

¹⁹ Tua ahih ciangin Pasianʼ deihna bangin gimna a thuak mite gamtat hoihin, a kamciam a tangtungsak tawntung hong Piangsak pa muangin ama khut sungah a ki-ap ding uh ahi hi.