1 KHANG TANGTHU MASATE 9 - Tedim Bible Revision 2017

Babylon Panin Hong Ciahkikte

¹ Israel mi khempeuh khangsimna ah kiciamteh a, Israel Kumpiteʼ Laibu sungah tuate kigelh hi. Amau thuman lohna hangin gimpiakna-in Babylon ah salin Judah mite kipaipih hi.

² Tu-in amauʼ neihsa amauʼ khuapite sungah a tengkik masate pen Israel nautangte, siampite, Levi mite le biakinn nasemte ahi uh hi.

³ Tua ciangin Judah, Benjamin, Efraim le Manasseh mi pawl khat Jerusalem ah teeng uh a, tua a teengte:

⁴ Judah tapa Perezʼ tapate sung panin Baniʼ tapa Imri, a tapa Omri, a tapa Ammihud, a tapa Uthai a makai ahi hi.

⁵ Tua ciangin Judah tapa Shelah mite sung panin: Innkuan lutang Asaiah a makai ahi hi.

⁶ Judah tapa Zerah mite sung panin: Jeuel a makai ahi hi. Judah minam sung panin innkuan za guk le sawm kua ahi hi.

⁷ Benjamin mite sung panin: Hassenuahʼ tapa Hodaviah, a tapa Meshullam, a tapa Sallu ahi hi.

⁸ Tua ciangin Jehoramʼ tapa Ibneiah, Makriʼ ta Uri, a tapa Elah le Ibnijahʼ ta Reuel, a tapa Shefatiah, a tapa Meshullam ahi hi.

⁹ Benjamin minamte sung panin innkuan za kua le sawm nga le guk ahi hi. Hih min kilote khempeuh pen amauʼ beh ciatah beh lutangte ahi uh hi.

¹⁰ Siampiteʼ sung panin: Jedaiah, Jehoiarib, Jakhin,

¹¹ le Ahitubʼ tapa Meraioth, a tapa Zadok, a tapa Meshullam, a tapa Hilkiahʼ tapa Azariah, (Pasianʼ biakinn sung a ukpipa)

¹² le Malkhijahʼ tapa Pashhur, a tapa Jehoramʼ tapa Adaiah le Immerʼ tapa Meshilemith, a tapa Meshullam, a tapa Jahzerah, a tapa Adielʼ tapa Maasai ahi hi.

¹³ Hihte banah amauʼ behte, a beh lutangte, Pasianʼ biakinn ah nasep nadingin a siam mahmah mihing tul khat le za sagih le sawm guk ahi hi.

¹⁴ Levi mite sung panin: Merariʼ tapate sung pan Hashabiah, a tapa Azrikam, a tapa Hasshubʼ tapa Shemaiah,

¹⁵ le Bakbakkar, Heresh, Galal le Asafʼ tapa Zikri, a tapa Mikaʼ tapa Mattaniah,

¹⁶ le Jeduthunʼ tapa Galal, a tapa Shemaiahʼ tapa Obadiah le Netofah khuaneute sungah a teeng, Elkanahʼ tapa Asaʼ tapa Berekhiah ahi hi.

¹⁷ Kulh kongpi cingte: Shallum, Akkub, Talmon le Ahiman hi a, Shallum pen amauʼ makai pa ahi hi.

¹⁸ Tu dongin Kumpipaʼ Kulh kongpi nisuahna lam pangah a omte ahi uh hi. Hihte pen Levi miteʼ omna kongcingte ahi ngei uh hi.

¹⁹ A pu a pate uh, biakbuk lutna mun a cing, Topaʼ phual a ukte ahih uh mah bangin Korahʼ tapa Ebiasaf, a tapa Koreʼ tapa Shallum le a behte ahi Korah mite pen nasepna a uk, puanbuk kong a cingte ahi uh hi.

²⁰ Eleazarʼ tapa Finehas pen a beisa hun sungah amaute a ukpa hi a, Topa in amah ompih hi.

²¹ Meshelemiahʼ tapa Zekhariah pen kikhopna puanbuk lutna ah kongcing pa ahi hi.

²² Kongcingin a kiteel hih mite khempeuh za nih le sawm le nih ahi hi. Amaute pen a khuaneute uh a khangsimna ah kiciamteh uh hi. David le thumu pa Samuel in amauʼ panmun ah amaute phut hi.

²³ Tua ahih ciangin amaute le a suan a khakte uh Topaʼ biakinn kulh kongpite a uk, a cingte ahi uh hi.

²⁴ Kongpi cingte pen a pang li, nisuahna, nitumna, leilu le leitaw lamah om uh hi.

²⁵ Tua ciangin amauʼ khuaneute sungah a om a behte uh hih mite tawh a om dingin a hunhunin ni sagih simin a hong pai ding uh a kisam ahi hi.

²⁶ Bang hang hiam cih leh Levi mi kongpi a cing ukpi lite pen biakinn sungte le Pasianʼ biakinn van manpha koihnate a uk ahi uh hi.

²⁷ Pasianʼ biakinn kiimah amaute giak uh hi; bang hang hiam cih leh amaute tungah vilna nasep le zingsang simin kong a hon ding uh nasep kiguan hi.

²⁸ Amaute pawl khat in biakinn sunga kizang umlebeelte uk uh hi; bang hang hiam cih leh tua nazatte hong kitumpih ciang hitaleh a kilakkhiat ciang hitaleh a malzah a sim ding uh kisam hi.

²⁹ Amau sung pan a dang pawl khatte pen tutphah sabuaite le a kituam koih umlebeel, annelte, leenggahzute, sathaute, paknamtuite le a namtui nate zong a en dingin kiseh hi.

³⁰ Siampiteʼ ta a dangte in a namtui nate hel dingin bawl uh a,

³¹ tua ciangin Levi mite lak pan Korah mi Shallumʼ tacil Mattithiah in biak nading moh pheengte bawl ding uk hi.

³² Kohath mi amauʼ behte pawl khat in zong Sabbath simin koih ding Ompihna Anlum uk uh hi.

³³ Tu-in hihte pen lasate, Levi mi beh lutangte, nasep dangte panin pengin biakinn deite sungah a teengte ahi uh hi. Bang hang hiam cih leh amaute in sun le zanin na sem uh hi.

³⁴ Hihte pen Jerusalem ah a teeng amauʼ khang tawh kizui-in makaite, Levi mi beh lutangte ahi uh hi.

Saulʼ Khangsimna

³⁵ Gibeon ah tua khuapi a sat pa Jeiel teeng a, ama ziʼ min Maakah hi-in,

³⁶ a tapa upa pen Abdon, tua ciangin Zur, Kish, Baal, Ner, Nadab,

³⁷ Gedor, Ahio, Zekhariah le Mikloth ahi uh hi.

³⁸ Mikloth pen Shimeahʼ pa ahi hi. Amauʼ suanlekhakte zong Jerusalem-a a behte uh gal khat ah a behte uh tawh teeng uh hi.

³⁹ Ner pen Kishʼ pa, Kish pen Saulʼ pa ahi hi. Saul pen Jonathan, Makhishua, Abinadab le Eshbaalʼ pa ahi hi.

⁴⁰ Jonathanʼ tapa Meribbaal hi a, Meribbaal pen Mikahʼ pa ahi hi.

⁴¹ Mikahʼ tapate: Pithon, Melek, Tahrea le Ahaz ahi uh hi.

⁴² Ahaz pen Jarahʼ pa hi a, Jarah pen Alemeth, Azmaveth le Zimriʼ pa ahi hi. Zimri pen Mozaʼ pa ahi hi.

⁴³ Moza pen Bineaʼ pa ahi hi. A tapa Refaiah, a tapa Eleasah, a tapa Azel ahi hi.

⁴⁴ Azel in tapa guk nei a, tuateʼ min: Azrikam, Bokheru, Ishmael, Sheariah, Obadiah le Hanan ahi uh hi. Hihte pen Azelʼ tapate ahi uh hi.