1 KHANG TANGTHU MASATE 5 - Tedim Bible Revision 2017

Reubenʼ Suanlekhakte

¹ Israelʼ tate sung panin Reuben a tacil ahi hi. (Amah in a paʼ zineute khat luppih ahih manin tacil hi napi-in ama innluah za pen Josefʼ tungah kipia hi. Tua ahih ciangin innluah za tawh kizui-in khangsimna ah amah kiciamteh lo hi.

² A sanggamte lakah Judah a thahat suakin ama sung panin ulian khat a om hangin innluah za pen Josef aʼ ahi hi.)

³ Israelʼ tacil Reubenʼ tapate: Hanok, Pallu, Hezron le Karmi ahi uh hi.

⁴ Joelʼ suante: A tapa Shemaiah, a tapa Gog, a tapa Shimei,

⁵ a tapa Mikah, a tapa Reaiah, a tapa Baal,

⁶ le a tapa Beerah hi a, Assiria kumpipa Tiglath-pileser in amauʼ minam makai Beerah manin salin a puakkhiat pa ahi hi. Amah pen Reuben mite a ukpipa ahi hi.

⁷ Tua ciangin amauʼ khangsimna a kiciamteh ciangin a inn kuankuanin ama behte: Ukpi Jeiel, Zekhariah,

⁸ le Joel mite beh sung panin Shemaʼ tapa Azaz, a tapa Bela ahi hi. Aroer le tua panin Nebo le Baal-meon ciang dongah a teeng uh hi.

⁹ Gilead gam sungah amauʼ bawngte khangin tampi pha ahih manin Eufratis gun hih lam pang sehnel gam lutna ciang dong nisuahna lamah zong a teeng uh hi.

¹⁰ Tua ciangin Saulʼ hun lai-in amaute in Hagri mite simin zo uh a, Gilead nisuahna lam gam khempeuh a amauʼ puanbukte luahin tuate sungah a teeng uh hi.

Gadʼ Suanlekhakte

¹¹ Bashan gam Salekah dongah Reuben-teʼ gal khat ah a teeng Gad minamte:

¹² Ukpi Joel hi-in, a zom Shafam hi a, Janai le Shafat, Bashan ah beh makai ahi uh hi.

¹³ Tua ciangin amauʼ beh makai dangte: Mikhael, Meshullam, Sheba, Jorai, Jakan, Zia le Eber, sagih pha uh hi.

¹⁴ Hihte pen Buzʼ tapa Jahdo, a tapa Jeshishai, a tapa Mikhael, a tapa Gilead, a tapa Jaroah, a tapa Huriʼ tapa Abihailʼ suante ahi uh hi.

¹⁵ Guniʼ tapa Abdielʼ tapa Ahi pen amauʼ behte sungah ukpi ahi hi.

¹⁶ Amaute Gilead gam sung, Bashan gam le a khuapite sung le Sharon gam sung lo nona a kiteen theihna ciang dongah a teeng uh hi.

¹⁷ Hihte khempeuh Judah kumpi Jothamʼ hunsung le Israel kumpi Jeroboamʼ hun sungin khangsimna ah kiciamteh hi.

Minam Nih le Minam Langteʼ Tangthu

¹⁸ Reuben mite, Gad mite le Manasseh minam a langte in mi thahat, lum le namsau kuah in thal a tawi, gal a siam, nasem dingin a baih sa-in a om mi tul sawm li le tul li le za sagih le sawm guk nei hi.

¹⁹ Amaute in Hagri mite, Jetur mite, Nafish mite le Nodab mite zo uh hi.

²⁰ Amaute a sim nadingin huhna a ngah uh ciangin Hagri mite le amau tawh a kipawl khempeuhte amauteʼ khut sungah kipia hi; bang hang hiam cih leh gal kidona sungah amaute in Pasianʼ tungah ko uh a, amaute in Pasian muang uh ahih manin amah in amauteʼ thumna a pia hi.

²¹ Amaute in amauʼ ganhingte matsak uh hi. A kalaoh uh tul sawm nga, tuu tul za nih le tul sawm nga, la tul nih le mi tul za khat hing mat uh hi.

²² Tua gal pen Pasianʼ gal ahih manin mi tampi tak kithatin puk hi. Tua ciangin amaute sal a suah hun dong uh tua munah teeng uh hi.

²³ Manasseh minam a langte pen Bashan panin Baal-hermon, Senir le Hermon Mual tungah teengin tam pha mahmah uh hi.

²⁴ Amauʼ beh lutangte: Efer, Ishi, Eliel, Azriel, Jeremiah, Hodaviah le Jahdiel hi a, a thahat galhangte, mi minthangte, a beh lutangte ahi uh hi.

²⁵ Ahih hangin amaute in a pate uh Pasianʼ thu palsat uh a, Pasian in amauteʼ mai ah a suksiat tua gam miteʼ pasian-te bia uh hi.

²⁶ Tua ahih ciangin Israel Pasian in Assiria kumpipa Pul (Tiglath-pileser zong a kici) Assiria kumpipa hansuah a, amah in Reuben mite, Gad mite le Manasseh minam a langte pua khia-in, Halah, Habor, Hara khuate le Gozan gun dungah paipihin tu ni dongin tua gamte ah om uh hi.