1 JOHAN MASA 1 - Tedim Bible Revision 2017

Nuntakna A Pia Thei Thu

¹ Leitung piancil lai pek a kipanin a om sa ahi nuntakna a pia thei Thu tawh kisai, note kiangah ka hong gelh uh hi. Kote mahmah in ama thugen ka za uh a, ka mit mahmah uh tawh amah mu-in, limtakin ka et tel uh hi a, ka khut mahmah uh tawh ka lawn uh ahi hi.

² Hih nuntakna pen a kimu thei a hong suah ciangin kote mahmah in ka mu uh hi. Tua ahih manin kote tungah a hong kilak, Pa Pasian tawh a om khawm tua nuntak tawntungna pen gen belin nei-in, note tungah zong a hong gen ka hi uh hi.

³ Pa Pasian le a Tapa Jesu Khris tawh kote pawl khatin ka om uh mah bangin note zong kote tawh pawl khat nong suah theih nading uh deihna-in ka muh sa uh le ka zak sa uh thute a hong gen ka hi uh hi.

⁴ Koteʼ lungdamna a cingtaak theih nadingin hih lai a hong gelh ka hi uh hi.

Pasian, Khuavak Hi

⁵ Ama kiang panin za-in note tungah kong gen uh thu in: Pasian, khuavak hi a, khuamial tawh kizopna them khat zong nei het lo hi.

⁶ Tua ahih manin Pasian tawh ka kipawl hi, ci napi-in khuamial tawh kisai gamtatnate i gamtat le i kampauna le i gamtatna tawh zuau thu a gen ihi hi.

⁷ Ahi zongin amah, khuavak ahih mah bangin eite in zong khuavak gamtatnate i gamtat takpi leh eite pawl khat ihi a, ama Tapa Jesuʼ sisan in i mawhna khempeuh panin eite hong siangsak hi.

⁸ Mawhna ka nei kei hi, i cih leh eite a kineihkhem ihi a, eite a thutak lo ihi hi.

⁹ Ahi zongin Pasian kiangah i mawhnate va pulak lehang, amah citakin thuman ahih manin, i mawhnate hong maisakin i hoih lohnate khempeuh hong siangsak ding hi.

¹⁰ Pasian in a mawh hi, hong ci ahih manin eite in ka mawh ngei kei hi, i cih leh Pasian pen zuaugen a suaksak ihi a, i sungah ama thu a om het lo ahi hi.