Tito 3 - Tradução Bíblica Pacaas Novos

Ca xuruxut nexi' pain ca howa xun Jeju

¹ Mam' pe wet jein i ca' ta roron oro xerexi' ma' quem: Tomi' ha' jujun oro taramaxicon ta roron. Oro taramaxicon ma', oro wari' co taramaxicon to ho' nunuhu' ma', ta tomi' in pin huhun me ta roron. Tama' quep xiho' jujun pain oro carawa ca awi ca ara xi' caca quem roron.

² Ta tomi' napat huhun oro wari' me ta roron. Ta tomi' mana' huhun me, tomi' querec te e' jujun, tama' tomi' wixite tomi' wixite pi' pin jujun oro wari' ta roron quem.

³ Tomi' ac i ca' inem, xi coromicat xo' iri' pain cara pane ta, pain ca om howa querec iri' pane. Win caca oro wari' co om howa nana pain xocori ca' quem. Om na ximixi' pane. Om ca tomi' ha' xun Iri' Jam quem. Hehe e' ururun co mixein nanapari', om ca ari xuxun. Ac ca quep xat capari' na oro ca param pan teretem nexi' pain oro ca waraju nexi' ca hohot napari' pane, om ca miri'om ac xixin. Ximin iri'. Pan teretem e' iri' pane, tama' noc mi' xijexi' pain oro ca ara iri' quem. Noc nanapari' oro wari', noc ururun pane quem.

⁴ Ac i ma' paxi' iri' pane ira. Ane xiram pa' capari' Iri' Jam co to' witan napari' ne. An hwet mi' iri napari' pain ca xiram pa' nucun ne, je pain ca tomi' querec te tomi' querec te xam' capari' ma',

⁵ to' witan pin ac capari' na. Om ca to' witan capari' pain carawa ca awi ca ara xi' paxi' iri' pane, om na. To' witan e' napari' pain ca xiram pa' pan capari'. Mam' to' witan napari' pain ca hwara' opa nein Tamataracon ca hohoc napari' pain ximixi' ca', ca to' xo' camara' mami' napari' pain ca mi' capari' pain xocori ca e' nucun quem. Mam' to' xocoricon wari' pin napari' pain quem.

⁶ Mi' napari' pain Tamataracon, om ca narain ho' camain' capari' pain. Xi om ca Jeju Cristo co to' witan napari' ta.

⁷ Mi' napari' pain Tamataracon. Ma' ta om tara con ta'a camain' mahu' pain ca mi' xim xuhu' pain ca e' cara wa ca' napari'. Je ca howa iri' ca' quem. To' hohot pin napari' con Jeju. Om xi to' hohot pin capari', xi iri' wari' iri' ta. Ane xiram pa' pan capari' ne. Je ca to' hohot pin capari' con.

⁸ Iri'o' na ca tomi' xim ca'. Je ca tomi' xim ca'. Param inem pain ca tama' pijim' mi' momon pain ca tomi' ne oro wari' co howa nonon Iri' Jam ma'. Iri'o' na ta roron. Ma' ta tama' ara cacain ca awi wa, ma' ta win xumu cacain quem. Hohot tamana na ca pijim' ac i ma' momon ma'. Quep xiho' nonon oro wari' quem.

⁹ Ane om quep xiho' capari' oro ca tomi' ximao wa ne. Ta taraju wet momon oro wari' co tomi' caracan ximama' xucucun pain ca tomi' querec xucucun pain oro wixicocon hwanana me ta. Miri'om roron pain oro ca tomi' caracan ximama' nucucun. Miri'om roron pain oro ca tomi' mana' xucucun, miri'om roron pain oro ca tomi' in pin xucucun pain ca tomi' xo' xim paxi' xucucun pain ca xirao' nucun Moisés quem. Om ca quep xiho' camain' capari' oro ca tomi' ximama' nucucun ta.

¹⁰ Mo ta ma' ca wari' co ja' teretem nonon oro win howa ca ma', pain ca to' coromicat ni cocon ma', na e' na pain ca hu mon ta. Mo ta om ha' quem pain ca hu mon ma', hu mami' ac mon tara. Mo ta om ha' camain' quem pain ca hu mami' mon ma', tomi' in pin mip ac mon tara. Om ta win ma' ne mami' mon ta.

¹¹ Querec pin' ara xi' ta wari' co ac i ma' ta. Howa ni ca' nain capijacon Iri' Jam ca iri'o'. Taxi' paxi' xucun pain ca caracat taxipa' ca ma', ane caracat cara pan ca ne. Em' ma ta pan xucun pain ca coromicat nucun pain ximicon.

Ca pi' pin ne ca xirao' nucun Paulo

¹² Mam' ho' xim con win ma' ne cwa'. Am Ártemas cwa', am Tíquico cwa', hwet ron Tito ta ton pum. Wa' mao iri tara ne, mao hap ac main tara xijein cidade ma', Nicópolis ma'. Je i cain tara ca mam' pe mapa' ta. Maqui' ta' iri tara oro xec ca xio tamana ne, mao ac tain tara Nicópolis, mon to wet ac tain tara i cain, cawaxi' pa' pe ac capa' tara pain i cain.

¹³ Paca' xim iri terem Apolo con Zenas ne, co tomi' xo' taxi' nain oro ca tomi' nucucun oro taramaxicon ma', quep xiho' tamana ac momon tara. Ma' ta ma' cocon oro carawa ca om nonon pain ca mama' xi' nucucun ta.

¹⁴ Ac i ma' tatara oro xerexi' pain Creta ma' quem. Tomi' roron, ara taxipa' jein ca awi wa ta roron. Quep xiho' jujun oro wari' pain carawa ca om nonon ta roron. Om ta jam' ne curuhu' ta roron, xi quep xiho' capari' ca jam' ne ca cwere wa ta roron quem.

¹⁵ Mam' pe wet urut pum ta nenem oro xerexi' co to ho' nanapa' cwa'. Tomi' roron oro xerexi' co tomi' querec te nanaparut pain ca howa wi iri' ma' quem. Mam' pe wet urut cocon ta nuhu' Paulo cocon xerexi' ta roron. Param inon Iri' Jam pain ca quep xiho' quep xiho' xam' cuhu' ma', pain ca mi' e' cuhu' pain ca param nucun ta. Je i ca' ca xirao' ne ca'.