Tito 2 - Tradução Bíblica Pacaas Novos

Ca hu ca' roron co howa nonon Jeju ta con Tito Paulo

¹ Tomi' ximama' ac i ma' nana co pijim' pan teretem nana ma'. Wum iri na ne, pijim' xo' e' roron pain capijacon Iri' Jam co howa nana ma'. Ca pijim' nem ma', na e' na pain ca an xiho' nein iri' capijacon Iri' Jam ca howa iri' ca'.

² Tomi' ca' roron co wara tiquin' mama' cawaxi' nucucun ma': Ma' tara xumuhu' pain ca om ara e' hwein ca param pan nuhu' ta roron. Na e' na pain ca querec pin' cucuhu' oro wari' pain ca xuruxut xo' nuhu' ta roron. Coromicat xo' je roron. Howa xo' jein capijacon Iri' Jam, ta noc camain' huhun oro wari' me, quereme cara jein oro ca to' i'ina nuhu' ta roron quem.

³ Ac i ma' raram oro narima' co wara tiquin' mama' cawaxi' nequequem ma' quem. Tomi' ca' raram: Pain ca xuruxut nuhu' ma', xuruxut xo' je, ma' ta querec pin' xihwe pain ca howa hun Iri' Jam ta raram. Ta tomi' napat huhun oro wari' me ta raram. Ta toc tamanain to hwein comi uva ca mana' me ta raram. An hwet mi' jejem pain ca awi wa

⁴ oro narima' co xo' horon nana ma', ma' ta win cacama ne cucuhu' quem raram. Na ac cacam tara pain ca ca' na cacam pain ca om noc cocon waram taxicacam cacam humaxicacam ma', pain ca querec wet cacam ma'.

⁵ Na ac cacam tara pain ca ca' na cacam pain ca coromicat xo' wa, je pain ca ma' ne ximicacam quem. Na ac cacam tara pain ca ca' na cacam pain ca querec wet xo' cocon waram taxicacam cacam humaxicacam ma', pain ca taramaja to cacamain xiricacam ma'. Na ac cacam tara pain ca ca' na cacam pain ca xiram pa' cocon oro wari' ma', je pain ca tomi' ha' cocon waram taxicacam ma'. Mo ta xuruxut xo' ac i ma' cacama co xo' horon nana ma', om ac ne tara ca tomi' napat cacain capijacon Iri' Jam oro wari' cacam ta.

⁶ Ac i ma' roron co xo' horon nana ma' quem, hu ca' roron: Coromicat xo' je, ma' tara xumuhu' me roron.

⁷ Wum quem Tito, an hwet mi' roron pain ca awi wa, tama' ara xo' ra. Ma' ta win ca ne quequem pain oro ca ara nem ma'. Pijim' iri roron pain capijacon Iri' Jam ne, om ta tomi' capijacon e' ma pain. Na e' na pain ca maqui' nein iri' xumum ca pijim' nem. Na e' na pain ca querec pin' quequem pain ca xut xo' nem pain ca pijim' momon quem.

⁸ Pijim' xo' e' roron pain iri' capijacon Iri' Jam quem, ma' ta om pijim' pan tem na ta ac quequem oro wari'. Mo ta pijim' ac i ma' momon, om ta na cocon pain ca tomi' napat cacapari' oro wari' co noc nanapari' ma'. Xi ma' ne ca tomi' napat ac cacapari' ta. Hehe e' tatara, wixipa' pin ac caca tara ta.

⁹ Ac i ma' roron oro wari' co taramaja mi' e' nonon taramaxicon nucucun ma', tomi' ca' roron quem: Taramaxicon nuhu' ma', co taramaja mi' e' hwe ma', tama' tomi' ha' jujun pain oro ca ara je cucuhu' ta roron. Win xumu jein ca taramaja nuhu', ma' ta hohot maparut ta cucuhu' ta roron. Ta win capija huhun me ta roron.

¹⁰ Ta an noc xa hwein carawa nucucun me ta roron. An hwet mi' pan jujun pain ca xuruxut xo' nuhu' ma', ma' ta querec pin' cucuhu' pain ca om mixein camain' nuhu' pain ca ara cara xin hwein oro ca param nucucun ta roron. Querec pin' iri tuturuhu' pain oro ca taramaja xo' nuhu' oro wari' ma' ne, taraju toto napa' me ac caca tara pain ca taraju cacain ca pijim' xine capijacon Iri' Jam co to' witan napari' ta roron.

¹¹ Na e' na pain ca xuruxut xo' ac i ma' caca co howa nonon Jeju ta. Xi an hwet mi' ara capari' pain ca awi nucun Iri' Jam ma', pain ca mi' capari' pain ca querec pin' xun ca', pain ca xiram pa' e' capari' ca', pain ca to' witan to' witan pi' pin xuhu' ta capari' ca'. Om xi to' witan capari', xi iri' wari' iri' ta. Ane xiram pa' pan capari' ne. To' witan pan xuhu' ta napari'.

¹² Hu ca' napari' quem: An to pin jein oro ca ara nuhu' ca om hohot napa' ta napari'. An to pin jein oro ca param pan teretem wa ca ara caca oro wari' co om howa nanapa' ta napari'. Coromicat xo' je, xuruxut xo' je, tama' hohot xine ta napari'. Win xumu jein ca param ne pain ca e' e' wet nuhu' pain macan' ta napari' quem.

¹³ Xuruxut xo' ac i ma' xi' pain ca winim' xin xec nein ca ja' tomi' querec te tamana xim capari', je xec nein ca main in qui' ta' ca Jeju Cristo pain ca toc meremem tamana nucun ta. Wirico Jeju Cristo co Iri' Jam ne iri' cwa'. Wirico co to' witan napari' cwa'.

¹⁴ Om ca nain ho' xucun pari' pane, mi' pin caho' xuhu' ta napari' pane. Ma' ta to' witan ca' xuhu' pain oro ca pan teretem nuhu' ta napari'. Ac ca hohoc capari' na pain quicon. Ma' ta to' om pin tain ca caracat nuhu' ta napari'. Ma' ta iri' wari' ne xuhu' ta napari'. Param napari' pain ca win xumu xun pain ca tama' ara xin oro ca awi wa quem.

¹⁵ Je ca tomi' xim ca'. Pijim' mi' roron pain oro ca tomi' ne oro wari' co howa nonon Jeju pain Creta ma'. Hu roron pain. Tomi' rain taraxicocon quem. An hwet mi' roron pain ca hwara' opa ne capijam pain ca tomi' momon quem. Tomi' mip roron. Om ca na ne pain ca miri'om quequem ta.